လါဒံၢ်စ့ဘၢၣ် ၃၀, ၁၈၆၂ နံၣ်, ကီၢ်အမဲရကၤ ထံလီၢ်ကီၢ်ပူၤတၢ်ဒုးတၢ်ယၤ ဆူၣ်ထီၣ်ဝဲ န့ၣ်လီၤ. သုးမုၢ်စၢဖှိၣ်, ဒီးကလံၤထံးသုးမုၢ်လၢထုးလီၤဖးအသး အသုးမုၢ်သံၣ်ဘိတဖၣ် သူၣ်လီၤဒဲ ဖဲကီၢ်စဲၣ်ထဲနစံၣ် (Tenessee), ထံကျိစတိ (Stone) တခီတကပၤ တခီတကပၤ, အိၣ်စီၤစုၤလိာ်သး အပျၢ်နွံကယၤန့ၣ်လီၤ. ဖဲသုးဖိတဖၣ် ဆူးမ့ၣ်အူလၢမုၢ်နၤ အကတီၢ်, သုးမုၢ်စၢဖှိၣ် အပှၤသုးဖိတဖၣ် ဖီၣ်ထီၣ်ဝဲသီတူၢ်တဖၣ် ဒီးတဃံၤတဖၣ်, ဒီးစးထီၣ်ဒ့ထီၣ်အူထီၣ်တၢ်သးဝံၣ် “Yankee Doodle” န့ၣ်လီၤ. အကတီၢ်ဖဲန့ၣ် ကလံၤထံးသုးမုၢ် အသုးဖိတဖၣ် ဃ့ထီၣ်ဝဲ တၢ်သးဝံၣ် “Dixie”န့ၣ်လီၤ. လၢခံကတၢၢ်, သုးမုၢ်ခံကပၤလိာ် ပာ်ဖှိၣ်ဒ့သးဝံၣ်ဝဲ ဟံၣ်မုာ်ဟံၣ်ပၢၤ “Home Sweet Home” န့ၣ်လီၤ. သုးဖိခံဖု, ပာ်လီၤအသးလၢ ကဒုးတၢ်န့ၣ် ဒ့သးဝံၣ်သကိးတၢ်လၢ မုၢ်နၤအကတီၢ်, မ့ၢ်တၢ်ဃူတၢ်ဖိးအပနီၣ်လၢ တၢ်တဆိကမိၣ်ပာ်, တၢ်လၢအဖျါကဒုကယီၢ်န့ၣ်လီၤ. ဘၣ်ဆၣ်, တၢ်ဒ့တၢ်အူလၢ ဆိကတီၢ် တၢ်ဒုးတၢ်ယၤ မ့ၢ်တၢ်တစိၢ်တလီၢ်န့ၣ်လီၤ. လၢခံတဂီၤ န့ၣ်သုးဖိတဖၣ်အံၤ ပာ်လီၤအသီတူၢ် ဒီးဖီၣ်ထီၣ်အကျိတဖၣ်, ဒုးတၢ်ယၤတၢ်, ဒီးသုးဖိ သံဝဲဒၣ် ၂၄,၆၄၅ ဂၤန့ၣ်လီၤ.

ပဝဲ ပှၤဟီၣ်ခိၣ်ဖိတဖၣ် ဂုာ်ကျဲးစၢၤဒုးအိၣ်ထီၣ် တၢ်ဃူတၢ်ဖိးအံၤ တၢ်မၤတကဲထီၣ်လိၣ်ထီၣ်တၢ်န့ၣ် ပသမၢအလီၢ်တအိၣ်ဘၣ်န့ၣ်လီၤ. တၢ်ထီဒုၣ်ထီဒါတဖၣ် အိၣ်ပတုာ်ဖဲတၢ်လီၢ်တတီၤ, ဒီးကစးထီၣ်လၢ တၢ်လီၢ်အဂၤန့ၣ်လီၤ. တၢ်ရ့လိာ်ဘၣ်ထွဲလၢ အသး တလီၤပလိာ်တမံၤ ဃုထံၣ်က့ၤ တၢ်ဃူတၢ်ဖိး, ဒီးစှၤလါပူၤကွံာ်ဝံၤန့ၣ် ကဒုးအိၣ်ထီၣ်က့ၤ တၢ်သးဘၣ်ဒိဆါန့ၣ်လီၤ. လံာ်စီဆှံစံးဘၣ်ပှၤလၢ ယွၤမ့ၢ်ပှၤမၤဃူမၤဖိးတၢ်ထဲတဂၤဧိၤ လၢပနာ်န့ၢ်အီၤသ့တဂၤန့ၣ်လီၤ. ယိၤ ၁၆:၃၃ အပူၤန့ၣ် ကစၢ်ယ့ၣ်ရှူးစံးဝဲကဆှီဒီဖိ “လၢယပူၤ… သုကအိၣ်ဒီး တၢ်ဃူတၢ်ဖိးန့ၣ်လီၤ.” ပအိၣ်ဒီးတၢ်ဃူတၢ်ဖိး လၢယ့ၣ်ရှူးအပူၤ, ဒီးဖဲပမၤသကိးတၢ်ဒီး ယွၤမၤဃူမၤဖိးတၢ် အတၢ်မၤအပူၤန့ၣ်ဒီး, ထဲဒၣ်ယွၤမၤဘၣ်လိာ်ဘၣ်စးက့ၤတၢ်, ဒီးမၤသီထီၣ်က့ၤတၢ်န့ၣ်, ဒုးအိၣ်ထီၣ်တၢ်ဃူတၢ်ဖိးနီၢ်နီၢ်သ့ဝဲန့ၣ်လီၤ.

ခရံာ်စံးဘၣ်ပှၤလၢ ပဃ့ၢ်ပူၤဖျဲးပသးလၢ တၢ်သဘံၣ်ဘူၣ်တသ့ဘၣ်. ကစၢ်ယ့ၣ်ရှူးစံးဝဲ, “လၢဟီၣ်ခိၣ်အံၤ, သုကဘၣ်တၢ်ဖှီၣ်လီၤ.” တၢ်သဘံၣ်ဘူၣ်ကအိၣ်အါမးန့ၣ်လီၤ. အဆၢဖိ ၃၃ န့ၣ် စံးကဒီးဝဲ “ဘၣ်ဆၣ်ဒီး ပာ်သုသးခူတလ့ၢ်တက့ၢ်. ယမၤနၢၤလံ ဟီၣ်ခိၣ်လံ” န့ၣ်လီၤ. ဖဲပတၢ်ဂုာ်ကျဲးစၢၤတဖၣ် ကဖျါလၢ အဘျုးတအိၣ်တလီၢ်လီၢ် ဘၣ်ဆၣ်, အဆၢဖိ ၂၇ ပာ်ဖျါဝဲ ကစၢ်ယွၤလၢပအဲၣ်အီၤတဂၤန့ၣ် ဒုးအိၣ်ထီၣ် တၢ်မုာ်တၢ်ပၢၤ ဖဲဟီၣ်ခိၣ်လၢအလီၤမုၢ်လီၤဖးအံၤအပူၤန့ၣ်လီၤ.