ကၠီဒၢၣ် စံးဝဲဒၣ်လၢ “ယသ့ၣ်ညါ ကျဲအိၣ်ဝဲထဲတဘိ ဒ်သိးယကမၤန့ၢ်မၤနၢၤတၢ်အဂီၢ်, ဒီးမ့ၢ်ဒၣ်ယကဘၣ် သးပ့ၤနီၣ်ကွံာ် ယဟံၣ်ယဃီဒီးယမါ, ယဖိခွါဒီးယဖိမုၣ်န့ၣ်လီၤ,” “ဖျါလၢ ယမၤတထီၣ်ဘးဘၣ်န့ၣ်လီၤ. အဝဲသ့ၣ် ဘၣ်တၢ်ပိၤအီၤလၢ ယသးအညၣ်ဒီးယနီၢ်သးတပူၤဃီန့ၣ်လီၤ.” ဘၣ်အိၣ်ဆိးထဲတဂၤဧိၤလၢ တၢ်လီၢ်လၢ ပှၤတအိၣ်နီတဂၤ, ကၠီဒၢၣ် နုာ်လီၤပြၢတၢ်လၢ ကွဲၤထံၣ်ဟူတၢ်ရဲၣ်တၢ်ကျဲၤလၢ ပှၤဘၣ်မၤအီၤနီၢ်နီၢ်ကီၢ်တခါန့ၣ်လီၤ. ပှၤပြၢတၢ်ဖိတဖၣ် ဒိးန့ၢ် ပိးလီတဆံးတက့ၢ်, ဒီးတသ့ဖဲအသ့ ကဘၣ်အိၣ်မူအိၣ်ဂဲၤဝဲအယံာ်ကတၢၢ်အဂီၢ်န့ၣ်လီၤ. ကဃ့ဟးထီၣ်ဝဲလၢ တၢ်ပြၢအံၤအဂီၢ် တၢ်လၢအမၤဆူၣ်ဆီၣ်သနံးအီၤန့ၣ်, တမ့ၢ်လၢ တၤသူတဖၣ်, တၢ်ခုၣ်နးနးကလဲာ်, တၢ်ဘၣ်ဒိဘၣ်ထံးဒီး, တၢ်သၣ်ဝံၤလီၤဒိအဃိဘၣ်. မ့ၢ်လၢဘၣ်အိၣ်ထဲတဂၤ အတၢ်သးလီၤဘှံးလီၤဘှါ နးနးဖှီၣ်ဖှီၣ်, ဒီးသးလၢအဆၢအိၣ်ဆိးက့ၤဒီးအဟံၣ်ဖိဃီဖိအဃိန့ၣ်လီၤ.
ဘၣ်သ့ၣ်သ့ၣ် ပကအိၣ်ဒီး တၢ်သ့ကူၣ်ဘၣ်ခဲလၢာ်လၢအလိၣ်ဝဲတဖၣ် ဒ်သိးပကအိၣ်မူအိၣ်ဂဲၤလၢပှၢ်မုၢ်ကနၢအပူၤဘၣ်ဆၣ်, တၢ်အိၣ်လီၤဖးဒီး ပပှၤအတဝၢ မ့ၢ်ကျဲလီၤတံၢ်တဘိလၢ ပတမၤနၢၤတၢ်အဂီၢ်န့ၣ်လီၤ. စံၣ်တဲၤတဲ ၄:၉-၁၀ အပူၤန့ၣ် ပှၤကူၣ်သ့လၢအကွဲးလံာ်စံၣ်တဲၤတဲလီၤတၢ်တဂၤအံၤ စံးဝဲဒၣ်, “ပှၤခံဂၤ ဂ့ၤန့ၢ် ပှၤတဂၤတက့ၢ်လီၤ… တဂၤမ့ၢ်လီၤဃံၤဒီး, ပှၤတဂၤ ကဝံၣ်ဆၢထၢၣ်သကကိးလီၤ” န့ၣ်လီၤ. တၢ်ခဲလၢာ်သဘံၣ်ဘုၣ် ခံၣ်ခူၣ်အသးအပူၤဒၣ်လဲာ်, ပကဂုၤထီၣ်ပသီထီၣ်အဂီၢ် ပပှၤအတဝၢလၢ အမၤလၤကပီၤခရံာ်န့ၣ် တအိၣ်တသ့ဘၣ်န့ၣ်လီၤ. ခီဖျိလၢပကစၢ်ဒၣ်ဝဲ ပမ့ၢ်ဂုာ်ကျဲးစၢၤမၤနၢၤ တၢ်လ့ပစီတဖၣ်လၢ ဟီၣ်ခိၣ်တဘ့ၣ်အံၤန့ၣ် တမ့ၢ်ပကအိၣ်ဒီး ခွဲးယာ်လၢ ပကတြီဆၢ, ခီၣ်ဆၢအီၤန့ၣ်ဘၣ်. အဆၢဖိ ၈ စံးဝဲလၢ ပှၤတဂၤဂၤ မ့ၢ်ထုးဂံၢ်ထုးဘါထဲတဂၤဧိၤန့ၣ် မ့ၢ်မၤတၢ်ကလီကလီန့ၣ်လီၤ. အဆၢဖိ ၁၁-၁၂ ဒုးသ့ၣ်ညါပှၤလၢ ပှၤအတဝၢ မ့ၢ်တအိၣ်ဘၣ်န့ၣ်, တၢ်ဂ့ၢ်ကီ ကလီၤဘၣ်ပှၤ ညီကဒၣ်ဖိန့ၣ်လီၤ. တမ့ၢ်ဒ်သိးလုၢ်ပျံၤတဘိဘၣ်, “ပျံၤပိၤအသး သၢပလွံတဘိန့ၣ် ပှၤတမၤတဲာ်ဘၣ်ချ့သဒံးဘၣ်” န့ၣ်လီၤ. ပပှၤတဝၢလၢအလီၤအဲၣ်လီၤကွံ, ဒီးသန့ၤ အသးလၢခရံာ်အတၢ်ဟ့ၣ်န့ၣ် တမ့ၢ်ထဲအတၢ်ဟ့ၣ်ဂံၢ်ဟ့ၣ်ဘါတၢ်ဘၣ် မ့မ့ၢ်လၢ တၢ်အိၣ်အသးအကီအခဲအပူၤဒၣ်လဲာ် ဟ့ၣ်ဆူၣ်ထီၣ်ပဂံၢ်ပဘါ လၢပကဂုၤထီၣ် ပသီထီၣ်အဂီၢ်န့ၣ်လီၤ. ပလိၣ်ဘၣ်ပသးကဒဲကဒဲန့ၣ်လီၤ.
