လၢတၢ်ဆိကမိၣ်ဒံဝ့ၤဒံဝီၤအကတီၢ်, စါရၤ တ့ၢ်လီၤဘၣ်ဝဲ အတၢ်မျၢ်ပလဲပသံးဖိ, လၢအမ့ၢ်အတၢ်ဖျီအတၢ်ပနီၣ်ဖိန့ၣ်ဆူ ပှၤလၢအဟံၣ်အဃီတအိၣ်တဂၤ ဃ့အီၣ်တၢ်လီခီအပူၤန့ၣ် အဝဲတသ့ၣ်ညါထွဲဝဲဘၣ်န့ၣ်လီၤ. ပှၤဟးဃ့အီၣ်တၢ် ဘ့လ့ၣ် ရ့ (Billy Ray) ဒိးန့ၢ်ဝဲဒၣ် ပသံးဖိအံၤ, ဒီးဃုသ့ၣ်ညါ ပသံးဖိအံၤအလုၢ်အပှ့ၤ, ဒီးပာ်လီၤအသးလၢ ကဆါဝဲဒၣ်န့ၣ်လီၤ. ဘၣ်ဆၣ်, အဝဲဃုထၢ တၢ်အိၣ်မူအတီအလိၤ, ဒီးစှၤသီပူၤကွံာ်ဝံၤ, ဖဲ စါရၤ ဟဲက့ၤလူၤကွၢ်ဃုက့ၤအပသံးဖိန့ၣ်ဒီး, ဟ့ၣ်ကဒါက့ၤဝဲဒၣ်န့ၣ်လီၤ. ဒ်သိးပှၤကဟ့ၣ်မၤစၢၤ ဘ့လၣ် ရ့ အဂီၢ်, စါရၤဒီးအဝၤ ဒုးအိၣ်ထီၣ်ဝဲဒၣ် စ့မိၢ်ပှၢ်, လၢအဒုးအိၣ်ထီၣ် ပှၤဂုၤပှၤဂၤအတၢ်အဲၣ်တၢ်သးအိၣ်အတၢ်ဟ့ၣ်တဖၣ်န့ၣ်လီၤ. ဘ့လ့ၣ် ရ့ ဃုထံၣ်န့ၢ် ကျိာ်စ့, ဒီးတၢ်ဟ့ၣ်ကူၣ်တဖၣ် လၢအဖိးမံဒီးသဲစး, ဝံၤအလီၢ်ခံန့ၣ်, ပှ့ၤန့ၢ်ဝဲဒၣ် ဟံၣ်တဖျၢၣ်န့ၣ်လီၤ. ဘ့လ့ၣ် ထံၣ်လိာ်က့ၤအသးဒီး အဟံၣ်ဖိဃီဖိလၢ အလီၤမၢ်ယံာ်တ့ၢ်လံတဖၣ်န့ၣ်လီၤ.

ပမ့ၢ်အိၣ်မူအိၣ်ဂဲၤလၢ တၢ်သကဲာ်ပဝး တီတီလိၤလိၤန့ၣ် ကမ့ၢ်ဝဲဒၣ် ပမၤမံသူၣ်မံသးကစၢ်ယွၤ, ဒီးကထိၣ်ဟူးထိၣ်ဂဲၤထီၣ်ပှၤဂုၤပှၤဂၤစ့ၢ်ကီးန့ၣ်လီၤ. ယွၤ ဘၣ်သူၣ်ဘၣ်သးလၢ အတၢ်အိၣ်မူတီတီလိၤလိၤအဂ့ၢ်န့ၣ် စီၤပၤရှလိၤမိၤ ပာ်ဖျါဝဲလၢ “ပျုၤကတိၤတၢ်ကဘျံးကဘျၣ်န့ၣ် မ့ၢ်တၢ်သးဘၣ်အၢ လၢယွၤအမဲာ်ညါလီၤ. မ့မ့ၢ်ပှၤလၢအမၤ တၢ်မ့ၢ်တၢ်တီန့ၣ် ဘၣ်အသး” (ကတိၤ ၁၂:၂၂) န့ၣ်လီၤ. ဒ်သိးကပာ်ဖျါထီၣ် ယွၤအတၢ်ထံၣ်, ဘၣ်ဃးဒီး တၢ်တတီတလိၤအဂ့ၢ်န့ၣ် စီၤပၤရှလိၤမိၤ စူးကါတၢ်ကတိၤအဆူၣ်, ကစၢ်ယွၤ “သးဘၣ်အၢ” န့ၣ်လီၤ. ဖဲယွၤအပှၤဂီၢ်မုၢ်တဖၣ် စံးကတိၤကဘျံးကဘျၣ်တၢ် (မ့) “တၢ်လီတၢ်ဝ့ၤအိၣ်ဝဲလၢပှၤလၢအကူၣ်တၢ်အၢအသးကံၢ်ပူၤ” (:၂၀) န့ၣ် မ့ၢ်တၢ်ခီၣ်ရီာ်ယွၤ, ဒီးထီဒါလိာ်အသးဒီးကစၢ်ယွၤ အသူးအသ့ၣ်အကံၢ်အစီန့ၣ်လီၤ. မ့မ့ၢ်, ယွၤအပှၤဂီၢ်မုၢ်တဖၣ် မ့ၢ်စံးကတိၤတၢ်မ့ၢ်တၢ်တီ (:၁၉), ဒီးမ့ၢ်မၤတၢ်လၢ တၢ်သူၣ်တီသးရၤအပူၤန့ၣ်, ကဟဲစိာ် တၢ်သးခုလၢ ကစၢ်ယွၤအဂီၢ်န့ၣ်လီၤ. ပတၢ်မၤဂ့ၤမၤစၢၤ ပှၤဂုၤပှၤဂၤတဖၣ် မ့ၢ်အါန့ၢ်ဒံး ပစံးကတိၤတၢ်တီတီလိၤလိၤန့ၣ်ဒီး, ကမ့ၢ်တၢ်ဒုးနဲၣ်ဖျါထီၣ် ယွၤအကစၢ်ဒၣ်ဝဲ အသူးသ့ၣ်အကံၢ်အစီန့ၣ်လီၤ. လၢဟီၣ်ခိၣ်ချၢန့ၣ် ဖျါလၢတၢ်လီၤတၢ်ဝ့ၤတဖၣ် မၤန့ၢ်တၢ်ကဲဘျုးအါအါကလဲာ်ဘၣ်ဆၣ်, ပတၢ်အိၣ်မူသကဲာ်ပဝးအတီအလိၤန့ၣ် မ့ၢ်တၢ်လၢ “အဘၣ်ယွၤအသး” (:၂၂) န့ၣ်လီၤ.

မ့ၢ်လၢ ကစၢ်ယွၤ မၤစၢၤပှၤအဃိ, မ်ပကအၢၣ်လီၤပသး, ဒီးပကအိၣ်မူလၢ တၢ်သကဲာ်ပဝးအတီအလိၤန့ၣ်တက့ၢ်. ပှၤဟီၣ်ခိၣ်ဖိ မ့ၢ်တပာ်သူၣ်ပာ်သးပှၤဒၣ်လဲၣ်, ပမ့ၢ်လဲၤတၢ်လၢ အကျိၤအကျဲတဖၣ်အပူၤန့ၣ် ကစၢ်ယွၤ မုာ်လၤသးခုဝဲဒၣ်န့ၣ်လီၤ.