ဖဲ အဲလ်စံၣ် (Elsie) တူၢ်ဘၣ် ခဲစၢၣ်တၢ်ဆါန့ၣ်ဒီး, အိၣ်ကတဲာ်ကတီၤပာ်အသး လၢအတၢ်က့ၤဆူဟံၣ်လၢမူခိၣ် ဒ်သိးကအိၣ်ဆိးဒီးကစၢ်ယ့ၣ်ရှူးအဂီၢ်န့ၣ်လီၤ. အဝဲအိၣ်ဆူၣ်ထီၣ်က့ၤဘၣ်ဆၣ်, ခီဖျိလၢ တၢ်ဆါအဃိ အဝဲဟူးဝးသုးအသးဆူန့ၣ်ဆူအံၤ တန့ၢ်လၢၤဘၣ်. အဲလ်စံၣ် ဆိကမိၣ်စ့ၢ်ကီးဝဲလၢ ဘၣ်မနုၤအဃိ ကစၢ်ယွၤ ဒုးမူဒံးအီၤလဲၣ်အဂ့ၢ်န့ၣ်လီၤ. အဝဲသံကွၢ် ကစၢ်ယွၤလၢ “ယမၤတၢ်အဂ့ၤမနုၤတမံၤကသ့လဲၣ်, ယကျိၣ်စ့ဒီးယတၤလၣ် စ့ၢ်ကီး တအိၣ်အါအါဘၣ်. ဒီးယဟးတန့ၢ်ဘၣ်. လၢနဂီၢ် မ့ၢ်ယကဲဘျုးကသ့ဒ်လဲၣ်.”
လၢတၢ်ကမၤဂ့ၤဘၣ်ပှၤဂၤ, လီၤဆီဒၣ်တၢ် ပှၤလၢဟဲမၤကဆှဲကဆှီအဟံၣ် လၢအမ့ၢ် ပှၤအိၣ်ဟဲလၢထံဂၤကီၢ်ဂၤ, ပှၤသုးလီၢ်သုးကျဲတဖၣ်အဂီၢ် အဲလ်စံၣ် ဃုထံၣ်န့ၢ်ကျိၤကျဲ ဆံးဆံးယိယိဖိန့ၣ်လီၤ. ဖဲလၢအဝဲထံၣ်ပှၤသ့ၣ်တဖၣ်အံၤ တဘျီလၢ်လၢ်န့ၣ် ဟ့ၣ်လီၤဝဲ ကျိၣ်စ့တဆံးတက့ၢ် လၢအဝဲသ့ၣ်အဂီၢ်န့ၣ်လီၤ. ကျိာ်စ့ဖိတဖၣ်အံၤ န့ၣ်မ့ၢ်တၢ်အဆံးအစှၤဘၣ်ဆၣ်, ပှၤမၤတၢ်ဖိတဖၣ်အဂီၢ် ကဲထီၣ်တၢ်မၤစၢၤလၢ အမၤလၢပှဲၤ အဝဲသ့ၣ်အတၢ်လိၣ်တဖၣ် ကထီၣ်ဘးအဂီၢ်န့ၣ်လီၤ. အဲလ်စံၣ် မၤဝဲဒ်သိးအံၤအဃိဒီး, ထံၣ်ဝဲဒၣ်လၢ ကစၢ်ယွၤ ကတဲာ်ကတီၤန့ၢ် တၢ်လၢအဂီၢ်- အတံၤသကိး, ဒီးအဘူးအတံၢ် တဖၣ်, ဟ့ၣ်အီၤတၢ်ဟ့ၣ်, ဒီးကျိာ်စ့တဖၣ်, လၢတၢ်ကမၤစၢၤထွဲ ပှၤဂုၤပှၤဂၤအဂီၢ်န့ၣ်လီၤ.
ဖဲ အဲလ်စံၣ် ဒုးသ့ၣ်ညါယၤ အဂ့ၢ်အကျိၤန့ၣ်ဒီး, လၢယသးအတၢ်ဆိကမိၣ်အပူၤန့ၣ် ကစၢ်ယွၤအတၢ်ကိးလၢ ပကအဲၣ်ပှၤဂၤအဂီၢ်, ဒ် ၁ ယိၤ ၄:၁၉ ပာ်ဖျါဝဲ “ပအဲၣ်တၢ်ကွံတၢ်လီၤ. အဂ့ၢ်ဒ်အံၤ, အဝဲဒၣ် အဲၣ်ဆိတၢ်လီၤ” အသိး, တကတီၢ်ဃီန့ၣ်, တၢ်မ့ၢ်တၢ်တီတမံၤလၢ လံာ်မၤတၢ် ၂၀:၃၅ အပူၤ, ဒုးသ့ၣ်နီၣ်ထီၣ်က့ၤပှၤ “ဟ့ၣ်တၢ်န့ၣ် ဘၣ်ဆိၣ်ဂ့ၤအါန့ၢ်ဒံးဒိးန့ၢ်တၢ်တက့ၢ်လီၤ” အသိး, အဲလ်စ့ၣ် အိၣ်မူဂဲၤလိဝဲနီၢ်နီၢ်န့ၣ်လီၤ.
မ့ၢ်လၢ အဲလ်စံၣ် ဒိးန့ၢ်ဘၣ်တၢ်အဃိ, ဟ့ၣ်ဘၣ်တၢ်, ဒီးဒ်အဟ့ၣ်ဘၣ်တၢ်အသိးန့ၣ်, တၢ်န့ၢ်ဂံၢ်န့ၢ်ဘါက့ၤဝဲဒၣ်န့ၣ်လီၤ. ဘၣ်ဆၣ် သးလၢအအဲၣ်တၢ်, သးလၢအသ့စံးဘျုးတၢ်, ဒီးတၢ်အိၣ်ကတဲာ်ကတီၤပာ်သးလၢ ကမၤဂ့ၤမၤစၢၤတၢ် ခီဖျိလၢတၢ်အိၣ်ဒီးအီၤတဖၣ် အဃိဒီး- ကစၢ်ယွၤ ဂံၢ်အါထီၣ်တၢ်ဆိၣ်ဂ့ၤ ခီဖျိလၢဟ့ၣ်တၢ်ဒီးဒိးန့ၢ်တၢ် အကဝီၤဂ့ၤဝါအပူၤန့ၣ်လီၤ. မ်ပကဃ့ယွၤလၢ ကဟ့ၣ်လီၤပှၤ သးလၢအစံးဘျုးတၢ်, ဒီးတၢ်သးအိၣ်ဟ့ၣ်ညီတၢ် လၢကစၢ်ယွၤအတၢ်နဲၣ်ဆှၢပှၤအပူၤန့ၣ်တက့ၢ်.
