တၢ်အိၣ်ဖှိၣ်သရၣ် ဒၢ်မ့ယၢၣ် (Damian) ရဲၣ်ကျဲၤဝဲလၢ ကလဲၤဆူတၢ်ဆါဟံၣ်, ဒ်သိးကထံၣ်လိာ်အိၣ်သကိး ပှၤဆါခံဂၤ, ဘူးထီၣ်လၢအကသံတဖၣ်, လၢအဃုထၢတ့ၢ် အသး သမူအကျဲဒၣ်ဝဲန့ၣ်လီၤ.လၢတၢ်ဆါဟံၣ်တဖျၢၣ်န့ၣ် ပိာ်မုၣ်ပှၤဆါလၢ အဟံၣ်ဖိဃီဖိ တဖၣ် အဲၣ်ဘၣ်အီၤ အိၣ်ဝဲဒၣ်န့ၣ်လီၤ. အတၢ်ဖံးတၢ်မၤမ့ၢ် တၢ်ခ့တၢ်ပှၤအတၢ်မၤလၢ အတဃုအကစၢ်ဒၣ်ဝဲအဘျုးအဃိ, ပှၤအါဂၤ အဲၣ်ဘၣ်အီၤန့ၣ်လီၤ. ပှၤစူၢ်က့ၤနာ်က့ၤ ကစၢ်ယ့ၣ်ရှူးတဖၣ် ဟဲအိၣ်ဝးတရံးအီၤ, ဒီးဘါသကိးယွၤ, ထုကဖၣ်သကိးတၢ်အဃိ, အဒၢးပူၤန့ၣ်အိၣ်ပှဲၤဒီးတၢ်မုၢ်လၢ်န့ၣ်လီၤ. တၢ်ဆါဟံၣ်အဂၤတဖျၢၣ်န့ၣ်, သရၣ်ဒၢ်မ့ယၢၣ် အတၢ်အိၣ်ဖှိၣ်ဖိအကျါတဂၤ အဘူးအတံၢ် ဆါဆိးက့ ဒီးဘူးကသံတ့ၢ်မးန့ၣ်လီၤ. ပှၤတဂၤအံၤ အသူၣ်ကိၤအသးကိၤတၢ်န့ၣ် ဆှၢအီၤဆူ တၢ်အိၣ်မူအကီအခဲ, ဒီးခီဖျိလၢအ ဆၢတဲာ်ကမၣ်တၢ်, ဒီးမၤကမၣ်တၢ်တဖၣ်အဃိ, အပှၤဟံၣ်ဖိဃီဖိတဖၣ် အတၢ်အိၣ်မူအိၣ်ဂဲၤန့ၣ် တၢ်ဘၣ်လိာ်ဘၣ်စးတအိၣ်လၢၤဘၣ်. တၢ်အိၣ်အသး, တၢ်မၤအသးအတၢ်လီၤဆီတဖၣ်အံၤ ပာ်ဖျါထီၣ် ပှၤခံဂၤ အိၣ်မူတ့ၢ်ဝဲ အတၢ်အိၣ်မူဒ်လဲၣ်န့ၣ်လီၤ.
ပှၤကွၢ်ထံဆိကမိၣ်တၢ် ဘၣ်ထွဲဒီးအတၢ်လဲၤကျဲအခိၣ်လိၤဆူလဲၣ်န့ၣ် မ့ၢ်လီၤတိၢ်န့ၣ်ဒီး အဝဲသ့ၣ်ကဘၣ်ကွၢ်ဆၢၣ်မဲာ်ဒီး တၢ်တမုာ်တလၤ, တၢ်လၢတအဲၣ်ဒိးဆၢထံၣ်ဝဲ, ဒီးတၢ်လီၢ်အိၣ်သယုၢ်သညိတဖၣ်ထီဘိန့ၣ်လီၤ. ကတိၤဒိ ၁၄: ၁၂ ပာ်ဖျါဝဲ, “ကျဲလၢအလိၤဝဲ လၢပှၤကညီအမဲာ်ညါန့ၣ်အိၣ်ဝဲ, မ့မ့ၢ် အကတၢၢ်မ့ၢ်တၢ်သံအကျဲလီၤ” န့ၣ်လီၤ. ပှၢ်မ့ၢ်ဂ့ၤစၢ်မ့ၢ်ဂ့ၤ, ဆါဆိးက့ဂ့ၤအိၣ်ဆူၣ်ဂ့ၤ, ထူးတီၤဂ့ၤ ဖှီၣ်ယာ်ဂ့ၤ- ပကသမံသမိးက့ၤ ပကျဲဧိၤပကပိၤဧိၤအဂီၢ် တၢ်ဆၢကတီၢ်တစဲၤခံဒံးဘၣ်. ပကျဲကနဲၣ်ဆှၢပှၤဆူလဲၣ်. ကမ့ၢ် ကျဲလၢအမၤလၤကပီၤယွၤဧၣ်. ကမၤစၢၤပှၤ, မ့တမ့ၢ် ကမၤကီမၤခဲပှၤဂၤဧၣ်, ကမ့ၢ်ကျဲ အဂ့ၤကတၢၢ်တဘိလၢ ပှၤစူၢ်က့ၤနာ်က့ၤ ကစၢ်ယ့ၣ်ရှူးခရံာ်တဖၣ်အဂီၢ်ဧၣ်.
တၢ်ဃုထၢတဖၣ်န့ၣ် မ့ၢ်တၢ်လၢအကါဒိၣ်န့ၣ်လီၤ. ဒီးကစၢ်ယွၤအိၣ်လၢမူခိၣ်တဂၤ ကမၤစၢၤပှၤ ဒ်သိးပကဃုထၢ ကျဲအဂ့ၤကတၢၢ်တဘိ ဒ်ပဃၣ်ပသးဆူကစၢ်ယွၤအအိၣ် ခီဖျိအဖိခွါကစၢ်ယ့ၣ်ရှူး, လၢ မးသဲ ၁၁:၂၈ အပူၤန့ၣ် စံးဘၣ်ပှၤ, “ဟဲဆူယအိၣ်…… ဒီးယကဒုးအိၣ်ဘှံးသု” န့ၣ်လီၤ.
