၂၀၁၇ နံၣ် တၢ်ဂီၤမူအဖုၣ်တခါ ဒုးနဲၣ်ဖျါထီၣ် ပၢ်တဂၤ မၤနၢၤမၤမုာ်ထီၣ်အဖိခွါ အိၣ်ထဲခံလါတဂၤ လၢဆဲးကသံၣ်ဒီတဒၢတၢ်ဆါအဆၢကတီၢ်, မ့ၢ်တၢ်ဂီၤမူလၢ အထုးန့ၢ်ထံကီၢ်တဖၣ်အသး, ဒီးမ့ၢ်တၢ်လၢအပာ်ဖျါစ့ၢ်ကီး ပၢ်အတၢ်အဲၣ်လၢအဖိအလိၤန့ၣ်လီၤ. ဖဲသရၣ်မုၣ်ကွၢ်ပှၤဆါ ဆဲးန့ၢ်ဖိသၣ်အံၤ အကသံၣ်ဖီၣ်ဝံၤန့ၣ်ဒီး ပၢ်တဂၤအံၤ လၢတၢ်အဲၣ်အပူၤ စိာ်ထီၣ်အဖိ ထိးဘူးဝဲဒီးအဘိးပၤ, ဒီးလၢစှၤစဲးကီာ် အတီၢ်ဖိန့ၣ် ဖိသၣ်ပိာ်ခွါ ဆိကတီၢ်ဝဲအတၢ်ဟီၣ်တၢ်ယၢၤန့ၣ်လီၤ. တၢ်မၤမံသူၣ်မံသးပှၤအါန့ၢ်ဒံး မိၢ်ပၢ်အတၢ်ကဟုကယာ် အတၢ်အဲၣ်န့ၣ် တအိၣ်ဝဲဒၣ်ဘၣ်.
လၢလံာ်စီဆှံအပူၤ, တၢ်ပာ်ဖျါဃံလၤ အိၣ်ဝဲအါတီၤလၢ အပာ်ဖျါယွၤ, ဒ်မိၢ်ပၢ်လၢအဲၣ်တၢ်, ဒီးက့ၢ်ဂီၤဒိတဖၣ် လၢယၢၤထီၣ် ယွၤအတၢ်အဲၣ်ဒိၣ်လၢ အဖိဆံးတဖၣ် အဂီၢ်န့ၣ်လီၤ. ဖဲဘီမုၢ်လီၤဖးဝံၤ ဝံဟိၤရှ့ ဒိးန့ၢ်တၢ်ကစီၣ် ဒ်သိးကဘၣ်ရၤလီၤဝဲဆူ ပှၤအံၣ်စရ့လးဖိ အိၣ်ဆိးလၢ အံၣ်စရ့လးကလံၤစိးထံကီၢ်အဂီၢ်န့ၣ်လီၤ. ဝံကိးထီၣ်ပှၤအံၣ်စရ့လးဖိတဖၣ် ကဟဲက့ၤရ့လိာ်သးအသးဒီးယွၤန့ၣ်လီၤ. ဟိၤရှ့ဒုးသ့ၣ်နီၣ် အံၣ်စရ့လးဖိတဖၣ်လၢ ယွၤအတၢ်အဲၣ်လၢ အဝဲသ့ၣ်အဂီၢ် ပာ်ဖျါထီၣ်ယွၤ ဒ်အမ့ၢ် ပၢ်လၢသူၣ်အိၣ်သးအိၣ်တၢ် ကစုဒုတဂၤန့ၣ်လီၤ. ဟိၤရှ့ ၁၁:၁ အပူၤန့ၣ်ပာ်ဖျါဝဲ “လၢအံၣ်စရ့လးမ့ၢ်ဖိသၣ်န့ၣ် ယအဲၣ်အီၤ,” ဒီးအဆၢဖိ ၄ (ခ့ခါ) န့ၣ်ပကထံၣ်ဘၣ် “ယထၢထီၣ်အဝဲသ့ၣ် ဒီးစိာ်ထီၣ်အီၤလၢယဘိးပၤ” န့ၣ်လီၤ.
ကစၢ်ယွၤ အတၢ်အၢၣ်လီၤလၢ အကအဲၣ်ကဟုကယာ်ပှၤ, လၢအမၤဂၢၢ်မၤကျၢၤတၢ်တမံၤဃီအံၤ မ့ၢ်ဝဲတီဝဲလၢပဂီၢ်စ့ၢ်ကီးန့ၣ်လီၤ. ပဃုအတၢ်အဲၣ် တၢ်ကဟုကယာ်ပှၤ ဖဲအကတီၢ်လၢ ပဂ့ၢ်လိာ်ထီဒါ အတၢ်အဲၣ်ဝံၤ အကတီၢ်မ့ၢ်ဂ့ၤ, ဖဲပဆူးဆါဆိးက့, ဒီးလၢပတၢ်အိၣ်မူအပူၤ ပတူၢ်ဘၣ်တၢ်နးတၢ်ဖှီၣ်အဃိမ့ၢ်ဂ့ၤ, ၁ ယိၤ ၃:၁ စံးဘၣ်ပှၤလၢ တၢ်ကကိးပှၤလၢယွၤအဖိ, ဒီး ၂ ကရံၣ် ၁:၃-၄ ပာ်ဖျါဝဲ, အစုလၢကမၤမုာ်ပှၤ တဖၣ်အိးထီၣ်အသး, ဒ်သိးကတူၢ်လိာ်မုာ်ပှၤအဂီၢ်န့ၣ်လီၤ.
