ယတကြၢးတူၢ်လိာ်တၢ်ကလဲၤဟးဃ့ၢ်လိာ်သကိးဒီး ဘရၢယၢၣ် (Brian) န့ၣ်ဘၣ်. ခဲကနံၣ်အံၤ, ယအိၣ်လၢထံဂၤကီၢ်ဂၤအဃိ ယကဘၣ် လဲၤတၢ်ဖဲလဲၣ်, ပတၢ်လဲၤဃ့ၢ်တၢ်ကယံၤထဲလဲၣ်, ဒီးတၢ်လီၢ်တၢ်ကျဲထံသးကီၢ်သးတဖၣ်အိၣ်ဒ်လဲၣ် ယတသ့ၣ်ညါဘၣ်န့ၣ်လီၤ. တကးဒ်ဘၣ်န့ၣ် အဝဲမ့ၢ် ပှၤလၢဃ့ၢ်တၢ်ချ့ ဒီးဖဲယလူၤဃ့ၢ်ပိာ်အခံန့ၣ် မ့ၢ်ယခီၣ်ကလီၤတလံာ်ဒီးကမၤဘၣ်ဒိဘၣ်ထံးယခီၣ်ဒ့အဆၢဧါန့ၣ် ယတသ့ၣ်ညါဘၣ်န့ၣ်လီၤ. မ့ၢ်လၢ ဘရၢယၢၣ် သ့ၣ်ညါကျဲအဃိ အိၣ်ဒၣ်ထဲယကဘၣ်နာ်အီၤတမံၤဧိၤန့ၣ်လီၤ. ဖဲပစးထီၣ်ဃ့ၢ် အဆၢကတီၢ် ယသးဘၣ်ကိၢ်ဘၣ်ဂီၤအါထီၣ်ဝဲန့ၣ်လီၤ. သ့ၣ်ပှၢ်ပူၤ ကျဲလၢပဃ့ၢ်န့ၣ်ကီခဲဝဲ ဒီးတဂ့ၤတဘျ့, တလိၤတဘျၢဘၣ်န့ၣ်လီၤ. ဘရၢယၢၣ်ဃ့ၢ်ဝဲလၢတၢ်မဲာ်ညါဒီး ကွၢ်တရံးယၤတဘျီတဘျီ ဒီးဟ့ၣ်ပလီၢ်ယၤ တၢ်လဲၤကျဲအကီအခဲ လၢအကဟဲလၢတၢ်မဲာ်ညါတဖၣ်အဃိ ယဘၣ်စံးဘျုးအီၤန့ၣ်လီၤ.

လံာ်စီဆှံအပူၤ- စီၤအၤဘြၤဟၣ်အတၢ်လဲၤဆူကီၢ်ကနၤဧၣ်, ပှၤအံၣ်စရ့လးဖိတဖၣ် လၢပှၢ်မုၢ်ကနၢအတၢ်လဲၤခီဖျိ, ဒီးကစၢ်ယ့ၣ်ရှူး အပျဲၢ်အဘီၣ်တဖၣ် အတၢ်လဲၤစံၣ်တဲၤတဲလီၤတၢ်သးခုကစီၣ်, တၢ်ဂ့ၢ်တဖၣ်အံၤ ဘၣ်သ့ၣ်သ့ၣ် အဝဲသ့ၣ်အသးကတူၢ်ဘၣ်, ဖဲလၢအတုၤ တၢ်လီၢ်တၢ်ကျဲလၢတသ့ၣ်ညါဝဲတဖၣ်န့ၣ်လီၤ. အဝဲသ့ၣ်တဖၣ် သ့ၣ်ညါဒၣ်ထဲ တၢ်လဲၤတထံၣ်အံၤန့ၣ် ကနး, ကကီခဲ, ဒီးတၢ်အဂုၤအဂၤ မနုၤကအိၣ်လဲၣ်, တသ့ၣ်ညါတၢ်နီၤတမံၤဘၣ်န့ၣ်လီၤ. ဘၣ်ဆၣ်အဝဲသ့ၣ်အိၣ်ဒီး ပှၤလၢအသ့ၣ်ညါကျဲ ဒီးဆူညါတၢ်ကမၤအသးတဖၣ်, ပှၤလၢကနဲၣ်ဆှၢ အဝဲသ့ၣ်န့ၣ်လီၤ. ပှၤသ့ၣ်တဖၣ်အံၤကဘၣ်နာ်ဝဲလၢ ကစၢ်ယွၤကဟ့ၣ်တၢ်ဂံၢ်တၢ်ဘါ ဒ်သိးကလဲၤခီဖျိန့ၢ်တၢ်ကီတၢ်ခဲ အဂီၢ် ဒီးကစၢ်ယွၤ ကကွၢ်ထွဲ, ကဟုကယာ်အဝဲသ့ၣ်န့ၣ်လီၤ. တၢ်ကအိၣ်ဟဲလၢအမဲာ်ညါတဖၣ်ယွၤသ့ၣ်ညါလီၤတံၢ်လီၤဆဲးအဃိ, အဝဲသ့ၣ်ပိာ် ယွၤအခံသ့ဝဲဒၣ်န့ၣ်လီၤ.

စီၤဒၤဝံးဘၣ်ဃ့ၢ်ပူၤဖျဲးအသးအဆၢကတီၢ်, တၢ်နာ်အဂၢၢ်အကျၢၤအံၤ မၤမုာ်ထီၣ်က့ၤအီၤန့ၣ်လီၤ. တၢ်လီၤတံၢ်လီၤဆဲးဒိၣ်ဒိၣ်မုၢ်မုၢ် တအိၣ်ဖျါလၢအဂီၢ်ဘၣ်ဆၣ်, စံး ၁၄၂း၃ အပူၤ စီၤဒၤဝံးစံးဘၣ်ယွၤ “တုၤတၢ်လုၣ်ဘၢယသးဒီး, နသ့ၣ်ညါယကျဲလီၤ” န့ၣ်လီၤ. လၢပတၢ်အိၣ်မူအပူၤ, အကတီၢ်တဖၣ်ကအိၣ်ဝဲဒၣ်လၢ ပကပျံၤတၢ်, ဘၣ်ယိၣ်တၢ် လၢခါဆူညါတၢ်ကမၤအသးတဖၣ်အဂီၢ်န့ၣ်လီၤ. ဘၣ်ဆၣ် ပကဘၣ်သ့ၣ်ညါထဲဒၣ်တၢ်တမံၤလၢ ပကစၢ်ယွၤမ့ၢ်ပှၤလၢအလဲၤတၢ်ဒီးပှၤ, သ့ၣ်ညါကျဲလၢပကဘၣ်လဲၤန့ၣ်လီၤ.