တၢ်လိာ်ကွဲ “ဘံး ဘ့း(စ)ဘီ” (Beep Baseball) န့ၣ် ပှၤလိၣ်ကွဲတၢ်ဖိတဖၣ် မ့ၢ်လၢအမဲာ်ချံတထံၣ်တၢ်အဃိ ကဘၣ်မၤဝဲတၢ်မနုၤလဲၣ်ဒီး ကဘၣ်လဲၤတၢ်ဖဲလဲၣ်အဂီၢ်န့ၣ် ဘၣ်ကနၣ်ဝဲဘ့း(စ)ဘီလၢအကလုၢ်သီၣ် ဖျၢၣ်သီၣ် ဒီးဘၣ်ဃ့ၢ်လဲၤဝဲဒၣ်ဆူ တၢ်ပာ်ပနီၣ်တၢ်လီၢ် လၢအကလုၢ်သီၣ်အလီၢ်န့ၣ်လီၤ. ပှၤဒိတီၢ်ဘ့း(စ)ဘီလၢအမဲာ်ချံ ဘၣ်တၢ်ဘိၣ်ဘံတံၢ်အီၤ (တၢ်မၤအံၤသန့ၤထီၣ်အသး လၢ အဝဲထံၣ်ဘၣ်တၢ်ထဲလဲၣ်), ဒီးပှၤကွံာ် ဘ့း(စ)ဘီ လၢအထံၣ်တၢ်တဂၤန့ၣ်ဘၣ်အိၣ်ဝဲတဖုဃီန့ၣ်လီၤ. ပှၤဒိတီၢ်ဘ့း(စ)ဘီတဂၤ မ့ၢ်တီၢ်ဖျိးဝဲ ဘ့း(စ)ဘီဖျၢၣ်သီၣ်န့ၣ်ဒီး ဘၣ်ဃ့ၢ်ဝဲဆူတၢ်ပာ်ပနီၣ်အလီၢ် လၢအကလုၢ်သီၣ်အိၣ်တၢ်အလီၢ်န့ၣ်လီၤ. အဝဲဃ့ၢ်ဝဲတချုးတုၤတၢ်ပာ်ပနီၣ်အလီၢ်, ပှၤမ့ၢ်ဖီၣ်န့ၢ် ဘ့း(စ)ဘီဖျၢၣ်န့ၣ်ဒီး ပှၤလၢအတီၢ်တၢ်တဂၤန့ၣ် ဘၣ်ဟးထီၣ်ဝဲလၢတၢ်လိာ်ကွဲန့ၣ်လီၤ. တချုးပှၤဖီၣ်န့ၢ်ဘၣ်ဘ့း(စ)ဘီဖျၢၣ်သီၣ်, အဝဲ မ့ၢ်လဲၤတုၤဆူတၢ်ပာ်ပနီၣ်အလီၢ် အဝဲကမၤန့ၢ်အမးလၢတၢ်ပြၢအဂီၢ်န့ၣ်လီၤ. ပှၤလိာ်ကွဲတၢ်ဖိတဂၤ ပာ်ဖျါထီၣ်အတၢ်လဲၤခီဖျိလၢ “ဖဲယဃ့ၢ်အဆၢကတီၢ် ယသးတူၢ်ဘၣ်တၢ်သဘျ့န့ၣ် ဘၣ်ယသးအမုာ်ကတၢၢ်လီၤ” န့ၣ်လီၤ. မ့ၢ်လၢအဝဲသ့ၣ်ညါ ကဘၣ်လဲၤတၢ်ကျဲ ဖျိဖျိဖျါဖျါဒီးလိၤလိၤအဃိန့ၣ်လီၤ.

လံာ်ဝံယရှါယၤ ၂၆း၇ အပူၤ စံးဘၣ်ပှၤ ကစၢ်ယွၤလၢအတီဝဲလိၤဝဲတဂၤန့ၣ် “ကမၤဃူပှၤတီအကျဲလီၤ” န့ၣ်လီၤ. ဝံစံၣ်တဲာ်တဲလီၤတၢ် အဆၢကတီၢ် မ့ၢ်လၢယွၤအပှၤဂီၢ်မုၢ်တဖၣ် တဒိကနၣ်ကစၢ်ယွၤအဃိ တူၢ်ဘၣ်ခီၣ်ဘၣ်ဝဲ ယွၤအတၢ်စံၣ်ညီၣ်ဘၣ်ဆၣ် ပှၤအံၣ်စရ့လးဖိတဖၣ် အတၢ်အိၣ်အသးဖျါလၢ လဲၤအသးဘျ့ဘျ့ဆှီဆှီန့ၣ်လီၤ. ဝံဟ့ၣ်ဂံၢ်ဟ့ၣ်ဘါပှၤဂီၢ်မုၢ်တဖၣ် ဒ်သိးကလဲၤတၢ်လၢ တၢ်နာ်ကစၢ်ယွၤ ဒီးတဒိကနၣ်ကစၢ်ယွၤအပူၤအဂီၢ်န့ၣ် ဘၣ်တဘျီဘျီ တၢ်လဲၤဒ်သိးအံၤန့ၣ် ကဲထီၣ်တၢ်ဂ့ၢ်ကီလၢ ပှၤဂီၢ်မုၢ်တဖၣ်အဂီၢ်ဘၣ်ဆၣ် မ့ၢ်ကျဲအတီအလိၤ လၢပှၤဂီၢ်မုၢ်သ့ၣ်တဖၣ်အဂီၢ်န့ၣ်လီၤ. အဆၢဖိ ၈ ပာ်ဖျါဝဲ ဒ်သိးပှၤဂီၢ်မုၢ်တဖၣ် “အသးကဆၢန့ၢ်ဘၣ်ယွၤအမံၤ ဒီးကသ့ၣ်နီၣ်ထီၣ်က့ၤအီၤ” လၢအသူၣ်ကံၢ်သးလဲပူၤအဂီၢ်န့ၣ်လီၤ.

ဒ်ပမ့ၢ်ပှၤလၢအစူၢ်က့ၤတာ်က့ၤကစၢ်ယ့ၣ်ရှူးအဃိ ပသ့ၣ်ညါအါထီၣ်ကစၢ်ယွၤ ဒီးဒ်ပပိာ် ယွၤအကျဲဧိၤကပူၤဧိၤ လၢတၢ်ဒိကနၣ်ကစၢ်ယွၤအပူၤန့ၣ် ပကဒုးအိၣ်ထီၣ်တၢ်သန့ၤပသးလၢ ယွၤအတၢ်တီတၢ်လိၤအပူၤအဂီၢ်န့ၣ်လီၤ. လၢပတၢ်အိၣ်မူတၢ်လဲၤကျဲတဖၣ် မ့ၢ်တလိၤတဘျၢ, တဘျ့တဆှီထီဘိဘၣ်ဆၣ် ပနာ်ကစၢ်ယွၤသ့ဝဲ လီၤတံၢ်လီၤဆဲးလၢ ယွၤအိၣ်ဒီးပှၤ ဒီးကတဲာ်ကတီၤန့ၢ်ပတၢ်လဲၤကျဲတဖၣ်န့ၣ်လီၤ. လၢပဂီၢ် ပဃ့ၢ်လဲၤတၢ်အဂ့ၤကတၢၢ် လၢယွၤအကျဲဧိၤကပူၤဧိၤအဆၢကတီၢ်, ပတၢ်အိၣ်မူအပူၤ ပကကလၢၢ်ဘၣ် တၢ်သဘျ့န့ၣ်လီၤ.