၂ဝ၂ဝ နံၣ် ဖဲခရံာ်ဂဲၤဆၢထၢၣ်သမူထီၣ်က့ၤ အမုၢ်နံၤဒိၣ်တနံၤန့ၣ် တၢ်ဂီၤလၢၢ်ထူၣ် “ခရံာ်, ပှၤအုၣ်က့ၤခီၣ်က့ၤတၢ်” လၢအမံၤဟူသၣ်ဖျါ ဒီးကွၢ်စိလီၤ ဝ့ၢ်ရံၣ်အိၣ်ဒ့ကၠ့နဲရိၣ်(Rio de Janeiro) လၢကီၢ်ဘရၣ်စ့န့ၣ် ဘၣ်တၢ်ကယၢကယဲအီၤလၢ လီမ့ၣ်အူအတၢ်ကပီၤ ဒီးအိၣ်ဖျါဝဲ ဒ်ကသံၣ်သရၣ်ဖးဒိၣ်တဂၤအသိးန့ၣ်လီၤ. တၢ်ဒုးနဲၣ်ပာ်ဖျါထီၣ် ကစၢ်ခရံာ် ဒ်အမ့ၢ် ကသံၣ်သရၣ်တဂၤအသိးန့ၣ် မ့ၢ်တၢ်မၤလၤကပီၤ တၢ်ကဟုကယာ်, တၢ်အိၣ်ဆူၣ်အိၣ်ချ့အၦၤမၤတၢ်ဖိတဖၣ် လၢကျဲးစၢးတြီဆှၢ ခိၣ်ရိၣ်နၣ်တၢ်ဆါအၢအဂီၢ်န့ၣ်လီၤ. ကစၢ်ယ့ၣ်ရှူးခရံာ် အက့ၢ်အဂီၤအံၤ ဖျါဝဲဒ် မၢ်ကူး ၂:၁၇ အတၢ်ပာ်ဖျါ ကစၢ်ယ့ၣ်ရှူး ဒ်အမ့ၢ်ကသံၣ်သရၣ်ဖးဒိၣ်တဂၤအသိးန့ၣ်လီၤ.
ဖဲကစၢ်ယ့ၣ်ၡူးအိၣ်မူအိၣ်ဂဲၤလၢ ဟီၣ်ခိၣ်ချၢအံၤ အဆၢကတီၢ် အဝဲမၤဘျါၦၤအါဂၤလၢ အအိၣ်ဒီးနီၢ်ခိအတၢ်ဆူးတၢ်ဆါန့ၣ်လီၤ. မၢ် ၁ဝး၄၆-၅၂ ပာ်ဖျါ ပှၤမဲာ်ဘျီၣ် စီၤဘၣ်တံၤမဲ, လူၤ ၅:၁၂-၁၆ ပာ်ဖျါ “ပှၤလိၤတဂ့ၤ”, ဒီး မး ၉:၁-၈ ပာ်ဖျါ “ပှၤသံတခီပၤ” အဂ့ၢ်တဖၣ်န့ၣ် မ့ၢ်တၢ်လၢ ပပာ်ဖျါတနီၤန့ၣ်လီၤ. ယိၤ ၆:၁-၁၃ အပူၤ ပကထံၣ်ဘၣ် ကစၢ်ယ့ၣ်ရှူး ကွၢ်ထွဲကဟုကယာ်ပှၤလၢအပိာ်အခံတဖၣ် အတၢ်အိၣ်ဆူၣ်အိၣ်ချ့အဂီၢ်န့ၣ် ဖျါဝဲဒၣ်လၢ ကစၢ်ယ့ၣ်ရှူး မၤအါထီၣ် တၢ်အီၣ်တဘျီ ဂီၢ်ဖိဆူ ကမျၢၢ်အါဂၤ ကအီၣ်ဘၣ်အီဘၣ်အဂီၢ်န့ၣ်လီၤ. တၢ်လီၤလးတဖၣ်အံၤ ပာ်ဖျါထီၣ် ကစၢ်ယ့ၣ်ၡူးအစိဒိၣ်အကမီၤဒိၣ်ဒီး တၢ်အဲၣ်ဘၣ်ပှၤဂီၢ်မုၢ်အမ့ၢ်အတီန့ၣ်လီၤ.
တၢ်ကမၤအသးတမံၤဂ့ၤတမံၤဂ့ၤန့ၣ် ကစၢ်ယ့ၣ်ရှူးအတၢ်မၤဘျါ တၢ်အဒိၣ်ကတၢၢ်တမံၤန့ၣ် ဒ်ဝံယရှါယၤ စံးကတိၤဆိတ့ၢ်ဝဲအသိး အိၣ်ဟဲခီဖျိလၢ အတၢ်သံ ဒီးအတၢ်ဂဲၤဆၢထၢၣ်သမူထီၣ်က့ၤတၢ်န့ၣ်လီၤ. ပတူၢ်ဘၣ်ခီၣ်ဘၣ်တၢ်အနးကတၢၢ်လၢ အမ့ၢ် ပတၢ်ဒဲးဘးအဘူးအလဲအဃိ ပဘၣ်အိၣ်လီၤဖးဒီး ကစၢ်ယွၤန့ၣ် ယၡါ ၅၃:၅ စံးဘၣ်ပှၤလၢ “ပဘျါက့ၤလၢ တၢ်တီၢ်(ကစၢ်ယ့ၣ်ရှူး)အဃိ” န့ၣ်လီၤ. ကစၢ်ယ့ၣ်ရှူး တမၤဘျါဝဲ ပတၢ်ဆူးတၢ်ဆါ တၢ်ဂ့ၢ်ကီခဲလၢာ်ဘၣ်ဆၣ်, ပနာ်န့ၢ် ကစၢ်ယ့ၣ်ရှူး သ့လၢ အမၤဘျါက့ၤ ပတၢ်လိၣ်အဒိၣ်အယိာ်တမံၤလၢ အမ့ၢ်တၢ်မၤဘျါပှၤလၢ အဆှၢပှၤဆူတၢ်ရ့လိာ်ဘၣ်ထွဲလိာ်သးဒီးကစၢ်ယွၤန့ၣ်လီၤ.
