ဖဲယလဲၤဟးကွၢ်တၢ်လၢပှၤစကီး(Scottish)ထံကီၢ် တၢ်ကွၢ်ကီအလီၢ်ဒၢးပူၤ အဆၢကတီၢ် ပှၤတ့ခဲၣ်တၢ်ဂီၤတဘ့ၣ်လၢ အဘၣ်တၢ်တ့ခဲၣ်အီၤလၢ ဒၢး(ခၠ)(Dutch)ပှၤတ့ခဲၣ်တၢ် ဘံစဲး ဘဲၣ် ကိ (Vincent van Gogh) န့ၣ် ထုးန့ၣ်ယသူၣ်ယသးန့ၣ်လီၤ. တၢ်ဂီၤအံၤ ပာ်ဖျါထီၣ် ပှၤတ့ခဲၣ်တၢ်ဒူဒူ ဒီးအလွဲၢ်တဖၣ် ဖျါလီၤဆီဒိၣ်မးဒီး အမံၤမ့ၢ်ဝဲ “သ့ၣ်စၤယံးအထူၣ်တဖၣ် (Olive Trees)”န့ၣ်လီၤ. ပှၤကွဲးတၢ်စံၣ်စိၤတဲစိၤအါဂၤတဖၣ် နာ်ဝဲဒၣ်လၢ တၢ်တ့ခဲၣ်တၢ်ဂီၤတဘ့ၣ်အံၤ အိၣ်ဟဲဝဲလၢ ကစၢ်ယ့ၣ်ရှူး အတၢ်လဲၤခီဖျိလၢ က့ၤသစ့ၤမနၤ တၤသၣ်လီၢ် ဖဲကစၢၢ်သ့ၣ်စၤယံးအလိၤအဂ့ၢ်န့ၣ် ကဲထီၣ် တၢ်ဟ့ၣ်ဆူၣ်ထီၣ်သး အဂံၢ်အဘါ လၢ ပှၤတ့ခဲၣ်တၢ်အဂီၢ်န့ၣ်လီၤ. လီၤလီၤဆီဆီ တၢ်လၢအထုးန့ၣ် ယတၢ်ထံၣ်န့ၣ် တၢ်တ့ခဲၣ် ကသံၣ်ဂီၤ ဖီးအဆံးဖိတဖၣ်လၢပျၢၤ သ့ၣ်စၤယံးအမုၢ်တဖၣ်အကျါန့ၣ်လီၤ.
ကစၢၢ်အံၤအလိၤ သ့ၣ်စၤယံးအမုၢ်တဖၣ် အိၣ်ဝဲအဃိ ဘၣ်တၢ်သ့ၣ်ညါအီၤလၢ ကစၢၢ်သ့ၣ်စၤယံး ဒီးဘၣ်ဖဲ မုၢ်တနၤန့ၣ် ကစၢ်ယ့ၣ်ရှူး စံးကတိၤ ဆိပာ်လၢ အပျဲၢ်စီၤယူဒၤအံၣ်စကၤရံၤအိာ်န့ၣ် ကဟ့ၣ်လီၤကွံာ်အီၤဝံၤ ကစၢ်ယ့ၣ်ရှူး လဲၤဝဲဆူတၢ်လီၢ်အံၤ ဒ်သိး ကဃ့ထုကဖၣ်တၢ်အဂီၢ်န့ၣ်လီၤ. ကစၢ်ယ့ၣ်ရှူးသ့ၣ်ညါလၢ တၢ်ဟ့ၣ်လီၤကွံာ်အီၤ တဘျီအံၤ ကကတၢၢ်ဝဲဒၣ် ဖဲတၢ်ပျၢ်ထီအီၤလၢ သ့ၣ်ဖျၢၣ်ထူၣ်စုညါလိၤအဃိ အသးပူၤ ပှဲၤလုာ်ကွံာ် ဒီး တၢ်ကိၢ်တၢ်ဂီၤန့ၣ်လီၤ. ဖဲကစၢ်ယ့ၣ်ရှူး ဃ့ထုကဖၣ်တၢ်အဆၢကတီၢ် လူၤ ၂၂:၄၄ စံးဘၣ်ပှၤ “အကပၢၤလီၤဝဲလၢဟီၣ်ခိၣ်အဖီခိၣ် ဒ်တၢ်သွံၣ်လီၤစီၤအဖျၢၣ်ဖးဒိၣ်အသိးန့ၣ်လီၤ”. လၢတၤသၣ်လီၢ်အပူၤ ကစၢ်ယ့ၣ်ရှူး အတၢ်နးတၢ်ဖှီၣ်အံၤ မ့ၢ် တၢ်အုၣ်အသး ဒ်အမ့ၢ် တၢ်ကတဲာ်ကတီၤအသး လၢကဘၣ်တူၢ်တၢ်မၤဆါမၤနးအီၤ ဒီးတၢ်မၤဆံးလီၤစှၤလီၤအသူးအသ့ၣ်အလါကပီၤ ခီဖျိ တၢ်ပျၢ်ထီအီၤလၢ သ့ၣ်ဖျၢၣ်ထူၣ်စုညါအလိၤ ဒီးအကတၢၢ်န့ၣ် ကဘၣ်တၢ်ဂာ်လီၤကွံာ် အသွံၣ် ဖဲမုၢ်ဖီဖးမုၢ်နံၤအဂ့ၤ (Good Friday) န့ၣ်လီၤ.
တၢ်တ့ခဲၣ်တၢ်အလွဲၢ်ဂီၤ လၢဘဲၣ်ကိ တၢ်ဂီၤတဘ့ၣ်အံၤ ဒုးသ့ၣ်နီၣ်ထီၣ်ပှၤလၢ ကစၢ်ယ့ၣ်ၡူးအဂ့ၢ် လၢ မၢ်ကူး ၈:၃၁ အပူၤ “ပှၤကညီၤဖိခွါအံၤ ကဘၣ်ဒိး တၢ်နးတၢ်ဖှီၣ်အါမံၤ ဒီးကဘၣ်တၢ်ညိကွံာ်အီၤ”န့ၣ်လီၤ. လၢကစၢ်ယ့ၣ်ရှူးအတၢ်တဲပူၤ တၢ်တူၢ်ဘၣ်တၢ်နးတၢ်ဖှီၣ် ကမ့ၢ်ဝဲ တၢ်ကဘၣ်မၤအသး ဘၣ်ဆၣ် တၢ်တူၢ်ဘၣ်တၢ်အံၤ အစိကမီၤ တအိၣ်လၢၤဘၣ်လၢ တၢ်ဂီၤတ့ခဲၣ်တၢ်တဘ့ၣ်အံၤ အလိၤန့ၣ်ဘၣ်. ကစၢ်ယ့ၣ်ရှူးအတၢ်မၤနၢၤတၢ်သံအစိကမီၤအံၤန့ၣ် ဆီတလဲကွံာ် ပတၢ်တူၢ်ဘၣ်တၢ်နးတၢ်ဖှီၣ် ဒၣ်လဲၣ် ဆူတၢ်ပျဲဒုးအိၣ်ထီၣ် တၢ်လီၢ်တၢ်ကျဲၤ အကူာ်အက့ၤ ဃံလၤတမံၤ လၢအမ့ၢ်ကစၢ်ယွၤတ့ဒုးအိၣ်ထီၣ် လၢ ပတၢ်အိၣ်မူအပူၤန့ၣ်လီၤ.
