ဖဲပဘၣ်သုးလီၢ်သုးကျဲဆူ တၢ်လီၢ်အသီတတီၤန့ၣ် ညီနုၢ်ပဘၣ်ပာ်တ့ၢ် ပတၢ်ဖိတၢ်လံၤတနီၤန့ၣ်လီၤ. ဒ်သိးပကအိၣ်ဂၢၢ်ဆိးကျၢၤယံာ်ယံာ် ဖဲ ဘံလး လး(စ) အဲးစထရဲလး(စ) အဝ့ၢ်(Villas Las Estrellas) အိၣ်ဖဲကီၢ်မိၢ်ပှၢ်အၣ်တၣ်တံးကး(Antarctica), ဒီးမ့ၢ်တၢ်လီၢ်လၢအခုၣ်ဒိၣ်မးဒီး ၦၤကညီတအိၣ်ကဲၣ်ဆိးအလီၢ်န့ၣ် တၢ်ပာ်တ့ၢ် တၢ်ဖိတၢ်လံၤ အဆံးဖိတဖၣ်န့ၣ် မ့ၢ်တၢ်ကဘၣ်မၤအသး သပှၢ်တၢၢ်န့ၣ်လီၤ. ပှၤတဂၤဂၤလၢ အပှံာ်ဖးဒ့ပိၢ်ဖးတၢ်အဂီၢ်, တၢ်ဆါဟံၣ်အဘူးကတၢၢ်ယံၤဝဲ ၆၂၅ မံးလာ်အဃိ, ကဲထီၣ်တၢ်ဂ့ၢ်ကီဖးဒိၣ်လၢ အဂီၢ်န့ၣ်လီၤ. လၢတၢ်န့ၣ်အဃိ, ထံဖိကီၢ်ဖိတဖၣ် တချုးလဲၤအိၣ်လၢ တၢ်လီၢ်အံၤန့ၣ် ကဘၣ်လဲၤခီဖျိ တၢ်ထုးထီၣ် အပှံာ်ဖးဒ့လၢ အဆိန့ၣ်လီၤ.
တၢ်မၤအသးအံၤ နးဒိၣ်မး တမ့ၢ်ဘၣ်ဧါ. ဘၣ်ဆၣ် တၢ်ကဲထီၣ်ပှၤကဆိးလၢ ယွၤဘီမုၢ်အပူၤအဂီၢ် တၢ်အိၣ်အသးန့ၣ် နးဒိၣ်န့ၢ်ဒံးတၢ်အိၣ်အသးဖျါလၢထးန့ၣ်လီၤ. မး ၁၆:၂၅-၂၇ အပူၤ ပကထံၣ်ဘၣ် ပှၤလၢ အဲၣ်ဒိးပိာ်ကစၢ်ယ့ၣ်ရှူးအခံတဖၣ် အဲၣ်ဒိးပိာ်ဝဲလၢ အတၢ်နၢ်ပၢၢ်ဒၣ်ဝဲအသိးဒီး တမ့ၢ် ဒ်ကစၢ်အတၢ်ဘၣ်သးအဃိ ကစၢ်ယ့ၣ်ရှူး ပာ်ဖျါဒုးနၢ်ပၢၢ် “တၢ်ကဲထီၣ်အပျဲၢ်အဘီၣ်” အခီပညီန့ၣ်လီၤ. အဆၢဖိ ၂၄ ပာ်ဖျါဝဲ “ပှၤမ့ၢ် မိၣ်ပိာ်အသးလၢ ယခံတဂၤဂၤန့ၣ်, မ်အညိကွံာ် အသးဒၣ်ဝဲဒီး ဟံးန့ၢ် အထူၣ်စုညါ ဒီးပိာ်ယခံတက့ၢ်”န့ၣ်လီၤ. တၢ်ကတိၤအံၤ အိၣ်ဃုာ်ဒီး တၢ်ကတဲာ်ကတီၤသးလၢ တၢ်ကပျဲကွံာ်ပျၢ်ကွံာ် တၢ်လၢ ကဟဲသတြီၤလိာ်သးဒီး ကစၢ်ယ့ၣ်ရှူးခရံာ် ဒီးအဘီအမုၢ်န့ၣ်လီၤ. ဖဲပယိးထီၣ် ပထူၣ်စုညါန့ၣ် မ့ၢ်ပတၢ်ဘိးဘၣ်သ့ၣ်ညါ ပာ်ဖျါထီၣ် တၢ်လၢပကလဲၤခီဖျိ ကွၢ်ဆၢၣ်မဲာ် တၢ်ရ့လိာ်ဘၣ်ထွဲလိာ်သးဒီးပှၤဂၤဒီး ထံဂ့ၢ်ကီၢ်ဂ့ၢ် အတၢ်ဆီၣ်သနံး ပှၤတဖၣ် ဒီးလၢပဘူၣ်ထီၣ်ဘါထီၣ် ကစၢ်ယ့ၣ်ရှူးခရံာ်အဃိ တၢ်သံဒၣ်လဲာ် ပကတူၢ်ဝဲ ခီၣ်ဝဲ လၢတၢ်သူၣ်အိၣ်သးအိၣ်အပူၤ အဂ့ၢ်န့ၣ်လီၤ. “တၢ်ပျဲကွံာ် ပျၢ်ကွံာ်တၢ်” ဃုာ်ဒီး “တၢ်ဟံးထီၣ်ဖီၣ်ထီၣ် ထူၣ်စုညါ” အတၢ်မၤန့ၣ် ကဘၣ်အိၣ်စ့ၢ်ကီးဒီး တၢ်သူၣ်အိၣ်သးအိၣ လၢကလူၤပိာ် ကစၢ်ယ့ၣ်ရှူးအခံအမ့ၢ်အတီန့ၣ်လီၤ. တၢ်မၤအံၤ မ့ၢ်ကစၢ်ယ့ၣ်ရှူးဒုးနဲၣ်ဆှၢပှၤလၢ တၢ်ခ့တၢ်ပှၤ အတၢ်မၤဒီး တၢ်လုၢ်ထီၣ်ပသး ယွၤအဂီၢ် ဒ်သိးပကအိၣ်မူပိာ်ထွဲ တကတီၢ်ဘၣ် တကတီၢ်အဂီၢ်န့ၣ်လီၤ.
တၢ်ပိာ်ကစၢ်ယ့ၣ်ရှူးခရံာ်အခံန့ၣ် တၢ်အခီပညီအိၣ်အါန့ၢ်ဒံး တၢ်ပာ်တ့ၢ်ကွံာ် ပတၢ်အိၣ်မူအက့အခီတဖၣ် လၢပလီၢ်ခံန့ၣ်လီၤ. ဒ်အဝဲမၤစၢၤပှၤအသိး တၢ်မၤအံၤ မ့ၢ်တၢ်ဟ့ၣ်လီၤအးလီၤ ပတၢ်အိၣ်မူအိၣ်ဂဲၤခဲလၢာ်ဒီး ပနီၢ်ခိနီၢ်ကစၢ်ဒၣ်လဲာ်, ထဲဒၣ်ဆူ ကစၢ်ယ့ၣ်ရှူးအအိၣ်န့ၣ်လီၤ.
