အပူၤကွံာ်နံၣ်တဖၣ်န့ၣ် ပဟဲက့ၤစိာ် သၣ်မံယီၤဖါသူတဒုလၢအမံၤမ့ၢ် ကၠူနိၣ်(Juno) လၢလီၢ်ကဝီၤ အဆၣ်ဖိကီၢ်ဖိအိၣ်ကဒုတၢ်အလီၢ်လီၤ. ယမ့ၢ်စံးဘၣ်တီတီန့ၣ်ဒီး ယအဲၣ်ဒိးတဲလၢ သၣ်မံၤယီၤအံၤ ကမၤစှၤလီၤ ယုၢ်ဖိတဖၣ် အနီၢ်ဂံၢ်လၢ ဟံၣ်ပူၤဘၣ်ဆၣ် ဟံၣ်ဖိဃီဖိအဂၤတဖၣ် အဲၣ်ဒိးပာ်အီၤ ဒ်ဆၣ်ဖိကီၢ်ဖိလၢ အလီၤအဲၣ်တကလုာ်န့ၣ်လီၤ. ဒ်သိး ကၠူနိၣ် ကမၤလိန့ၢ် ဟံၣ်အံၤမ့ၢ်အဟံၣ်, ဒီးတၢ်လီၢ်အံၤ မ့ၢ်တၢ်လီၢ်လၢအဟ့ၣ်အီၤတၢ်အီၣ်ဒီးအတၢ်ဘံၣ်တၢ်ဘၢအဂီၢ်န့ၣ် ပှၤကွၢ်ထွဲ ဆၣ်ဖိကီၢ်ဖိ အဝဲၤလီၢ် ဟ့ၣ်လီၤပှၤ တၢ်နဲၣ်ကျဲ လီၤတံၢ်လီၤဆဲး လၢတၢ်အခီၣ်ထံးတနွံအတီၢ်ပူၤ ပကဘၣ်ကတဲာ်ကတီၤ ဒုးအီၣ် တၢ်အီၣ်အကျိၤအကွံာ် ဒ်လဲၣ်အဂ့ၢ်န့ၣ်လီၤ. ပမ့ၢ်မၤ ဒ်သိးအံၤန့ၣ်ဒီး ကၠူနိၣ် မ့ၢ်ဟးဆူတၢ်လီၢ်အဂၤဒၣ်လဲာ် အကတၢၢ်န့ၣ် ကဟဲက့ၤဆူဟံၣ်အံၤန့ၣ်လီၤ.

ပမ့ၢ်တသ့ၣ်ညါပဟံၣ်နီၢ်နီၢ်ဘၣ်န့ၣ်ဒီး ပကဘၣ်တၢ်လ့ပစီၦၤလၢ တၢ်ဃုထံၣ်န့ၢ်တၢ်ဂ့ၤတၢ်ဝါတဖၣ်, တၢ်အဲၣ်တၢ်ကွံဒီး တၢ်အိၣ်မူအခီပညီတဖၣ်လၢ တၢ်ဟးဝ့ၤဟးဝီၤ တၢ်ကလီကလီအပူၤန့ၣ်လီၤ. ပမ့ၢ်သးအိၣ်ဃုထံၣ်န့ၢ် တၢ်အိၣ်မူအမ့ၢ်အတီအဂီၢ် ယိၤ ၁၅:၄ အပူၤ ကစၢ်ယ့ၣ်ရှူးစံးဝဲ “အိၣ်ဆိးသုဝဲလၢယပူၤ”န့ၣ်လီၤ. ပှၤသိၣ်လိလံာ်စီဆှံ ဖရဲးဒရံး ဒဲ ဘရူနၢၣ် (Frederick Dale Bruner)ပာ်ဖျါ လီၤဆီဝဲ“တၢ်အိၣ်ဂၢၢ်ဆိးကျၢၤ – abide” (လီၤဂာ်လိာ်သးဒီး လံာ်မဲာ်ဖျၢၣ်အဂၤတဖျၢၣ် “တၢ်အိၣ်ဆိးလီၢ် – abode”)အံၤန့ၣ် ဒုးအိၣ်ထီၣ် သးအတၢ်သ့ၣ်ညါ ဒူၣ်ဖိထၢဖိဒီးဟံၣ်လီၤ. လၢတၢ်န့ၣ်အဃိ ဘရူနၢၣ် စံးကတိၤကျိာ်ထံက့ၤဝဲ ယ့ၣ်ၡူးအတၢ်ကတိၤလၢ – “အိၣ်ဟံၣ်လၢ ကစၢ်ယ့ၣ်ရှူးအိၣ်ဆိးဝဲ” န့ၣ်လီၤ.
ဒ်သိး ပကသ့ၣ်ညါနၢ်ပၢၢ်ဘၣ် တၢ်ဆိကမိၣ်ဘၣ်ထွဲဒီး ဟံၣ်အံၤအဂီၢ် ကစၢ်ယ့ၣ်ရှူး စူးကါဝဲ တၢ်ဟ့ၣ်ဒိလၢ စပံးမုၢ်ဒီးအဒ့တဖၣ် အတၢ်အိၣ်စဲဘူးလိာ်သးအဂ့ၢ်န့ၣ်လီၤ. တၢ်အဒ့တဖၣ် မ့ၢ်အဲၣ်ဒိးအိၣ်မူအိၣ်ဂဲၤဝဲဒၣ်န့ၣ် ကဘၣ်အိၣ်ဝဲ တၢ်လီၢ်တၢ်ကျဲလၢအဘၣ်ထွဲဒီး အဝဲသ့ၣ်, ဘၣ်အိၣ်ဘျးစဲထီဃာ်ဃံးဃံး ထီဘိန့ၣ်လီၤ.

ပကနၢ်ဟူဘၣ် တၢ်ကလုၢ်တဖၣ်လၢ အလုၢ်အပှ့ၤတအိၣ်, တၢ်အၢၣ်လီၤအီလီၤ ကလီကလီတဖၣ် လၢအမ့ၢ် တၢ်ကမၤဘၣ်လိာ်ဘၣ်စးက့ၤ ပတၢ်ကီတၢ်ခဲတဖၣ်မ့ၢ်ဂ့ၤ, တၢ်ကဟ့ၣ်ပှၤ တၢ်ကူၣ်သ့, တၢ်သ့ၣ်ညါအသီမ့ၢ်ဂ့ၤ, ဒီးကဒုးအိၣ်ထီၣ် တၢ်သူၣ်ကိၢ်သးဝး လၢပတၢ်အိၣ်မူခါဆူညါအဂီၢ် မ့ၢ်ဂ့ၤန့ၣ်လီၤ. ဘၣ်ဆၣ် ပမ့ၢ်အဲၣ်ဒိးအိၣ်မူအိၣ်ဂဲၤလၢ တၢ်မူအမ့ၢ်အတီပူၤန့ၣ်ဒီး ပကဘၣ်အိၣ်ဝဲဆိးဝဲလၢကစၢ်ယ့ၣ်ရှူးအပူၤ တၢ်လီၢ်လၢ အဘၣ်ထွဲဒီးပှၤအပူၤန့ၣ်လီၤ.