စဲအ့ၣ်အတၢ်ဃိထံသ့ၣ်ညါတၢ်တမံၤန့ၣ် ပာ်ဖျါထီၣ် ကွဲၤထံၣ်ဟူအတၢ်ရဲၣ်တၢ်ကျဲၤလၢအဒုးနဲၣ် ပှၤအၢပှၤသီလၢအဂဲၤဒိပူ (mean characters) တဖၣ်န့ၣ် ဒ်သိးပကမၤအၢမၤသီတၢ်အဂီၢ်, နဲၣ်ဆှၢပှၤ သ့ဝဲနီၢ်နီၢ်န့ၣ်လီၤ. တၢ်မၤစုဆူၣ်ခီၢ်တကး (မ့) တၢ်စံးကတိၤကူၣ်အၢပှၤဂၤ (မ့) လၢအဃုတၢ်အ့ၣ်လိာ်ထီဒါလိာ်သး အကလုာ်ကလုာ်န့ၣ် သိၣ်လိနဲၣ်လိ ပှၤကွၢ်တၢ်ဖိတဖၣ်အခိၣ်နူာ်လၢ ကမၤထွဲဝဲဒၣ်အဂီၢ်န့ၣ်လီၤ. တၢ်ဘျးစဲလိာ်သးအံၤ တလီၢ်လီၢ်န့ၣ် အိၣ်ဟဲကဲထီၣ် ခီဖျိလၢသးအတၢ်သ့ၣ်ညါခူသူၣ်အပူၤ, ဒီးအခီပညီန့ၣ် တၢ်ဒုးနဲၣ်တဖၣ် လၢအကတိၤနံၤပှၤဂၤတဖၣ်န့ၣ် ဖျါဝဲဒၣ် “ဒ်အတမၤဘၣ်ဒိဆါပှၤဂၤ” ဒၣ်လဲာ်, လၢတၢ်တပာ်သူၣ်ပာ်သးအပူၤန့ၣ် ဒိၣ်စိလုၣ်ဘၢ ပအိၣ်မူမၤထွဲပှၤဂုၤပှၤဂၤတဖၣ်န့ၣ်လီၤ. လၢတၢ်န့ၣ်အဃိ, တံၤသကိးတဖၣ်လၢ ပဃုထၢရ့လိာ်သးတဖၣ်န့ၣ် ကဟဲဘၣ်ဒိဘၣ်ထံး ပတၢ်အိၣ်မူသကဲာ်ပဝးစ့ၢ်ကီးန့ၣ်လီၤ.

ဘၣ်ဃးဒီးတၢ်ဂ့ၢ်အကါဒိၣ်ဒ်သိးအံၤန့ၣ် စီၤပၤစီၤရှလိၤမိၤ ဟ့ၣ်လီၤ တၢ်ကူၣ်သ့လၢအကတၢၢ်တအိၣ်, “ပှၤလၢအလဲၤတၢ်ဒီးပှၤကူၣ်တၢ်သ့န့ၣ် ကကဲထီၣ်ပှၤကူၣ်တၢ်သ့လီၤ. မ့မ့ၢ်ပှၤဒီတံၤဒီသကိးဒီးပှၤဟးဂီၤဖိန့ၣ် ကတုၤလၢတၢ်ဟးဂီၤ” (ကတိၤ ၁၃:၂၀) န့ၣ်လီၤ. တၢ်လၢစီၤရှလိၤမိၤ အဲၣ်ဒိးစံးဝဲန့ၣ် ပှၤတဂၤဂၤကဒိးန့ၢ် တၢ်ကူၣ်သ့အံၤ ထဲတဂၤဧိၤန့ၣ်တသ့ဘၣ်အဃိ, လၢတၢ်ရ့လိာ်သးဒီးပှၤဟးဂီၤဖိတဖၣ်အလီၢ်န့ၣ် ကဘၣ်ရ့လိာ်သးဒီးသရၣ်သမါ, ဒီးတံၤသကိးလၢ အကူၣ်တၢ်သ့, လၢအပာ်ဒိၣ်ပာ်ကဲယွၤတဖၣ်န့ၣ်လီၤ.တၢ်ကဝီၤဃာ်ပသးလၢ ပှၤကူၣ်ဘၣ်ကူၣ်သ့တဖၣ်န့ၣ် ထိၣ်ဂဲၤထီၣ် “တၢ်ဆိကမိၣ်ဆၢတဲာ်တၢ်လၢအဂ့ၤ,” ဒီးဒ်သိးပကဟးဆှဲး “တၢ်ဟးဂူာ်ဟးဂီၤ” (:၁၅) အဂီၢ်, ကမၤစၢၤပှၤန့ၣ်လီၤ. တၢ်မၤဒ်သိးအံၤန့ၣ် ပှၤကူၣ်ဘၣ်ကူၣ်သ့တဂၤ ကိးဝဲဒၣ်လၢ “တၢ်ဃုမၤလိန့ၢ်တၢ်ကူၣ်သ့ခီဖျိလၢတၢ်ရ့တံၤရ့သကိး” န့ၣ်လီၤ. ပှၤလၢအညီနုၢ်ရ့လိာ်အသးတဖၣ်န့ၣ် ကဒိၣ်စိလုၣ်ဘၢလိာ်သးကဒဲကဒဲ, လၢတၢ်ဂ့ၤတကပၤမ့ၢ်ဂ့ၤ, လၢတၢ်အၢတကပၤမ့ၢ်ဂ့ၤန့ၣ်လီၤ. “’ပှၤကူၣ်တၢ်သ့အတၢ်သိၣ်တၢ်သီန့ၣ် မ့ၢ်တၢ်မူအထံထီၣ်ပၢၢ်” (:၁၄) န့ၣ် စီၤရှလိၤမိၤ သ့ၣ်ညါပာ်သူၣ်ပာ်သးဝဲအဃိ, ဒ်သိးပကပလီၢ်သူၣ်ပလီၢ်သး လၢပတၢ်ရ့တံၤရ့သကိးအပူၤအဂီၢ်န့ၣ် စံးကတိၤဟ့ၣ်သဆၣ်ထီၣ်ပှၤန့ၣ်လီၤ.

မ့ၢ်လၢယွၤမၤစၢၤပှၤအဃိ, မ်ပကကဝီၤဃာ်ပသးဒီး ပှၤလၢအဟ့ၣ်ဂံၢ်ဟ့ၣ်ဘါပှၤ ဒ်သိးပကပာ်ဒိၣ်ယွၤ, ပကအဲၣ်ပှၤဂၤ, ဒီးပကဒိၣ်ထီၣ်လၢတၢ်ကူၣ်သ့အဂီၢ်န့ၣ်တက့ၢ်.