ထိနံၣ် မီရ့ၣ်စၢၣ် (Toni Morrison) ကွဲးပာ်ဖျါထီၣ်ဝဲ နဲလ် (Nel) ဒီး စူလၣ် (Sula) ခံဂၤ, တၢ်ဒီတံၤဒီသကိးစးထီၣ်လၢ ဖိသၣ်လံၤလံၤအဂ့ၢ်, လၢအတၢ်ကွဲးပူတယုၢ်အပူၤန့ၣ်လီၤ. ဘၣ်ဆၣ်, ဖဲစူလၣ် အတၢ်အဲၣ်လီၤဒၣ်ထဲအသးန့ၣ် ဒိၣ်ထီၣ်အါထီၣ်, ဒီးကလံာ်န့ၢ်ဝဲ နဲလ် အဝၤန့ၣ်ဒီး, အတံၤသကိးခံဂၤ, အတၢ်ဘၣ်ထွဲလိာ်သးန့ၣ် ကတၢၢ်ကွံာ်ဝဲန့ၣ်လီၤ. နဲလ် သံကွၢ်ဝဲဒၣ် စူလၣ်လၢ “ဘၣ်မနုၤအဃိ, နတဆိကမိၣ်တၢ်လၢယဂီၢ်လဲၣ်. ယတမ့ၢ်တၢ်နီတမံၤလၢသုဂီၢ်ဘၣ်ဧါ” န့ၣ်လီၤ. တၢ်လၢအလီၤသးအုးန့ၣ် စူလၣ် တဒိသူၣ်ဒိသး, စံးဆၢက့ၤအီၤတၢ် နီတမံၤဘၣ်န့ၣ်လီၤ.

တံၤသကိးလၢ ပနာ်န့ၢ်အီၤတဂၤ, မ့ၢ်မၤကမၣ်ပှၤ, ယိးကဒါဘီလၢပှၤန့ၣ် မၤဘၣ်ဒိဆါ ပသးဒိၣ်မးန့ၣ် ပှၤလၢအလဲၤခီဖျိဘၣ်အီၤကိးဂၤဒဲး သ့ၣ်ညါဝဲဒၣ်န့ၣ်လီၤ. ဖဲထံရူၢ်ကီၢ်သဲး အတၢ်ကူၣ်ခူသူၣ်တဖၣ်လၢ “မၤအၢတၢ်, ဒီးလီတၢ်” န့ၣ် လုၢ်ဘၢအီၤအကတီၢ်, စီၤပၤစီၤဒၤဝံး တူၢ်ဘၣ်ခီၣ်ဘၣ်ဝဲ “တၢ်မၤဟးဂီၤ, ဒီးတၢ်နးတၢ်ဖှီၣ်” (စံး ၅၅:၁၀-၁၁) န့ၣ်လီၤ. ပှၤအိၣ်ဝဲတဂၤ, လၢတၢ်ဂ့ၢ်အံၤအလီၢ်ခံန့ၣ် မ့ၢ်တၢ်လၢအနးဒိၣ်ကတၢၢ်န့ၣ်လီၤ. စီၤဒၤဝံၤ စံးဝဲဒၣ်လၢ “အဂ့ၢ်ဒ်အံၤ, တမ့ၢ်ဘၣ် တၢ်အဒုၣ်အဒါဒုၣ်ဒွဲၣ်ယၤဘၣ်. မ့မ့ၢ်ဒ်န့ၣ်ဒီးယတူၢ်ကကဲလီၤ…….., မ့ၢ်နၤ, ပှၤထဲသိးဒီးယၤ, ယတံၤယသကိး, ဒီးပှၤလၢအသ့ၣ်ညါယၤ” (: ၁၂-၁၃) န့ၣ်လီၤ.

တၢ်မၤကမၣ်ပှၤ, ယိးကဒါဘီလၢပှၤဒ်သိးအံၤန့ၣ် ပကြၢးမၤဆၢက့ၤအီၤဒ်လဲၣ်. စီၤပၤ စီၤဒၤဝံး ပာ်ဖျါထီၣ် အတၢ်ဂ့ၢ်ကီတဖၣ်လၢ ကစၢ်ယွၤ (:၁၆, ၂၀), ဒီးဒ်သိးယွၤကစံၣ်ညီၣ် အတံၤသကိးလၢယိးကဒါဘီတဂၤအံၤအဂီၢ်, ဃ့ထုကဖၣ်ဝဲဒၣ် (:၁၅) န့ၣ်လီၤ. ကစၢ်ယ့ၣ်ရှူး ဘှါဆှဲတၢ်ဂ့ၢ်အံၤ, လၢကျိၤကျဲအဂၤတဘိန့ၣ်လီၤ. ဖဲအဘၣ်ကွၢ်ဆၢၣ်မဲာ် စီၤယူဒၤ အတၢ်ယိးကဒါဘီန့ၣ်ဒီး, လၢတၢ်မၤဆၢမၤကၣ်က့ၤတၢ်အလီၢ်န့ၣ် ကစၢ်ယ့ၣ်ရှူး စံးဘၣ်အီၤ, “တံၤသကိးဧၢ, တၢ်လၢနကမၤန့ၣ်မၤအီၤချ့ချ့တက့ၢ်” (မးသဲ ၂၆:၄၉-၅၀, ခ့ခါ) န့ၣ်လီၤ.

တံၤသကိးတဂၤ, မ့ၢ်မၤကမၣ်ပှၤန့ၣ်ဒီး, ပမၤဘၣ်လိာ်ဘၣ်စးက့ၤ ပတၢ်ရ့လိာ်ဘၣ်ထွဲ လိာ်သးဘၣ်ကသ့ဧါ. ပှၤလၢအတူၢ်ဘၣ်တၢ်တဂၤန့ၣ် မ့ၢ်အိးထီၣ်ကျဲလၢ ကမၤဘၣ်လိာ်ဘၣ်စးက့ၤတၢ်အဂီၢ်, ဒီးပှၤမၤကမၣ်တၢ်ဖိတဂၤန့ၣ် မ့ၢ်ပာ်ဖျါထီၣ် အတၢ်ပီၢ်ယၢ်လီၤက့ၤသးတလီၢ်လီၢ်န့ၣ်ဒီး, တၢ်မၤအံၤကဲထီၣ်အသး, သ့ဝဲဒၣ်န့ၣ်လီၤ. မ့ၢ်လၢ စူလၣ် တပီၢ်ယၢ်လီၤက့ၤအသးအဃိ, နဲၣ်လ် ကဘၣ်စူးကွံာ်ညိကွံာ်အီၤန့ၣ်လီၤ. ဒ်ယွၤမၤစၢၤပှၤအသိး, မ်ပကပာ်လုၢ်ပာ်ပှ့ၤ ပတၢ်ရ့လိာ်ဘၣ်ထွဲလိာ်သးတဖၣ်, ဒီးကယဲၢ်တၢ်လၢပမၤဘၣ်ဒိဘၣ်ထံးပှၤဂုၤပှၤဂၤတမံၤလၢ်လၢ်န့ၣ် ပကမၤဘၣ်လိာ်ဘၣ်စးက့ၤအဆိအချ့န့ၣ်တက့ၢ်.