ဒ်သိးတၢ်ကမၤလိဃုသ့ၣ်ညါ ပှၤကညီတဖၣ် အသးကလၢၢ်ဘၣ်တၢ်ဒ့တၢ်အူ, တၢ်သူၣ်ဝံၣ်သးဆၢသ့ဝဲန့ၣ် မ့ၢ်လုၢ်လၢ်ဆဲးလၤတဖၣ်အဃိဧါ (မ့) လၢအိၣ်ဖျဲၣ်ထီၣ်လံၤလံၤ, အတၢ်သ့တၢ်ဘၣ်တမံၤဧါအဂီၢ်, တၢ်ဃုသ့ၣ်ညါအီၤ ခီဖျိလၢစဲအ့ၣ်အကျိၤကျဲ အတၢ်မၤကွၢ်တမံၤန့ၣ် အိးထီၣ်န့ၢ်ဝဲဒၣ် ဖိသၣ်အိၣ်ဖျဲၣ်ထီၣ်သီတဖၣ်လၢ တၢ်ပှီၢ်ဒၢအကလုၢ်, ဒီးခိးကွၢ်အဝဲသ့ၣ် အခိၣ်နူာ်နၢာ်ဖံးတၢ်မၤတၢ်ဒ်လဲၣ်န့ၣ်လီၤ. စဲအ့ၣ်အပှၤဃုမၤလိတၢ်ဖိတဖၣ် ပာ်လီၤဟိဝဲဒၣ် တၢ်ပှီၢ်ဒၢအကလုၢ် အထီၣ်အလီၤအဆၢတီ, တတီၤဘၣ်တတီၤန့ၣ်လီၤ. တၢ်လီၤကမၢကမၣ်တမံၤန့ၣ် ဖဲတၢ်အကလုၢ်လီၤဟိတုၤလီၤအကတီၢ်, ဖိသၣ်ဆံးဖိတဖၣ်အခိၣ်နူာ်နၢာ် စံးဆၢမၤဆၢက့ၤဝဲတကီၢ်ခါ, ပာ်ဖျါထီၣ် အဝဲသ့ၣ်သးအတၢ်သ့ၣ်ညါန့ၣ် ဆၢနၢ်ဟူဘၣ် တၢ်ကလုၢ်အသီၣ်, အထီၣ်အလီၤအဆၢတီန့ၣ်လီၤ.

ခီဖျိလၢတၢ်ဃုသ့ၣ်ညါတမံၤအံၤန့ၣ် ပသ့ၣ်ညါဘၣ်လၢ ကစၢ်ယွၤ တ့ဒုးအိၣ်ထီၣ်ပှၤ လၢကျိၤကျဲလီၤလိၢ်လီၤလးအပူၤန့ၣ်လီၤ. ကစၢ်ယွၤဟ့ၣ်လီၤပှၤ တၢ်သူၣ်ဝံၣ်သးဆၢအတၢ်ဟ့ၣ်လီၤဆီ ဒီးမၤကမၢကမၣ်ပှၤလၢ ပကသ့တူၢ်လိာ်အီၤ, ဒီးစံးဆၢက့ၤအီၤလၢတၢ်သူၣ်ခုသးခုအပူၤန့ၣ်လီၤ. ထါစံးထီၣ်ပတြၢၤအယုၢ် ၃၀ အပူၤ, ဒ်ပှၤကွဲးထါ စီၤဒၤဝံး ကွဲးပာ်ဖျါဝဲ “စံးထီၣ်ပတြၢၤတၢ် လၢတၢ်သ့ၣ်နီၣ်ထီၣ်က့ၤ အတၢ်စီဆှံန့ၣ်တက့ၢ်” (:၄) အသိး, ပကစံးထီၣ်ပတြၢၤ ယွၤအဘျုးအဖှိၣ်, ခီဖျိလၢပတၢ်သူၣ်ဝံၣ်သးဆၢန့ၣ်တက့ၢ်.

ဘၣ်တဘျီဘျီ, တၢ်ဘၣ်ဒိဆါ, တၢ်လီၤဘှံးလီၤဘှါ, တၢ်ပှီၢ်ယၢ်လီၤသး, ဒီးတၢ်သူၣ်အုးသးအုးတဖၣ်န့ၣ် ကဲထီၣ်တၢ်ဆီၣ်သနံးလၢပသးကံၢ်ပူၤ, ဒီးမၤဘှ့ၣ်မၤဘှီၣ် ပတၢ်သးဝံၣ်စံးထီၣ်ပတြၢၤယွၤအကလုၢ်တဖၣ်န့ၣ်လီၤ. ဖဲ စီၤဒၤဝံး အတၢ်မုၢ်လၢ်လီၤမၢ်, ဒီးပျံၤဝဲဒၣ် တၢ်သံန့ၣ်ဒီး, ကစၢ်ယွၤ ကမၤပူၤဖျဲးအီၤအဂီၢ်, ဃ့ကညးဝဲဒၣ် “လၢယတၢ်သံအဃိန့ၣ်နကဒိးန့ၢ်ဘၣ်တၢ်ဘျုးမနုၤတမံၤလဲၣ်. ဟီၣ်ခိၣ်အကမူၣ် ကစံးထီၣ်ပတြၢၤနၤစ့ၢ်ကီးဧါ” (ခ့ခါ ကညီစှီၤကျိာ်) (:၉) န့ၣ်လီၤ.

စီၤဒၤဝံး “အတၢ်ဟီၣ်တၢ်ယၢၤ” န့ၣ် ကစၢ်ယွၤ ဒုးကဲထီၣ် “တၢ်ဂဲၤကလံၣ်” လၢအဂီၢ် (:၁၁) အဃိ, ဒိးန့ၢ်က့ၤဝဲ တၢ်သူၣ်ခုသးခု, ဒီးလဲၤခီဖျိကလၢၢ်ဘၣ်ဝဲ ကစၢ်ယွၤ အတၢ်တီတၢ်လိၤန့ၣ်လီၤ. ကစၢ်ယွၤ ကူစါမၤဘျါက့ၤ ပသူၣ်ပသး, ဒီးမၤပှဲၤက့ၤဝဲလၢ တၢ်သူၣ်ခုသးခု ထါမုာ်သီၣ်ကျဲၤအဆၢတီန့ၣ်ဒီး, လၢတၢ်ဂဲၤကလံၣ်အဂီၢ်, ပကအိၣ်ဖျဲၣ်ထီၣ်ဝဲဒၣ်, ဒီးပကအုၣ်ပသးလၢ “တၢ်စံးထီၣ်ပတြၢၤယွၤ လီၤထူလီၤယိာ်” (:၁၂) သ့ဝဲဒၣ်န့ၣ်လီၤ.