ယတံၤသကိးတဂၤ ကဒိးန့ၢ်ဝဲ ပှၤနီၣ်သိလ့ၣ် အတၢ်ပျဲလံာ်က့ဖိအဂီၢ်, ကဘၣ်မၤလိအသးလၢ တၢ်နီၣ်ပာ်ကတီၢ်သဃဲၤသိလ့ၣ်န့ၣ်လီၤ. ယကသိၣ်လိန့ၢ်အီၤ ဒ်သိးဒီး တၢ်ဘၣ်ဒိဘၣ်ထံးတအိၣ်အဂီၢ်, ယဃ့ထုကဖၣ်, ဒီးလူၤကွၢ်ဃုတၢ်လီၢ်တၢ်ကျဲန့ၣ်ဒီး, တၢ်ပာ်ကတီၢ်သိလ့ၣ်အလီၢ်ဖးလဲၢ် လၢအကပိာ်အကပၤ တၢ်ဘါသရိာ်တဖျၢၣ်န့ၣ်ကမ့ၢ်ဝဲတၢ်သိၣ်လိအီၤအဂ့ၤကတၢၢ်န့ၣ်လီၤ. အဝဲကမၤလိအသးအဂီၢ်, ပရဲၣ်ကျဲၤ ခးဆ့ၣ်နီၤတဖၣ်န့ၣ် တမ့ၢ်တၢ်အိၣ်အသးအဂ့ၤကတၢၢ်ဘၣ်ဆၣ်, ယတံၤသကိး ကျဲးစၢး နီၣ်ပာ်ကတီၢ်သိလ့ၣ်အဆိကတၢၢ်တဘျီ, ဆူခးဆ့ၣ်နီၤတဖၣ်အကဆူးန့ၣ်လီၤ.

အကတီၢ်ဖဲန့ၣ် တၢ်အိၣ်ဖှိၣ်သရၣ်တဂၤ, ဟဲစိာ်ပိးလီတဖၣ်, ပှၤစူးကါလၢတၢ်နီၣ်လိသိလ့ၣ်အဂီၢ်န့ၣ်လီၤ. အဝဲဒုးသ့ၣ်ညါလီၤအသး, ဒီးသံကွၢ်ပှၤလၢ “သုကစူးကါ တၢ်သ့ၣ်တဖၣ်အံၤဧါ” န့ၣ်လီၤ. အဝဲဒုးသ့ၣ်ညါပှၤလၢ တယံာ်ဒံးဘၣ်န့ၣ် တၢ်အိၣ်ဖှိၣ်ဒူၣ်ဖိထၢဖိတဖၣ် စံးကတိၤသကိးကျိၤကျဲတဖၣ်လၢ ကမၤစၢၤ ပှၤဟဲနုာ်လီၤအိၣ်ဆိးသီတဖၣ်, ဒီးဆၢတဲာ်ဝဲလၢ “ပှၤဟဲနီၣ်လိ တၢ်ပာ်ကတီၢ်သဃဲၤသိလ့ၣ် လၢပတၢ်အိၣ်ဖှိၣ်, ပှၤပာ်ကတီၢ်သိလ့ၣ်တဖၣ်အလီၢ်န့ၣ် ကစူးကါဝဲ ပိးလီသ့ၣ်တဖၣ်အံၤ” န့ၣ်လီၤ. တၢ်ကမၤစၢၤပှၤဂုၤပှၤဂၤအဂီၢ်, အဝဲသ့ၣ်ရဲၣ်ကျဲၤဆိပာ်ဝဲ, ဒီးအဝဲသ့ၣ်တဖၣ် မ့ၢ်တၢ်ဆိၣ်ဂ့ၤလၢယတံၤသကိးအဂီၢ်န့ၣ်လီၤ.

ပကမၤစၢၤပှၤဂုၤပှၤဂၤအဂီၢ်, တၢ်အိၣ်ကတဲာ်ကတီၤသးန့ၣ် မ့ၢ်ကစၢ်ယွၤ အတၢ်မၤ လီၤတံၢ်လီၤဆဲးလၢပဂီၢ်, ဒီးလၢပပူၤန့ၣ်လီၤ. ဒ်သိးပကမၤတၢ်ဂ့ၤတဖၣ်, ဒီးမၤဂ့ၤမၤစၢၤပှၤဂုၤပှၤဂၤတဖၣ်အဂီၢ်, “ယွၤကတဲာ်ကတီၤပာ်” (အ့း ၂:၁၀) ပှၤန့ၣ်လီၤ. ပှၤတၢ်မၢဖိ စီၤပီလူး စံးဘၣ်ပှၤလၢ “အဂ့ၢ်ဒ်အံၤ, ပမ့ၢ်အတၢ်မၤလၢအတ့လီၤဝဲလၢ ယ့ၣ်ရှူးခရံာ်အပူၤ” (:၁၀) အဃိ, ပကဘၣ်မၤလၢမၤပှဲၤ ကစၢ်ယွၤ အတၢ်တိာ်ကျဲၤ, လၢအတၢ်နဲၣ်ဆှၢပှၤအပူၤန့ၣ်လီၤ. တၢ်အုၣ်က့ၤခီၣ်က့ၤန့ၣ် မ့ၢ်ဝဲဒၣ် “ယွၤအတၢ်ဟ့ၣ်” (:၈), “ယွၤလၢအသူၣ်ကညီၤတၢ်ဒိၣ် သးကညီၤတၢ်အါ” (:၄) န့ၣ်လီၤ. ပတၢ်မၤအဂ့ၤတဖၣ်န့ၣ် မ့ၢ်ဝဲဒၣ် ကစၢ်ယွၤ အတၢ်မၤ လၢပပူၤန့ၣ်လီၤ. ကစၢ်ယွၤ ကတဲာ်ကတီၤဆိပာ်ပှၤ, ဒ်သိးဒီးပကမၤဂ့ၤမၤစၢၤပှၤဂုၤပှၤဂၤ အဂီၢ်န့ၣ် တၢ်သူၣ်ကညီၤသးကညီၤ, ဒီးတၢ်ကူၣ်သ့လၢ ပလိၣ်ဘၣ်အီၤန့ၣ် ကစၢ်ယွၤ ကဟ့ၣ်ညီပှၤန့ၣ်လီၤ.