ခီၣ်ဖၠူထၢၣ် (softwear) တခါန့ၣ် မ့ၢ်လၢအပှ့ၤကလံၤဘၣ်အဃိ, ဘဲ(န) (Ben) ပှ့ၤသူဝဲဒၣ်လၢ တၢ်အါနံၣ်အါလါအတီၢ်ပူၤန့ၣ်လီၤ. တၢ်မၤအံၤမ့ၢ်တၢ်မၤကမၣ်တၢ်ထုးထီၣ်ရၤလီၤခွဲးယာ်အတၢ်ဘျၢသဲစးဘၣ်ဆၣ်, တထံၣ်ဝဲဒၣ်ဒ်တၢ်မၤလၢအကမၣ်ဘၣ်န့ၣ်လီၤ. မ့ၢ်လၢပှၤအါဂၤမၤဝဲ တၢ်ဒ်သိးအံၤအဃိ, ဘၣ်မနုၤအဃိ, ကဘၣ်ပှ့ၤသူ softwear အခီၣ်ထံးခီၣ်ဘိန့ၣ်လဲၣ်. မ့ၢ်မတၤကဟဲဃုသ့ၣ်ညါတၢ်အံၤန့ၣ်လဲၣ်.
ဘၣ်ဆၣ်, ဘဲ(န) မ့ၢ်ပှၤစူၢ်က့ၤနာ်က့ၤတၢ်သီသီ, လၢအတၢ်စူၢ်တၢ်နာ် ဒိၣ်ထီၣ်အါထီၣ်တဂၤန့ၣ် နၢ်ဟူဘၣ်ဝဲ တၢ်စံးကတိၤသကိးတၢ်ဂ့ၢ်ဘၣ်ဃးဒီး, တၢ်အိၣ်မူအိၣ်ဂဲၤ, ဒ်ယွၤအနီၣ်ထိၣ်အသိးအဂ့ၢ်ဝံၤန့ၣ်ဒီး, အဝဲစးထီၣ်ဆိကမိၣ်ဝဲ “တၢ်မၤတၢ်တီတီလိၤလိၤန့ၣ် မ့ၢ်တၢ်မနုၤလဲၣ်” န့ၣ်လီၤ.
softwear လၢအတဖိးမံသဲစးတဖၣ်အလီၢ်န့ၣ် ဘဲ(န) ပာ်လီၤအသးလၢကစူးကါဝဲ softwear အခီၣ်ထံးခီၣ်ဘိတဖၣ်န့ၣ်လီၤ. တၢ်သ့ၣ်တဖၣ်အံၤ အပှ့ၤကလံၤဒိၣ်ဘၣ်ဆၣ်, ဒုးသ့ၣ်ညါဝဲဒၣ်အတံၤသကိးတဖၣ်လၢ “ကစၢ်ယွၤသ့ၣ်ညါ, ဒီးကစၢ်ယွၤအဲၣ်ဒိးဝဲလၢ ပကမၤတၢ်တီတီလိၤလိၤ, တမ့ၢ်ဘၣ်ဧါ” န့ၣ်လီၤ.
လံာ်ဝံဧၤမိၣ် အဆၢဒိၣ် ၇ အပူၤန့ၣ် ကစၢ်ယွၤ ဒုးသ့ၣ်နီၣ်ထီၣ် ပှၤအ့ၣ်စရ့လးဖိတဖၣ်လၢ ကယဲၢ်ပှၤခဲလၢာ်,ဃုာ်ဒီးအပှၤကလုာ်လၢအဃုထၢတ့ၢ်ဝဲတဖၣ်န့ၣ် ကဘၣ်အိၣ်မူမၤထွဲ အနီၣ်ထိၣ်တဖၣ်လီၤတံၢ်လီၤဆဲး, တဘၣ်နီၤဖးတၢ်အဒူၣ်အဆၢဘၣ်
န့ၣ်လီၤ. ကစၢ်ယွၤ အတၢ်မၤလိာ်, ဒီးတၢ်အိၣ်မူလုၢ်လၢ် အနီၣ်ထိၣ်တဖၣ် ကဘၣ်မ့ၢ်ဝဲဒ် “နီၢ်ထူၣ်ပျံၤတဘိ” (:၈) န့ၣ်လီၤ. ပိးလီအံၤ, မ့ၢ်တၢ်စၢထီဃာ်စၢၢ်သၣ်လၢပျံၤတဘိ, ဒ်သိးကထိၣ်လိၤ တၢ်သူၣ်ထီၣ်အဒူၣ်, ကအိၣ်ဆၢထၢၣ်လိၤလိၤဘျၢဘျၢအဂီၢ်, ပှၤတ့ဘှီတၢ်သူၣ်ထီၣ်သ့ၣ်တဖၣ် စူးကါဝဲဒၣ်န့ၣ်လီၤ.
ကစၢ်ယွၤ ကတဲာ်ကတီၤမၤလဲၢ်အါထီၣ် အတၢ်သူၣ်ကညီၤသးကညီအကတီၢ်, ကထိၣ်ဃူဆီတလဲ အတၢ်တီတၢ်လိၤန့ၣ် တန့ၢ်တသ့ဝဲအဃိ, လၢပတၢ်ဒဲးဘးအဘူးအလဲအဂီၢ်, ဆှၢလီၤဝဲ အဖိခွါ ကစၢ်ယ့ၣ်ရှူး, ဒ်သိးကတူၢ်သံအသးလၢပဂီၢ်န့ၣ်လီၤ. မ့ၢ်ပလဲာ်တၢ်လၢယွၤအကျဲဧိၤအကပိၤဧါ, ပတလဲၤဧါန့ၣ် လံာ်စီဆှံ ဒုးနဲၣ်ပာ်ဖျါဝဲဒၣ်ပှၤ န့ၣ်လီၤ. မ့ၢ်လၢယွၤအဘျုးအဖှိၣ်အဃိ, ပှၤစူၢ်က့ၤနာ်က့ၤကစၢ်ယ့ၣ်ရှူးသ့ၣ်တဖၣ် ကမၤတၢ်တီတီလိၤလိၤ, ကအိၣ်မူကျိၤကျဲလၢအမၤမုာ်ယွၤအသး, ဒီးလၢတၢ်မၤလၤကပီၤယွၤအဂီၢ်, ကစၢ်ယွၤ ကမၤစၢၤဝဲဒၣ်န့ၣ်လီၤ.
