ကီၢ် “England” အပှၤလိာ်ကွဲဖျၢၣ်ထူတဖုန့ၣ် ကလိာ်ကွဲပြၢ ယူရပၤ ထံကီၢ်တဖၣ် အခိၣ်ဖးအဂီၢ်, ဘၣ်ဂုာ်ကျဲးစၢးဝဲ ယဲၢ်ဆံယဲၢ်နံၣ်, ဒီးအကတၢၢ်န့ၣ် ဘၣ်လိာ်ကွဲသတြီၤဝဲဒၣ်ဒီးကီၢ် “Italy” န့ၣ်လီၤ. လၢခံ, ထံကီၢ်မတၤတဘ့ၣ် ကဒိးန့ၢ် ခိၣ်ဖးတၢလဲၣ်န့ၣ် ကဆၢတဲာ်ဝဲအဂီၢ်, “England” အပှၤလိာ်ကွဲတၢ်, ပှၤသးစၢ်ဖိ “ဘူၤကၣ်ယိၣ် ဆၣ်ကၣ်” (Bukayo Saka) န့ၣ် ဒိးန့ၢ်ခွဲးယာ်လၢကဘၣ်ထူနုာ်လီၤ “penalty” လၢခံအကတၢၢ်န့ၣ်လီၤ. ဘၣ်ဆၣ်, ဆၣ်ကၣ် ထူနုာ်ဝဲ ဖျၢၣ်ထူန့ၣ် “Italy” အပှၤခိးကိ (goalkeeper) ပီၣ်ချုးန့ၢ်ဝဲဒၣ်န့ၣ်လီၤ. ပှၤအဲကလံးဖိ လၢအဟ့ၣ်ဂံၢ်ဟ့ၣ်ဘါတၢ်ဖိတဖၣ် ဟီၣ်သံယၢၤသံ, ဒီးအဝဲသ့ၣ်တဒိးန့ၢ်ဝဲဒၣ် ခိၣ်ဖးတၢလၢၤဘၣ်န့ၣ်လီၤ.
တၢ်ဂ့ၢ်လၢအပိာ်ထွဲထိၣ်အခံန့ၣ် တမ့ၢ်လၢပှၤတနီၤကသးပ့ၢ်နီၣ်ဝဲဒၣ်ဘၣ်. ကီၢ်အဲးကလံးပှၤလိာ်ကွဲဖျၢၣ်ထူဖိတဖၣ် အပှၤဘၣ်မူဘၣ်ဒါအခိၣ် ကၤရဲး(သ) စီးက့း (Gareth Southgate) လဲၤဝဲဒၣ်ဆူ ဆၣ်ကၣ်, လၢအသူၣ်ဟးဂီၤသးဟးဂီၤတဂၤအအိၣ်, ဒီးဖိးဟုဟ့ၣ်ဂံၢ်ဟ့ၣ်ဘါအီၤန့ၣ်လီၤ. ဆၣ်ကၣ် အသးတူၢ်ဘၣ်ဝဲဒ်လဲၣ်န့ၣ် အဝဲသ့ၣ်ညါဝဲဒၣ်န့ၣ်လီၤ. ဖဲ ၁၉၉၆ နံၣ်န့ၣ် စီးက့း အနီၢ်ကစၢ်ဒၣ်ဝဲ မ့ၢ်ပှၤသးစၢ်တဂၤ, လိာ်ကွဲဝဲဒၣ်လၢ အထံကီၢ်အဂီၢ်, ဒီးထူဝဲ “penalty” တနုာ်လီၤအဃိ, ကီၢ်အဲကလံး အပှၤလိာ်ကွဲဖျၢၣ်ထူတဖု ဘၣ်ဟးထီၣ်ဝဲဒၣ်လၢ တၢ်ပြၢန့ၣ်လီၤ. အကတီၢ်ဖဲန့ၣ်, ကီၢ်အဲးကလံးပှၤလိာ်ကွဲဖျၢၣ်ထူဖိတဖၣ် အပှၤဘၣ်မူဘၣ်ဒါအခိၣ် ထဲရံၣ် ဘၤနဘဲ(စ) (Terry Venables) မၤမုာ်ထီၣ်က့ၤအသးဒ်သိးအံၤန့ၣ်လီၤ.
စီၤပီလူး စံးဘၣ်ပှၤလၢ “ယွၤပကစၢ်ယ့ၣ်ရှူးခရံာ်အပၢ်,… မ်အဘၣ်တၢ်စံးထီၣ်ပတြၢၤအီၤတက့ၢ်. အဝဲဒၣ်မၤမုာ်ထီၣ်ပှၤလၢ ပတၢ်နးတၢ်ဖှီၣ်ခဲလၢာ်အပူၤ, ဒ်သိးပကမၤမုၣ်ထီၣ် ပှၤလၢအဘၣ်တၢ်နးတၢ်ဖှီၣ်တမံၤမံၤ, လၢတၢ်မၤမုာ်လၢယွၤမၤမုာ်ပသးန့ၣ်လီၤ” (၂ ကရံၣ် ၁:၃-၄). စီးက့း ဒိးန့ၢ်ဝဲ တၢ်မၤမုာ်ထီၣ်က့ၤအသး, လၢ ဘၤနဘဲ(စ) အအိၣ်န့ၣ် ဒ်အဝဲစိာ်ခီဟ့ၣ်နီၤဝဲဆူ ဆၣ်ကၣ် အအိၣ်အသိး, စီၤပီလူး သ့ၣ်ညါနၢ်ပၢၢ်ဝဲဒၣ် လၢအတၢ်နးတၢ်ဖှီၣ်အပူၤ, ကစၢ်ယွၤ အတၢ်မၤမုာ်ထီၣ်က့ၤအီၤန့ၣ် ကဲထီၣ်တၢ်ဂံၢ်တၢ်ဘါလၢ ကမၤမုၣ်ထီၢ်က့ၤ ပှၤဂုၤပှၤဂၤ, ဒီးဒုးအိၣ်ထီၣ် တၢ်သူၣ်စူၤသးစူၤလၢအဝဲသ့ၣ်အဂီၢ် (:၆) န့ၣ်လီၤ. “တၢ်မၤမုာ်ခဲလၢာ်အကစၢ်” (:၃) တဂၤအံၤ စူးကါပတၢ်နးတၢ်ဖှီၣ်, ဒီးဒုးအိၣ်ထီၣ် တၢ်ဂ့ၤတၢ်ဝါသ့ဝဲဒၣ်န့ၣ်လီၤ.
ဒ်သိးပကဒုးအိၣ်ထီၣ် တၢ်ဟ့ၣ်ဂံၢ်ဟ့ၣ်ဘါမၤမုာ်လိာ်က့ၤပသး အထးသွဲလၢအကတၢၢ်တအိၣ်အဂီၢ်, မ်ပကစိာ်ခီဟ့ၣ်နီၤတၢ်တမံၤဃီ, တၢ်လၢကစၢ်ယွၤ မၤမုာ်ထီၣ်က့ၤပှၤန့ၣ်တက့ၢ်.
