ပျိၢ်ချၢသကူးပီၣ်လဲၣ်အညၣ်တီသွ့အမိၢ်ဖးဒိၣ်လၢ အတယၢၢ်အဃၢန့ၣ် ကအိၣ်ဝဲ ယဲၢ်ဆံ တၢၣ် (Ton) တဘ့ၣ်, လဲၤနုာ်လီၤဘျးထီဃာ်အသးလၢ ဆွဲၣ်အစၤအပျံၤတဖၣ်အပူၤ,ဖဲ ခဲလံၣ်ဖိနံယၤ (California) ပီၣ်လဲၣ်ကၢၢ်နံၤအထံကျါန့ၣ်လီၤ. ပျံၤတဖၣ်အထီန့ၣ်အိၣ်ဝဲဒၣ် ခီၣ်ယီၢ်လၢ အကယၤ, ဒီးထုတဖၣ်အဃၢန့ၣ် ကအိၣ်ဝဲဒၣ် ပီၣ် (Pound) လၢအကယၤတဖၣ် ဝံာ်ပကၠံးထီဃာ် ညၣ်ဖးဒိၣ်တဘ့ၣ်အံၤအဃိ, ဒ်သိးအသုတလီၤဘျၢဝဲဆူ ထံယိာ်အပူၤအဂီၢ်, ဘၣ်ဂုၢ်ကျဲးစၢးထိၣ်ကဖီအသးလၢ ထံအဖီခိၣ်န့ၣ်လီၤ. ၦၤယူၤထံလွံၢ်ဂၤ ယူၤထံလၢအဖီလာ်, ဒီးမၤထူၣ်ဖျဲးအီၤန့ၣ်လီၤ. အဝဲသ့ၣ် ဒီၣ်တဲာ်ကွံာ်ပျံၤတဖၣ်န့ၣ် ကယံာ်ဝဲ တနၣ်ရံၣ်ဃၣ်ဃၣ်, ဒီးညၣ်ဖးဒိၣ် မ့ၢ်ဝံၣ်ဝၢ်တပျုာ် အမဲၢ်န့ၣ် ပှၤယူၤထံတဖၣ်အသးသမူလီၤမၢ် သ့ဝဲအဃိ, တၢ်မၤအံၤ တၢ်ဘၣ်ယိာ်အလီၢ်အိၣ်ဝဲဒၣ်န့ၣ်လီၤ. အဝဲသ့ၣ် မၤထူၣ်ဖျဲးအီၤဝံၤႇ ကဘၣ်ဃ့ၢ်ပူၤဖျဲးအသးတကီၢ်ခါအလီၢ်န့ၣ်, ဟဲသုးဘူးအသးဘူးဘူးတံၢ်တံၢ်ဆူ ၦၤယူၤထံတဂၤစုာ်စုာ်အအိၣ်န့ၣ်လီၤ. ၦၤယူၤထံလၢအမၤထူၣ်ဖျဲးအီၤအကျါ,တဂၤန့ၣ် စံးဝဲဒၣ်လၢ “ယသးကလၢၢ်ဘၣ်ယဲဒ်အဝဲစံးဘျုးစံးဖှိၣ်ၦၤ” န့ၣ်လီၤ.
ပီၣ်လဲၣ်ညၣ်တီသွ့တဖၣ် ပာ်ဖျါဝဲ အတၢ်စံးဘျုးစံးဖှိၣ် သ့ဂ့ၤ, တသ့ဂ့ၤႇ ပဝဲပှၤဟီၣ်ခိၣ်ဖိတဖၣ်န့ၣ် တၢ်သ့ၣ်ညါဆၢက့ၤ တၢ်ဘျုးတၢ်ဖှိၣ်န့ၣ် မ့ၢ်တၢ်အကါဒိၣ်နီၢ်နီၢ်တမံၤန့ၣ်လီၤ. လၢပသးသမူအတၢ်လဲၤဒီးကစၢ်ယွၤအပူၤန့ၣ် တၢ်သ့ၣ်ညါဆၢက့ၤ ယွၤအဘျုးအဖှိၣ်န့ၣ် မ့ၢ်တၢ်အကါဒိၣ်တမံၤန့ၣ်လီၤ. ပှၤအါဂၤ စံးဘျုးစံးဖှီၣ်ယွၤလၢ တၢ်ဆိၣ်ဂ့ၤ အဒိၣ်အထီတဖၣ် (ဖိသၣ်အိၣ်ဖျဲၣ်, ဘျါဂ့ၤထီၣ်က့ၤလၢတၢ်ဆူးတၢ်ဆါ) အဂီၢ်န့ၣ်လီၤ. ဘၣ်ဆၣ်, စီၤပီလူး စံးဘၣ်ပှၤလၢ “စံးထီၣ်ပတြၢၤ ပၢ်ယွၤအဘျုးအဖှိၣ် တဘိယူာ်ဃီ” (အ့းဖ့း ၅:၂ဝ) န့ၣ်လီၤ. ပကဘၣ်စံးဘျုးစံးဖှိၣ်ယွၤလၢ ကယဲၢ်တၢ်ဟ့ၣ်လၢပဒိးန့ၢ်အီၤခဲလၢာ်အဂီၢ်, တၢ်ဂ့ၤတၢ်ဝါအဆံးဖိလၢပလဲၤခီဖျိဘၣ်အီၤခဲလၢာ်အဂီၢ်န့ၣ်လီၤ. တမ့ၢ်လၢ ပကဘၣ်မၤအီၤ တဘျီတခီၣ်ဘၣ်. တမ့ၢ်လၢ တၢ်ဂ့ၢ်လီၤဆီအိၣ်အကတီၢ်ဘၣ်. ပကစံးဘျုးယွၤ တဘိယူာ်ဃီ, ဒီးလၢတၢ်မၤလီၤတံၢ်က့ၤအတၢ်ကတိၤအဂီၢ်, စီၤပီလူး ပာ်ဖျါအါထီၣ်ဝဲ “ၦ့ၤက့ၤအဆၢကတီၢ်တက့ၢ်” ဒီးလၢ “တၢ်ခဲလၢာ်အဃိ” (:၁၆,၂ဝ) စံးထီၣ်ပတြၢၤယွၤတက့ၢ်န့ၣ်လီၤ.
တၢ်သ့ၣ်ညါဆၢက့ၤ တၢ်ဘျုးတၢ်ဖှိၣ်နီၢ်နီၢ်န့ၣ် ဒိၣ်န့ၢ်ယိာ်န့ၢ်ဒံးတၢ်ကတိၤလၢ ပစံးကတိၤအီၤ ဖဲတၢ်ဂ့ၢ်လီၤဆီအိၣ်ဝဲအကတီၢ်, ဒီးမ့ၢ်ဝဲဒၣ် ပတၢ်အိၣ်မူက့ၢ်ဂီၤန့ၣ်လီၤ. တၢ်သ့ၣ်ညါဆၢက့ၤတၢ်ဘျုးတၢ်ဖှိၣ်န့ၣ် ဃၣ်တရံးက့ၤပှၤဆူ ယွၤအအိၣ်တဘျီဝံၤတဘျီႇ ဒီးလၢတၢ်မၤလၤကပီၤယွၤအဂီၢ်, စံးထီၣ်ပတြၢၤယွၤတဘိယူၢ်ဃီန့ၣ်တက့ၢ်.