ကၠ့ (Jay) အလံာ်စီဆှံ အိၣ်ဝဲတဘ့ၣ်, ဘၣ်တၢ်ထုးထီၣ်ရၤလီၤအီၤလၢ ကံးဒဧိၣ် လံာ်စီဆှံကရၢ (Gideon Bible) န့ၣ်လီၤ. ဘၣ်ဆၣ်, ဒ်သိးကတူၢ်လိာ်ဝဲ လံာ်စီဆှံ အတၢ်လီၤလိၢ်လီၤလးတဖၣ်အဂီၢ်, အသးလၢအသ့ပဲာ်ထံနီၤဖးတၢ်န့ၣ် တပျဲအီၤဘၣ်န့ၣ်လီၤ. ဘၣ်ဆၣ်, တၢ်လၢအမၤတံာ်တာ်အသးန့ၣ် အတံၤသကိးတဂၤ, အတၢ်စူၢ်တၢ်နာ်အမ့ၢ်အတီတမံၤန့ၣ်လီၤ. လၢတၢ်န့ၣ်အဃိ, ကၠ့ ဃ့ထုကဖၣ်ဝဲဒၣ် လီၤလီၤဆီဆီတထံၣ်, ဒီးတဲဝဲ ကစၢ်ယွၤ, “နမ့ၢ်အဲၣ်ဒိး ယစူၢ်က့ၤနာ်က့ၤနၤန့ၣ်, ဒုးနဲၣ်ယၤ တၢ်လၢယသ့ၣ်ညါနၢ်ပၢၢ်အီၤတသ့မံၤမံၤတက့ၢ်” န့ၣ်လီၤ.

ဘၣ်ဖဲမုၢ်တနံၤန့ၣ် တၢ်ထိၣ်ဂဲၤထီၣ် ကၠ့ လၢ, ကလူၤကွၢ်ဃု အလံာ်စီဆှံ, ဒီးတထံၣ်ဝဲ အလံာ်စီဆှံဘၣ်. တၢ်အံၤတမ့ၢ်ဒ်ဘၣ်. အတၢ်ဖိတၢ်လံၤတဖၣ် တဟါမၢ်ဝဲနီတဘျီဘၣ်.

ကၠ့ နီၣ်အသိလ့ၣ်လၢတၢ်စူၤကျါ, ဒီးလဲၤဝဲဆူ စူရံးဖၠၣ်စိမိၤ (Zurich University), လၢအသိၣ်လိတၢ်အလီၢ်န့ၣ်လီၤ. ဖဲအဝဲစံၣ်လီၤလၢ အသိလ့ၣ်န့ၣ်ဒီး, လၢတၢ်အဒါလၢၢ်ဘ့ၣ်ဘၣ် အမဲာ်ဖံးခိၣ်လိၤန့ၣ် ထံၣ်ဝဲ လံာ်စီဆှံတဘ့ၣ် လၢမူခိၣ်ထံအကျါန့ၣ်လီၤ. မ့ၢ်တၢ်လီၤဆီလၢအဂီၢ်န့ၣ်လီၤ. ကၠ့ ထၢထီၣ် လံာ်စီဆှံ, ဒီးထံၣ်ဝဲဒၣ်လၢ လံာ်စီဆှံန့ၣ် အိၣ်ဝဲလၢတၢ်စူၤကျါဘၣ်ဆၣ်, ထံတဘၣ်စီၣ်အီၤနီတစဲးဘၣ်န့ၣ်လီၤ. တၢ်မၤအသးအံၤ, မ့ၢ်တၢ်လၢ ကၠ့ ကပာ်ဖျါဆှဲထီၣ်ဝဲတန့ၢ်တသ့ဘၣ်တမံၤန့ၣ်လီၤ.

ကံးဒဧိၣ် အလံာ်စီဆှံတဖၣ်န့ၣ် ဘၣ်တၢ်ယုၢ်န့ၢ်အမံၤလၢ အံၣ်စရ့လး အၦၤဒူၦၤဃိၤလၢလံာ်စီဆှံအလီၢ်လံၤအပူၤန့ၣ်လီၤ. ဖဲကစၢ်ယွၤဃုထၢ စီၤကံးဒဧိၣ်, ဒ်သိးကနဲၣ်ဆှၢ ၦၤအံၣ်စရ့လးဖိလၢ ကဒုးထီဒါ သုးမုၢ်ဖးဒိၣ်တဖုအကတီၢ်, စီၤကံးဒဧိၣ် အသးဒ့ဒီဝဲဒၣ်ဒိၣ်မးန့ၣ်လီၤ. လၢတၢ်န့ၣ်အဃိ, အဝဲစံးဘၣ် ကစၢ်ယွၤလၢ “ကွၢ်ကွၢ် ယကပာ်လီၤ သိအဆူၣ်တလိၣ် လၢကြဲၢ်ပူၤလီၤ. ပစီၤထံမ့ၢ်အိၣ်ထဲလၢ သိအဆူၣ် တလိၣ်အလိၤဧိၤႇ ဒီးဃ့ဝဲလၢဟီၣ်ခိၣ်ခဲလၢာ်အဖီခိၣ်ဒီးႇ ယကသ့ၣ်ညါလၢ နကအုၣ်က့ၤခီၣ်က့ၤအံၣ်စရ့လး လၢယစုပူၤ” (စံၣ်ညီၣ် ၆:၃၇) န့ၣ်လီၤ. ကစၢ်ယွၤ စံးဆၢဝဲဒၣ် စီၤကံးဒဧိၣ် အတၢ်တၤန့ၣ် တမ့ၢ်ဝဲဒၣ်ထဲတဘျီဧိၤဘၣ်. ယွၤ စံးဆၢဝဲ ခံဘျီ (:၃၉-၄ဝ) န့ၣ်လီၤ.

တၢ်ထုကဖၣ်, လၢအၦဲၤဒီးတၢ်သးဒ့ဒီန့ၣ် တမ့ၢ်က့ၢ်ဂီၤဒိလၢ ပကမၤထွဲအီၤဘၣ်ဆၣ်, တၢ်ထုကဖၣ်ဒ်သိးအံၤန့ၣ် ပာ်ဖျါထီၣ် ကစၢ်ယွၤအသူးသ့ၣ်ကံၢ်စီသ့ဝဲန့ၣ်လီၤ. စီၤကံးဒဧိၣ်နဲၣ်ဆှၢဝဲဒၣ် အသုးမုၢ်အဆံးဖိတဖုဆူ တၢ်မၤနၢၤ တၢ်ဒုးတၢ်ယၤဖးဒိၣ် (စံၣ်ညီၣ် ၇) န့ၣ်လီၤ. ကၠ့ စူၢ်က့ၤနာ်က့ၤ ကစၢ်ယ့ၣ်ရှူး, သ့ၣ်ညါဝဲလၢ အတၢ်ထုကဖၣ်န့ၣ် ဘၣ်တၢ်စံးဆၢအီၤလၢတၢ်အဲၣ်ကစၢ်ယွၤ, လၢအမၤဝဲ တၢ်လၢပပာ်ဖျါဆှဲထီၣ်တသ့တဂၤန့ၣ်လီၤ.