ဒဲနယၢၣ် (Daniel) အိၣ်ဖျဲၣ်ဝံၤလဲၤတုၤလၢ ရိၣ်မ့နံယၤဖိၣ်ဃဲအဟံၣ်န့ၣ်လီၤ. နွံနံၣ် အတီၢ်ပူၤ, ထဲဒၣ်ကလုၢ်ဝဲထံအဂီၢ်န့ၣ် အိၣ်ဟးထီၣ်ဝဲဒၣ်လၢ အလီၢ်မံခးန့ၣ်လီၤ. ဟံၣ်ဖိဃီဖိတဒူၣ်လၢထံဂၤကီၢ်ဂၤန့ၣ် လုၢ်ဖိအီၤ, ဖဲအသးအိၣ်ဃိးနံၣ်န့ၣ်လီၤ. တၢ်သဘံၣ်ဘူၣ်လၢကပိာ်ထွဲထီၣ်အခံတဖၣ်, လၢအမ့ၢ် ဒဲနယၢၣ် ကအိၣ်ဒီးတၢ်ဂ့ၢ်ကီလၢ ကတူၢ်လိာ်အဝဲသ့ၣ် ဒ်အမိၢ်အပၢ်အသိးန့ၣ် အဝဲသ့ၣ် သ့ၣ်ညါဝဲဒၣ်န့ၣ်လီၤ. ကယီကယီန့ၣ် ဒဲနယၢၣ် စးထီၣ်နာ်အဝဲသ့ၣ် န့ၣ်လီၤ. ဒ်တၢ်ဆၢကတီၢ်တဖၣ်လဲၤပူၤကွံာ်ဝဲအသိး, ဒဲနယၢၣ် မ့ၢ်ပှၤတဂၤလၢ အသးဒိၣ် သးထီၣ်တၢ်ဒိၣ်ဒိၣ်မုၢ်မုၢ်သ့ဝဲဒၣ်အဃိ, တုၤဒၣ်လဲာ်, အမိၢ်အပၢ်ခံဂၤန့ၣ် ဘၣ်ဒိးလဲၦၤခိးတၢ်ဖိတဂၤ, လၢကဒီတဒၢ အဝဲသ့ၣ်, ဒ်သိးဒီးဒဲနယၢၣ် အသုတမၤဘၣ်ဒိဆါအဝဲသ့ၣ်အဂီၢ် န့ၣ်လီၤ. အဝဲသ့ၣ်ပာ်လီၤအသးလၢ ကဃုထၢ တၢ်ကူစါယါဘျါလၢ ပှၤအါဂၤတဘၣ်သူၣ်ဘၣ်သးတမံၤန့ၣ်လီၤ. တၢ်မၤအံၤ, မ့ၢ်ဝဲဒၣ် ဆူမဲာ်ညါ ယဲၢ်နံၣ်အတီၢ်ပူၤ, ဒဲနယၢၣ် အသးမ့ၢ်ဒိၣ်ထီၣ်အၢအၢသီသီဒၣ်လဲာ်, အဝဲသ့ၣ်တဟးဖးဒီးအီၤနီတဘျီဘၣ်န့ၣ်လီၤ. ဖဲအသးၦဲၤထီၣ် တဆံသၢနံၣ် အနံၤအိၣ်ဖျဲၣ်ဆၢက့ၤအကတီၢ်န့ၣ် ဒဲနယၢၣ် အသူၣ်ကၢ်အသးလီၤ, ဒီးတဲဝဲဒၣ် အမိၢ်အပၢ်လၢတၢ်အဆိကတၢၢ်တဘျီ, လၢအအဲၣ်ဘၣ်အဝဲသ့ၣ်ဒိၣ်နီၢ်မးန့ၣ်လီၤ. အမိၢ်န့ၣ် စံးကတိၤကျၢၢ်တံၢ် အတၢ်လဲၤခီဖျိအံၤလၢ “တၢ်ဒုးအိၣ်ထီၣ် တၢ်အဲၣ်တၢ်ကွံန့ၣ် တမ့ၢ်ဝဲဒၣ် တၢ်မၤလၢပှၤကဘၣ်မၤအီၤကပုာ်လုာ်ဖိ, ဒီးလၢသးအတၢ်ဟူးတၢ်ဂဲၤအပူၤဘၣ်. မ့မ့ၢ် တၢ်အဲၣ်တၢ်ကွံစံးတၢ်န့ၣ် မ့ၢ်ဝဲတၢ်ဒုးအပျီန့ၣ်လီၤ.”

ပဝဲကိးဂၤဒဲး, လၢအဟဲအိၣ်ဖျဲၣ်ထီၣ်သ့ၣ်တဖၣ်န့ၣ် ပသ့ၣ်ညါဝဲဒၣ်လၢ ပလိၣ်ဘၣ် တၢ်တမံၤမံၤ (မ့) ပှၤတဂၤဂၤန့ၣ်လီၤ. ဒ်ဒဲနယၢၣ်အသိး, ပအိၣ်ဒီးသးအတၢ်သဘံၣ်ဘုၣ်န့ၣ်လီၤ. ဘၣ်ဆၣ်, မ့ၢ်လၢ “ယွၤအဲၣ်ဟီၣ်ခိၣ်ဖိ” ဒိၣ်မးအဃိ, မၤဝဲဒၣ်အဂ့ၤကတၢၢ်, “ဟ့ၣ်လီၤအဖိခွါအိၣ်တဂၤဃီ” (ယိၤဟၣ် ၃:၁၆), ထံၣ်လိာ်အသးဒီးၦၤ, လၢဟီၣ်ခိၣ်အတၢ်ဒုးပျီ, ဒီးပကိးဝဲဒၣ်လၢ ကစၢ်ယွၤလိၣ်ထီၣ်အသး, လၢၦၤကညီအက့ၢ်အဂီၤန့ၣ်လီၤ. “တၢ်ကပီၤဟဲလီၤလၢဟီၣ်ခိၣ်” (:၁၉) န့ၣ်လီၤ.

ကစၢ်ယွၤ မၤဝဲဒၣ်လၢာ်သူၣ်လၢာ်သး, ဒ်သိးကဒုးနဲၣ်ဝဲ အတၢ်အဲၣ်အဒိၣ်အယိာ်လၢပှၤဟီၣ်ခိၣ်သ့ၣ်တဖၣ်အဂီၢ်, ဒီးလၢနဂီၢ်န့ၣ်လီၤ. ဒ်ပၢ်တဂၤအတၢ်အဲၣ် လၢအဆူၣ်ဒိၣ်နီၢ်မး, ဒီးပာ်လီၤအသးကျၢၤမူဆှူ, လၢတၢ်သူၣ်ဆူၣ်သးဂဲၤအပူၤ, ဆၢနၢ်ဟူဝဲ တၢ်ကတိၤ “ယအဲၣ်နၤဒိၣ်မး,” ဒ်အကတၢၢ်န့ၣ် ဒဲနယၢၣ် အမိၢ်ဒီးအပၢ် နၢ်ဟူဘၣ်ဝဲအသိးန့ၣ်လီၤ.