ဖဲယအိးထီၣ် ယအီၣ်လဲ (online) စ့ပာ်ဖှိၣ် အဲး(ပ) န့ၣ်ဒီး, ယထံၣ်ယဲလၢ တၢ်ထုးထီၣ် ဝဲဒၣ် ယစ့အါန့ၢ်ဒံး ဒီလၣ် ယဲၢ်ကယၤ ခံဘျီဘၣ်ဆၣ်, တမ့ၢ် ယထုးထီၣ်အီၤဘၣ်န့ၣ်လီၤ. လၢတၢ်ဘၣ်ယိၣ်ဘၣ်ဘီဖးဒိၣ်အပူၤန့ၣ် ယဆဲးကျိးဆူ စ့တၢးလၢ ယပာ်ဖှိၣ်၊စ့, ဒီးဖျါလၢ တၢ်ဟုၣ်ခူသူၣ် ယတၢ်ဂ့ၢ်တၢ်ကျိၤတဖၣ်န့ၣ်လီၤ. ခီဖျိလၢစ့တၢးအတၢ်မၤစၢၤယၤအဃိ, ယဒိးန့ၢ်က့ၤ ယတၢ်အိၣ်မူအဂ့ၤအဝါ, ဒီးမၤသကိးတၢ်ဒီးစ့တၢး, ဒ်အလီၢ်လီၢ်ဘၣ်ဆၣ်, ယတၢ်လဲၤခီဖျိအံၤ သိၣ်လိယၤလၢ ခါဆူညါ, တၢ်ဟုၣ်တၢ်ဘျၣ် ဒ်သိးအံၤတဖၣ် အသုတကဲထီၣ်တဂ့ၤအဂီၢ်, ပကဘၣ်အိၣ်ဒီးတၢ်ပလီၢ်ပဒီသးထီဘိန့ၣ်လီၤ.
ဖဲယိၤဟၣ် ၁၀:၁၀ အပူၤန့ၣ် ကစၢ်ယ့ၣ်ရှူး ဟ့ၣ်ပလီၢ်ဝဲလၢ “တၢ်ဟုၣ်တၢ်ဘျၣ်န့ၣ် မ့တမ့ၢ်ဘၣ်ဒ်သိးကဟုၣ်တၢ်, မၤသံတၢ်, ဒီးမၤဟးဂီၤတၢ်ဒီး တဟဲဘၣ်ဝဲဘၣ်” န့ၣ်လီၤ. မ့ၢ်လၢအဝဲမၤဘျါက့ၤ ပှၤဆူးပှၤဆါလၢ မုၢ်အိၣ်ဘှံးနံၤအဃိ, တၢ်ဘူၣ်တၢ်ဘါခိၣ်နၢ် တဖၣ် လၢအကတိၤထီဒါအီၤတဖၣ်န့ၣ် (၉:၁၃-၁၅) ကစၢ်ယ့ၣ်ရှူး သိၣ်ဃီၣ်ဝဲဒၣ်န့ၣ်လီၤ. ကစၢ်ယ့ၣ်ရှူး ဒုးနဲၣ်ဖျါထီၣ် အဝဲသ့ၣ်အတၢ်ပာ်သူၣ်ပာ်သးလၢ ကဟုၣ်တၢ်, ကမၤသံတၢ်, ဒီးကမၤဟးဂီၤတၢ်န့ၣ်လီၤ. ပနီၢ်သးအဒုၣ်အဒါ, မုၢ်ကီၤလံၢ်န့ၣ် ကူၣ်ခူသူၣ်ဝဲဒၣ် ဒ်သိးကဟုၣ်ဟံးန့ၢ် ပတၢ်သ့ၣ်ညါနၢ်ပၢၢ် ကစၢ်ယွၤ အဘျုးအဖှိၣ်, ဒီးတၢ်သဘျ့လၢကစၢ်ယ့ၣ်ရှူး ကတဲာ်ကတီၤန့ၢ်ပှၤ ခီဖျိလၢအတၢ်ဒိးသံအသးန့ၣ်လီၤ. တၢ်မုၢ်လၢ်, ဒီးတၢ်မၤစၢၤန့ၣ် အိၣ်ဟဲဆိတ့ၢ်ဝဲ, လၢလံာ်စီဆှံအဆၢဒိၣ်အံၤအပူၤ, ဖဲ ကစၢ်ယ့ၣ်ရှူး ဒုးနဲၣ်ဖျါထီၣ်အသး, ဒ်အမ့ၢ် ပှၤကွၢ်သိလၢအဂ့ၤတဂၤ, ကိးအသိဖိတဖၣ် လၢအမံၤ (၁၀:၂-၄) န့ၣ်လီၤ. ပှၤကွၢ်သိလၢအဂ့ၤတဂၤ အသိတဖၣ်န့ၣ် “မ့ၢ်လၢတသ့ၣ်ညါဘၣ်ပှၤတမှံၤ (တၢ်ဘျၣ်) အကလုၢ်ဘၣ်အဃိ, ကဃ့ၢ်ကွံာ်လၢအအိၣ်” (:၅) န့ၣ်လီၤ.
လၢဟီၣ်ခိၣ်ချၢအံၤ, ဘၣ်တဘျီဘျီန့ၣ် ပထံၣ်လီၤက့ၤပသးလၢ ပဘၣ်တၢ်မၤအၢမၤနးပှၤလၢ တၢ်အၢတၢ်သီအစိကမီၤန့ၣ်လီၤ. ဘၣ်ဆၣ်, ပယွၤလၢ အအဲၣ်ပှၤကွံပှၤတဂၤန့ၣ် ကွဲမုာ်ပှၤလၢ ပကအိၣ်မူမၤလိ တၢ်သ့နီၤဖးပဲာ်ဖးတၢ်, ဒ်သိးပကသ့ၣ်ညါနီၣ်, ဒီးပဒ့ၣ်ဟးဆှဲး ပဒုၣ်ပဒါလၢ အသးအိၣ်ဟုၣ်န့ၢ်ပှၤ, မၤသံပှၤ, ဒီးမၤဟးဂီၤပှၤတဖၣ်အကလုၢ်န့ၣ်လီၤ. ဖဲပကျဲးစၢးဒိကနၣ် ပပှၤကွၢ်သိလၢအဂ့ၤတဂၤ အကလုၢ်န့ၣ်ဒီး, ဒ်သိးပကန့ၢ်ဘၣ် တၢ်မူ “အါအါကလဲာ်” (:၁၀) အဂီၢ်, ပနာ်န့ၢ်အီၤ သ့ဝဲဒၣ်န့ၣ်လီၤ.