ဒီကလး(စ)ခဲး(ထ), (Douglas Kent) န့ၣ် ဒ်အမ့ၢ် ပှၤကူၣ်သ့စဲၣ်နီၤလၢ တၢ်တ့ဟီၣ်ခိၣ်က့ၢ်ဂီၤ အတၢ်ဃံတၢ်လၤတဂၤအသိး, ဖဲ ၂၀၂၅ နံၣ်န့ၣ် သ့ၣ်ပှၢ်မ့ၣ်အူအီၣ်မၤဟးဂီၤတၢ်နးနးကျံးကျံးဝံၤ, ဟးလူၤကွၢ်ဝဲဒၣ် မ့ၣ်အူအီၣ်တၢ်အလီၢ်အကျဲ လၢဝ့ၢ် လီး(စ) အ့ကၠၢၣ်လံး (Los Angeles) အခိၣ်အဃၢတဖၣ်န့ၣ်ဒီး, မ့ၣ်အူအီၣ်အဃိ, သိလ့ၣ်တဖၣ် လၢအပှံၢ်လီၤ, ဒီးတၢ်သူၣ်ထီၣ်ဟးဂီၤတဖၣ် အကပိာ်အကပၤန့ၣ် ထံၣ်ဘၣ်ဝဲလၢ သ့ၣ်တဖၣ်န့ၣ် အိၣ်မူဒံးဝဲ, အိၣ်ဒီးအလၣ်လါဟ့တဖၣ် လၢတၢ်လီၤကမၢကမၣ်ဖးဒိၣ်အပူၤန့ၣ်လီၤ. ထီအထူၣ်တဖၣ် အါတက့ၢ်န့ၣ် အထူၣ်အဒ့တဖၣ် အိၣ်ဂၢၢ်ကျၢၤဝဲဒၣ်ဂ့ၤမး, ဒီးအလၣ်လါဟ့တဖၣ်, ဒီးသၣ်ထီၣ်ဝဲဒၣ်အါမးန့ၣ်လီၤ.ဘၣ်မနုၤအဃိလဲၣ်.
တၢ်ဂိၢ်ခါအကတီၢ်တၢ်ဟဲစူၤခံနံၣ် ပိာ်ထွဲထီၣ်အသးဝံၤ, သ့ၣ်အဂံၢ်တဖၣ်န့ၣ် စဲၤလီၤအသးယိာ်ယိာ်, ဒ်သိးကဆူးန့ၢ် ဟီၣ်ခိၣ်ညၣ်ထ့ၣ်ဒီးထံဧိၤနိဧိၤ, ဒီးဆှၢထီၣ်ဝဲဒၣ်ဆူ အဒ့ဒီးအလၣ်တဖၣ်အအိၣ်န့ၣ်လီၤ. မ့ၣ်အူအီၣ်တၢ်န့ၣ် ဖျါလၢအဝဲသ့ၣ် တူၢ်ခီၣ်န့ၢ်ဝဲဒၣ်န့ၣ်လီၤ ခဲး(ထ) စံးဝဲဒၣ်, “ယထံၣ်သ့ၣ်ညါဝဲဒၣ်လၢ နမ့ၢ်စဲၤလီၤနဂံၢ်ယိာ်ယိာ်န့ၣ်ဒီး, နကအိၣ်မူတ့ၢ်နဲ” န့ၣ်လီၤ.
ပတၢ်စူၢ်တၢ်နာ် လၢသးသမူအတၢ်မၤကွၢ်အကတီၢ်တဖၣ်အပူၤန့ၣ် တၢ်ကမၤအသးဒ်မ့ၣ်အူအီၣ်တၢ်အသိးန့ၣ်လီၤ. ပနီၢ်သးအဂံၢ်တဖၣ်န့ၣ် ပမ့ၢ်စဲၤလီၤအီၤ
ယိာ်ယိာ်လၢ ကစၢ်ခရံာ်, ဒီးလၢအတၢ်အဲၣ်အပူၤန့ၣ်ဒီး, ပကမ့ၢ် “ဒ်သ့ၣ်သူၣ်အသးလၢထံနံၤ, လၢအစဲၤလီၤအဂံၢ်လၢထံကျိၤအနံၤ ဒီးတုၤတၢ်ကိၢ်ဟဲဝဲဒီး, တထံၣ်ဘၣ်ဝဲဘၣ်. အလၣ်အိၣ်သံကစဲာ်, ဒီးနံၣ်လၢတၢ်တဟဲစူၤဘၣ်န့ၣ် တလီၤညွံးဘၣ်ဝဲဘၣ်. ဒီးသၣ်ထီၣ်တၤသၣ်န့ၣ် တတုာ်ဘၣ်ဝဲဘၣ်” (ယံး ၁၇:၈) န့ၣ်လီၤ.
တၢ်ကတိၤလၢ ပှၤအါဂၤဘၣ်သူၣ်ဘၣ်သးန့ၣ် ဝံယံးရမံယၤ တစံးကတိၤဝဲ နီတဘျီအဃိ, ဟ့ၣ်ပလီၢ်ဝဲဒၣ် “ပှၤလၢအသန့ၤအသးလၢပှၤကညီန့ၣ် ဘၣ်ဆိၣ်အၢဝဲ (:၅) န့ၣ်လီၤ. ပှၤသ့ၣ်တဖၣ်န့ၣ် “ကမၤသးဒ်ပထိးသ့ၣ်ဧၢ်ရၢ် လၢပှၢ်မုၢ်ကနၢအသိးန့ၣ်လီၤ. တုၤတၢ်ဂ့ၤ ဟဲဒီး, တထံၣ်ဘၣ်ဝဲဘၣ်. ဒီးကအိၣ်ကဆိးဝဲလၢ ဟီၣ်ခိၣ်ဃ့လၢပှၢ်မုၢ်ကနၢအပူၤ,
လၢဟီၣ်ခိၣ်အိၣ်ဒီးအံသၣ်, ဖဲပှၤတအိၣ်တဆိးဘၣ်လၢအပူၤ” (:၅-၆) န့ၣ်လီၤ. တၢ်နာ်သန့ၤ ကစၢ်ယွၤန့ၣ် ကမ့ၢ်တၢ်အဂ့ၤဆံးဒိၣ်လဲၣ်. ပကန့ၢ်ဂံၢ်န့ၢ်ဘါ ခီဖျိလၢယွၤအတၢ်အဲၣ်အဂၢၢ်အကျၢၤအပူၤ, ဒီးလၢတၢ်ဂ့ၢ်ကီနးနးကျံးကျံးအကတီၢ်ဒၣ်လဲာ်, ပကဘီၣ်ထီၣ်ညီထီၣ်, ဒီးဖီထီၣ်သၣ်ထီၣ် သးအတၤသၣ်တဖၣ်လၢကစၢ်ယွၤအပူၤန့ၣ်လီၤ.