နံၣ်ကယၤ ၁၉, အပှၤကွဲးထါ ကၠဲရဲး(ဒ) မဲ(န)လ့ၣ် ဟီး(ဖ)ခ့(န) (Gerard Manley Hopkins), အထါတယုၢ်, လၢအမ့ၢ် “ကစၢ်ယွၤ အတၢ်ကဟုကညီၢ်” (God’s Grandeur) န့ၣ် ပှၤကွဲးထါတဂၤအံၤ, လၢတၢ်မၤလၤကပီၤ ကစၢ်ယွၤ အတၢ်ဘၣ်တ့ လၢကျိၤကျဲအကလုာ်ကလုာ်အဂီၢ်, ကွဲးပာ်ဖျါမၤပှဲၤက့ၤအသဟီၣ်- လၢအအိၣ်ပှဲၤဒီး “ကစၢ်ယွၤ အတၢ်ကဟုကညီၢ်” န့ၣ်လီၤ. ယွၤအလၤကပီၤ လၢအလီၤလိၢ်လီၤလးန့ၣ် ဟီး(ဖ)ခ့(န) ပာ်ဖျါထီၣ်ဝဲလၢ မ့ၣ်အူလၣ်လၢအကဲၤထီၣ်, ဒီးဆဲးကပြုၢ်ကပြီၤ ဒ် “ထးဘ့ၣ်ကဘျဲးအလွဲၢ်ဆဲးကပြ့ၢ်တၢ်အသိး” န့ၣ်လီၤ. ဘၣ်ဆၣ်, ယွၤအတၢ်ဃံတၢ်လၤ မ့ၢ်မူဂဲၤဖျါဒ်သိူအံၤဒၣ်လဲာ်, ဘၣ်မနုၤအဃိ, ပှၤအါဂၤ တထံၣ်, တသ့ၣ်ညါဝဲဒၣ်လဲၣ်. တၢ်ဂ့ၢ်တမံၤလၢ ဟီး(ဖ)ခ့(န) ပာ်ဖျါထီၣ်ဝဲဒၣ်န့ၣ် မ့ၢ်လၢကယဲၢ်တၢ်ခဲလၢာ်န့ၣ် ပှၤဟီၣ်ခိၣ်ဖိတဖၣ် ကၢၢ်ဘံၣ်ကၢၢ်ဘၢဝဲလၢ “ပှၤကညီ အတၢ်ဘၣ်အၢဘၣ်သီ,” ဒီး “ပှၤကညီ အစိအတၢ်နၢတၢ်နွါ” တဖၣ်အဃိ, ဒီးပှၤအါဒံအါဂၤန့ၣ် ထံၣ်လီၤဒၣ်ထဲအကစၢ်အသးဒၣ်ဝဲ, ဒီးတထံၣ်တၢ်အဂၤလၢၤဘၣ်န့ၣ်လီၤ.

ထါစံးထီၣ်ပတြၢၤ (၁၀၄) စ့ၢ်ကီး, မ့ၢ်ထါတယုၢ်လၢ အစံးထီၣ်ပတြၢၤ ယွၤအတၢ်ဃံတၢ်လၤ လၢတၢ်ဘၣ်တ့အပူၤန့ၣ်လီၤ. ပှၤကွဲးထါ စူးကါဝဲဒၣ် တၢ်အဒိအတဲာ်တဖၣ် ဖျိဖျိဖျါဖျါ, ဒီးပာ်ဖျါထီၣ် ကစၢ်ယွၤ “ကူသိးဒီးတၢ်လၤကပီၤ, ဒီးတၢ်ကဟုကညီၢ်” (:၁), ဒုးနဲၣ်ဖျါထီၣ်ဝဲ အတၢ်ဃံတၢ်လၤ, အတၢ်စိတၢ်ကမီၤ, အတၢ်ကဟုကယာ် ခီဖျိလၢ ကလံၤဒီးမ့ၣ်အူ (:၄), လီသီၣ်, ဒီးလပီတဖၣ်” (:၇), ထံ, နီၣ်ဧိၤမံၤဧိၤ, ဒီးသ့ၣ်မုၢ်ဝၣ်ဘိတဖၣ် (:၁၀-၁၆) န့ၣ်လီၤ.

ပသ့ၣ်ညါမ့ၢ်ဂ့ၤ, ပတသ့ၣ်ညါမ့ၢ်ဂ့ၤ, ထီဘိန့ၣ် တၢ်ဟ့ၣ်တဖၣ် အိၣ်ဝဲဒၣ်အါမး, လၢတၢ်ကတဲာ်ကတီၤမၤလၢပှဲၤ ပနီၢ်ခိ, ဒီးပနီၢ်သး (:၁၅), ဒီးဒုးနဲၣ်ဝဲဒၣ် “ယွၤအလၤကပီၤ” (:၃၁) လၢပဂီၢ်န့ၣ်လီၤ. ဟီး(ဖ)ခ့(န) မၤကတၢၢ်ဝဲဒၣ် အထါလၢ, “ပှၤဟီၣ်ခိၣ်ဖိတဖၣ် မ့ၢ်တထံၣ်, တသ့ၣ်ညါ ကစၢ်ယွၤ အလၤကပီၤဒၣ်လဲာ်, မ့ၢ်လၢယွၤအတၢ်ဂ့ၤတၢ်ဝါတဖၣ်အဃိ, “ကယဲၢ်တၢ်ကိးမံၤဒဲးအသးကံၢ်ပူၤန့ၣ် တၢ်မၤဂ့ၤမၤသီထီၣ်က့ၤတၢ် လၢအလုၢ်ဒိၣ်ပှ့ၤဒိၣ်တမံၤန့ၣ် အိၣ်ဝဲဒၣ်ထီဘိ” န့ၣ်လီၤ. အဂ့ၢ်ဒ်အံၤ, ပမ့ၢ်ဆိကတီၢ် တစိၤဖိ, ဒီးကွၢ်ထံဆိကမိၣ်ထီၣ်န့ၣ်ဒီး, တၢ်ဂ့ၢ်ကအိၣ်ဝဲဒၣ်အါမံၤ, ဒ်သိးပထံၣ်အီၤ, စူၢ်က့ၤနာ်က့ၤအီၤ, ဒီးစံးပတြၢၤမၤလၤကပီၤ ကစၢ်ယွၤ အတၢ်ဃံတၢ်လၤ, ဒီးအတၢ်ဂ့ၤတၢ်ဝါတဖၣ် “ဖဲပအိၣ်မူဒံးအဖၢမုၢ်” (:၃၃) န့ၣ်လီၤ.