ယဖံဖးဒိၣ် ခလါရၣ် (Clara) သံလဲၤပူၤကွံာ်ဟီၣ်ခိၣ်ဝံၤ, အတၢ်ထုကဖၣ်စရီ, အထီအိၣ်ဝဲတဆံ ခီၣ်ယီၢ်အပူၤန့ၣ် အိၣ်ဒီးပှၤအမံၤအသၣ်တဖၣ်လၢ အဃ့ထုကဖၣ်န့ၢ်ဝဲဒၣ်ထီဘိန့ၣ်, မ့ၢ်ဝဲဒၣ် တၢ်လုၢ်ဒိၣ်ပှ့ၤဒိၣ်လၢ ဒူၣ်ဖိထၢဖိအဂီၢ်န့ၣ်လီၤ. တၢ်ထုကဖၣ်စရီအပူၤန့ၣ် အိၣ်ဝဲဒီးဟံၣ်ဖိဃီဖိအမံၤအသၣ်တဖၣ်, အတံၤသကိးတဖၣ်, ပှၤဂုၤပှၤဂၤလၢ အတံၤသကိးတဖၣ် ဃ့ထုကဖၣ်န့ၢ်တၢ်လၢအဂီၢ်,ဃုာ်ဒီး,ပှၤစိာ်တၢ်သးခုကစီၣ်လၢ အမံၤဟူသၣ်ဖျါတဖၣ်, တၢ်အိၣ်ဖှိၣ်သရၣ်, ဒီးကစၢ်ယွၤအခ့အပှၤတဖၣ် လၢအဝဲဃ့ထုကဖၣ်န့ၣ်လီၤ. ဟံၣ်ဒူၣ် ဃီထၢအသီတဖၣ်, ဒီးတၢ်ထုကဖၣ် သကွံၢ်ကညးလီၤတံၢ်လီၤဆဲးတဖၣ်န့ၣ် ဘၣ်တၢ်ကွဲးလီၤအီၤလၢ လံာ်ကဘျံးအကပၤ တၢ်လီၤဟိန့ၣ်လီၤ. ဖဲယထံၣ်ဘၣ် တၢ်ကွဲးတ့ၢ်နုာ် ယမိၢ် အမံၤ, ဒ်အမ့ၢ်ဖိသၣ်ဆံးတဂၤအကတီၢ်, လၢစရီအပူၤန့ၣ်ဒီး, ယသူၣ်ပိၢ်သးဝးယဲဒၣ်န့ၣ်လီၤ.

လၢသီတၢ်အိၣ်ဖှိၣ်တဖၣ်အဂီၢ်, ပှၤတၢ်မၢဖိ စီၤပီလူး ကွဲးပာ်ဖျါဝဲဒၣ် “လၢတၢ်မုၢ်လၢ် အပူၤန့ၣ် သးခုတက့ၢ်. လၢတၢ်နးတၢ်ဖှီၣ်အပူၤန့ၣ် ဝံသးစူၤတက့ၢ်. လၢတၢ်ထုကဖၣ် အဂ့ၢ်န့ၣ် မၤသပှၢ်ပှၢ်တက့ၢ်” (ရိမ့ၤ ၁၂:၁၂) န့ၣ်လီၤ. အလံာ်ပရၢအပူၤန့ၣ် ဟ့ၣ်သဆၣ်ထီၣ် ပှၤစူၢ်က့ၤနာ်က့ၤတၢ်ဖိတဖၣ် ဒ်သိးကပာ်ဖျါထီၣ်တၢ်အဲၣ်တၢ်ကွံ လၢတၢ်အိၣ်မူအိၣ်ဂဲၤအပူၤ, “သးဟ့တၢ်အၢတက့ၢ်, အိၣ်စဲဘူးဒီးတၢ်ဂ့ၤတက့ၢ်” (:၉), “လၢတၢ်ယူးယီၣ်န့ၣ် လဲၤလၢညါလိာ်သုသးတက့ၢ်” (:၁၀), “လၢကစၢ်အဂ့ၢ်န့ၣ် မၤအတၢ်တက့ၢ်” (:၁၁), ဒီး “ပှၤတမှံၤန့ၣ် လုၢ်အီၣ်လုၢ်အီသပှၢ်ပှၢ်တက့ၢ်” (:၁၃) န့ၣ်လီၤ. ကစၢ်ခရံာ် အတၢ်အဲၣ် မ့ၢ်တမၤတၢ်လၢပပူၤန့ၣ်ဒီး, တၢ်မၤအဂ့ၤသ့ၣ်တဖၣ်အံၤ ကကဲထီၣ်တၢ်ကလီကလီန့ၣ်လီၤ. ဖဲတၢ်မၤအသး ဒ်သိးအံၤအကတီၢ်, တၢ်ဃ့ထုကဖၣ် လၢတၢ်သးတီအပူၤလိၣ်ဘၣ်ဝဲဒၣ်န့ၣ်လီၤ. စီၤပီလူး ကွဲမုၢ်ဝဲဒၣ် အတံၤသကိးတဖၣ် ဒီးစံးဝဲဒၣ် “ဒ်သိးသုကဂုာ်ဃုာ်ဒီးယၤ လၢဘါထုကဖၣ် အပူၤ, လၢယဂီၢ်လၢယွၤသပှၢ်ပှၢ်” (၁၅:၃၂) န့ၣ်လီၤ. ဒ်သိးတၢ်ကထုးထီၢ်ကွံာ်အီၤလၢ ပှၤတစူၢ်တနာ်ဘၣ်, လၢကီၢ်ယူဒၤ, အစုပူၤ, ဒ်အလဲၤမၤတၢ်လၢ ဝ့ၢ်ယရူၤရှလ့ၣ်အပူၤန့ၣ် ကဘၣ်ပှၤစီဆှံအသး (:၃၁-၃၂) အဂီၢ်, စီၤပီလူး ပာ်ဖျါထီၣ် အတၢ်သကွံၢ်ကညးလီၤတံၢ်လီၤဆဲးန့ၣ်လီၤ. စီၤပီလူး အတၢ်ဃ့သကွံၢ်ကညးတၢ်တဖၣ်န့ၣ် ကလဲၤကတၢၢ်ဝဲဒၣ်ဆူ ဝ့ၢ်ရိမ့ၤအပူၤ, ဖံဖံဖးဒိၣ်တဂၤ အတၢ်ထုကဖၣ်စရီအပူၤသ့ၣ်သ့ၣ်န့ၣ်လီၤ.

တၢ်ထုကဖၣ်န့ၣ် ဟ့ၣ်ဂ့ၢ်ဟ့ၣ်ဘါပှၤ, ဒ်သိးပကအိၣ်မူ “တၢ်မၤနၢၤတၢ်အၢလၢတၢ်ဂ့ၤ” (၁၂:၂၁), အကျိၤကျဲအပူၤအဂီၢ်န့ၣ်လီၤ. ထီဘိန့ၣ်, တၢ်အစၢလၢ ကဟဲဖျါထီၣ်တဖၣ်န့ၣ် ပမ့ၢ်တထံၣ်ဒံးဘၣ်ဒၣ်လဲာ်, ဖိလံၤစၢၤသွဲၣ်လၢ အကဟဲပိာ်ထွဲထီၣ်အခံတဖၣ်အဂီၢ်, ကဒုးအိၣ်ထီၣ် တၢ်စူၢ်တၢ်နာ် အတၢ်န့ၢ်သါတမံၤန့ၣ်လီၤ.