ဖဲ ကၠံၣ်.ဒံၢ် (J. D.) လဲၤဟးဆူ ကီၢ်အၤဖြံကၤ အထံကီၢ်တဖၣ်အကတီၢ်န့ၣ် အုၣ်အသး, ဘၣ်ဃးဒီးတၢ်လီၤကမၢကမၣ်တဖၣ်လၢ အထံၣ်ဝဲဒၣ်န့ၣ်လီၤ. ဖဲအဝဲလဲၤတုၤဝဲဒၣ်လၢ ကီၢ်စၣ်ဘံၣ်ယၣ်-မုၢ်ထီၣ်တကပၤ (Eastern Zambia) အကတီၢ်, ကွဲးဆှၢလီၤန့ၢ်ပှၤ လီလံာ်ပရၢတဖၣ်အကျါ, ပာ်ဃုာ်ဒီးတၢ်ဂီၤတနီၤန့ၣ် ပထံၣ်ဘၣ်ပိာ်မုၣ်လၢ အသးပူၤအိၣ်ပှဲၤဒီးတၢ်စူၢ်တၢ်နာ်တဖၣ် ပာ်ဖျါထီၣ် သၢနံၣ် အတၢ်တိာ်ကျဲၤလၢ တၢ်သးခုကစီၣ် အတၢ်မၤ အဂီၢ်န့ၣ်လီၤ. “တၢ်ဂ့ၢ်လၢအဘၣ်တၢ်ပာ်ဖျါထီၣ်အီၤန့ၣ် လၢယတၢ်အိၣ်မူဒီတစိၤန့ၣ် မ့ၢ်ကျဲကူၣ်နၢၣ်အါမံၤ, လၢယနၢ်ဟူတ့ၢ်လံတဖၣ်အကျါတမံၤ, လၢအအိၣ်ဒီးအစိအကမီၤန့ၣ်လီၤ. လၢတၢ်ကွဲးစူးကါ လၢၢ်ဘ့ၣ်ဘၣ်ဝါအလီၢ်န့ၣ် အဝဲသ့ၣ် ကွဲးပာ်ဖျါဝဲလၢ ဟီၣ်ခိၣ်လိၤန့ၣ်လီၤ. လၢတၢ်ဒုးသ့ၣ်ညါ အဝဲသ့ၣ်အတၢ်ရဲၣ်တၢ်ကျဲၤအဂီၢ်, လၢတၢ်နီၤဟ့ၣ်လီၤ လံာ်ကဘျံးအဂ့ၤအဝါတဖၣ်အလီၢ်န့ၣ်, အဝဲသ့ၣ် ပာ်ဖျါထီၣ်ဝဲလၢ လံာ်ခီဆ့းနူး (သံးကတြူၢ်) ဒီးဘၣ်တၢ်ဖီၣ်ဃာ်အီၤလၢ ပှၤခံဂၤတခီတဂၤန့ၣ်လီၤ. မ့ၢ်တၢ်လၢအလီၤကမၢကမၣ်ဒိၣ်မးန့ၣ်လီၤ.”

အဝဲသ့ၣ် ပာ်ဖျါထီၣ် တၢ်စူၢ်တၢ်နာ်ဒ်သိးအံၤတကလုာ်န့ၣ် မ့ၢ်တၢ်လၢ ကစၢ်ယ့ၣ်ရှူး ပာ်လုၢ်ပာ်ပှ့ၤဝဲဒၣ်န့ၣ်လီၤ. လံာ်မးသဲ ၁၅:၂၁-၂၈ ကွဲးနီၣ်ပာ်ဖျါ တၢ်အဒိအဂၤတမံၤန့ၣ်လီၤ. ဖိမုၣ်ဖိတဂၤ အတၢ်အိၣ်သးန့ၣ် သဆၣ်ထီၣ် မိၢ်, ပိာ်မုၣ်တဂၤ, ဒ်သိးကဃုထံၣ်န့ၣ် ကစၢ်ယ့ၣ်ရှူး, “ဒီးကိးပသူလၢအကလုၢ်ဖးဒိၣ်, ဒီးစံးဝဲဒၣ်, စီၤဒၤဝံးအဖိခွါကစၢ်ဧၢ, သူၣ်ကညီၤသးကညီၤလၢ်ယၤတက့ၢ်. တၢ်နါအိၣ်လၢ ယဖိမုၣ်တဂၤအလိၤ ဒီးဘၣ်တၢ်နးမးလီၤ” (:၂၂).ပိာ်မုၣ် “အတၢ်နာ်လၢ ကစၢ်ယ့ၣ်ရှူး အဒိၣ်နီၢ်မး” (:၂၈) တဂၤအံၤ, လီၤဆီလိာ်အသးဒီး ပှၤယူဒၤတၢ်ဘူၣ်တၢ်ဘါခိၣ်နၢ်တဖၣ်, မ့ၢ်လၢပှၤသ့ၣ်တဖၣ်န့ၣ် အတၢ်စူၢ်တၢ်နာ်တအိၣ်, ဒီးအသးန့ၣ်အိၣ်ယံၤဝဲဒီးကစၢ်ယွၤ (:၈) န့ၣ်လီၤ. ဖဲကစၢ်ခရံာ် ပာ်ပနီၣ်ဝဲဒၣ် စီၤအၤဘြၤဟၣ် အတၢ်လီၤစၢၤအိၣ်ဖျါလၢနီၢ်ခိ, ဒီးအတၢ်စံးထီၣ်ပတြၢၤန့ၣ် မ့ၢ်ပှၤတခီဘီမုၢ်ပိာ်မုၣ်တဂၤအံၤအဂီၢ်, လၢအအိၣ်ဒီးတၢ်စူၢ်တၢ်နာ်, ဒ်စီၤအၤဘြၤဟၣ်အတၢ်စူၢ်တၢ်နာ်အသိးန့ၣ်လီၤ.

မုၢ်တနံၤအံၤ, ဒ်သိးနကကွၢ်ဃီၤဆူ ကစၢ်ယ့ၣ်ရှူးအဂီၢ်န့ၣ် တၢ်မနုၤ ထိၣ်ဟူးထိၣ်ဂဲၤ နၤလဲၣ်. နီၢ်ကစၢ်, ဟံၣ်ဖိဃီဖိ (မ့) ပပှၤတဝၢ အတၢ်လိၣ်တဖၣ်အဃိဧၣ်. တၢ်လၢထိၣ်ဟူးထိၣ်ဂဲၤနၤ ဒ်သိးနကလဲၤဆူ ကစၢ်ယ့ၣ်ရှူးအအိၣ်န့ၣ် ကမ့ၢ်တၢ်တမံၤဂ့ၤ, တမံၤဂ့ၤန့ၣ် နကလဲၤတၢ်အဂီၢ်, နဂံၢ်ဘါမ့ၢ်တအိၣ်ဒၣ်လဲာ် လဲၤနဲတက့ၢ်. အဂ့ၢ်ဒ်အံၤ, နတၢ်နာ် အဒိၣ် အဆံးန့ၣ် တမ့ၢ်တၢ်လၢအကါဒိၣ်တမံၤအဃိ, လဲၤဆူအအိၣ်တက့ၢ်. တၢ်အကါဒိၣ်ကတၢၢ်တမံၤန့ၣ် မ့ၢ်ဝဲဒၣ် နတၢ်စူၢ်တၢ်နာ် ကစၢ်ယ့ၣ်ရှူး, ထဲအဝဲတဂၤဧိၤန့ၣ်လီၤ.