ပလံၤခွါဖိ, ဒီးအတံၤသကိးပှၤဃိးတီၤဖိတဖုန့ၣ် လိၣ်ကွဲဟ့ၣ်လီၤအသးအဂ့ၤကတၢၢ်, လၢတၢ်လိၣ်ကွဲ ဖျၢၣ်သွ့ အပျီပူၤန့ၣ်လီၤ. အဝဲသ့ၣ်မ့ၢ်ဝဲဒၣ် ပှၤအသူၣ်ဆူသးဆူၣ်လၢကဂုာ်လိာ်ကွဲ မၤန့ၢ်မၤနၢၤတၢ်တဖၣ်ဘၣ်ဆၣ်, ဖဲအဝဲသ့ၣ်သွီနုာ်လီၤ ဖျၢၣ်သွ့ ဝံၤဝဲတဘျီလၢ်လၢ်န့ၣ် တၢ်လိၣ်ကွဲဖျၢၣ်သွ့ အပှၤနဲၣ်တၢ်န့ၣ် မၢအဝဲသ့ၣ် ဂုၤက့ၤအသးဆူတၢ်လီၢ်ခံ, ဒ်သိးကလိၣ်ကွဲ ဒီတဒၢက့ၤတၢ်အဂီၢ်, တၢ်လိၣ်ကွဲကျိၤကျဲလၢ အဝဲသ့ၣ်တအဲၣ်ဒိးလိၣ်ကွဲဝဲဒၣ်ဘၣ်န့ၣ်လီၤ. ပှၤလိၣ်ကွဲတၢ်ဖိ ကိးဂၤဒဲးန့ၣ် အဲၣ်ဒိးသွီနုာ်လီၤ ကိဘၣ်ဆၣ်, ဖျါလၢတၢ်ဂုာ်ကျဲးစၢးလိၣ်ကွဲ တြီဆၢဒီတဒၢတၢ်အဂီၢ်န့ၣ် ပှၤအသးတဆူၣ် နီတဂၤဘၣ်န့ၣ်လီၤ.

ပှၤနဲၣ်တၢ်သိၣ်လိနဲၣ်လိ အဝဲသ့ၣ်လၢ တၢ်လိၣ်ကွဲဖျၢၣ်သွ့အကတီၢ်, တၢ်အကါဒိၣ်တမံၤန့ၣ် မ့ၢ်တၢ်ကွၢ်ထံတယာ်ဆိ ပှၤအဂၤတဖု အတၢ်ဟူးတၢ်ဂဲၤတဖၣ်န့ၣ်လီၤ. တၢ်တြီဆၢဂုာ်ဟံးန့ၢ်ဖျၢၣ်သွ့, ဖဲလၢပှၤလိၣ်ကွဲတၢ်အဂၤတဖု ကွံာ်စိာ်ခီ (မ့) တၢ်ကွံာ်သွီနုာ်လီၤ ဖျၢၣ်သွ့အကတီၢ်န့ၣ် ကကဲထီၣ်တၢ်ကီတၢ်ခဲလၢ ပှၤလိၣ်ကွဲတၢ်အဂၤတဖုအဂီၢ်, ဒီးကမၤစၢၤ အပှၤလိၣ်ကွဲတၢ်ဖိတဖၣ် ကမၤနၢၤတၢ်အဂီၢ်န့ၣ်လီၤ.

တၢ်ဒီဒၣ်အကျဲကူၣ်နၢၤတမံၤ, လၢတၢ်ကွၢ်ထံတယာ်ဆိ ပဒုၣ်ဒါ အတၢ်ဟူးတၢ်ဂဲၤန့ၣ် မ့ၢ်တၢ်လၢကမၤစၢၤ ပနီၢ်သးအတၢ်အိၣ်မူအိၣ်ဂဲၤစ့ၢ်ကီးန့ၣ်လီၤ. ဒီးပဒုၣ်ပဒါန့ၣ် ကမ့ၢ်မတၤတဂၤလဲၣ်. ပှၤစူၢ်က့ၤနာ်က့ၤ ကစၢ်ယ့ၣ်ရှူးတဖၣ်အဂီၢ်, စီၤပ့းတရူး အလံာ်ပရၢ ဒုးသ့ၣ်နီၣ်ထီၣ်ပှၤလၢ, “ပဒူၣ်ပဒါ မုၢ်ကီၤလံၢ် ဟးဝ့ၤဝီၤဃုပှၤလၢ အကယူၢ်လီၤဝဲ” ( ၁ ပ့း ၅:၈) န့ၣ်လီၤ. လၢတၢ်န့ၣ်အဃိ, စီၤပ့းတရူး ကွဲးပာ်ဖျါဝဲလၢ “ကီၤသုသးတက့ၢ်. ဆိးသီတက့ၢ်” န့ၣ်လီၤ. နီၢ်နီၢ်န့ၣ်, ပကဘၣ် “တြီဆၢ” ပနီၢ်သးအဒုၣ်အဒါ, ဒီး “အိၣ်ဂၢၢ်ဆိးကျၢၤလၢတၢ်နာ်အပူၤ” (:၉) န့ၣ်လီၤ.

ဒ်ပမ့ၢ်ပှၤစူၢ်က့ၤနာ်က့ၤ ကစၢ်ယ့ၣ်ရှူးတဖၣ်အသိး, တၢ်အိၣ်မူအိၣ်ဂဲၤတြီဆၢဒီဒၣ်တၢ်န့ၣ် ဒ်သိးပတၢ်အိၣ်မူ ကမၤန့ၢ်မၤနၢၤတၢ်တုၤလီၤတီၤလီၤ, ဒီးပဂုာ်ကျဲးစၢးမၤဂ့ၤတၢ်လၢ ယွၤအဘီအမုၢ်အဂီၢ်, ကနဲၣ်ဆှၢပှၤန့ၣ်လီၤ. မ့မ့ၢ်ဒ်န့ၣ်ဒီး, လၢပနီၢ်သးအတၢ်လဲၤကျဲအပူၤ, တၢ်နိးတၢ်ဘျးတဖၣ် မ့ၢ်အိၣ်ထီၣ်ဝဲန့ၣ်ဒီး, “ကယဲၢ်တၢ်ဘျုးတၢ်ဖှိၣ် အကစၢ်ယွၤ,….. ကမၤလၢထီၣ်ပှဲၤထီၣ်, ဂၢၢ်ထီၣ်ကျၢၤထီၣ်, ဆူၣ်ထီၣ်ချ့ထီၣ်သု” (:၁၀) န့ၣ်လီၤ. ကစၢ်ယွၤ မ့ၢ်ပကစၢ်တဂၤလၢ အဒုးကဲထီၣ်လိၣ်ထီၣ်ပှၤ, ဒီးတ့ဒုးအိၣ်ထီၣ်ပတၢ်တြီဆၢဒီဒၣ်တၢ်အဂၢၢ်အကျၢၤ, ခီဖျိလၢအီၤန့ၣ်လီၤ.