“ပဝံၢ်ဝၢ်ပစုတုၤ ပတထံၣ်ထွဲက့ၤ အဝဲသ့ၣ်အခံန့ၣ်လီၤ. တၢ်မၤအံၤ, မ့ၢ်ကျိၤကျဲတမံၤလၢပပာ်ဖျါထီၣ် ပတၢ်အဲၣ်ဆူအဝဲသ့ၣ်” န့ၣ်လီၤ. လၢယနီၢ်ဆံးအကတီၢ်, ယမိၢ်အတၢ်ကတိၤတဖၣ်အံၤ ပာ်ဖျါထီၣ် ယမိၢ်ယပၢ်အလုၢ်လၢ်တမံၤလၢအမၤဝဲ, ဖဲပဘူးပတံၢ်ဟံၣ်ဖိဃီဖိတဂၤဂၤ ဟဲဟးဆူပဟံၣ်, ဒီးကက့ၤဝဲဒၣ်အကတီၢ်န့ၣ်လီၤ. ယမိၢ်ဒီးယပၢ်န့ၣ် အိၣ်ဂဲၤဆၢထၢၣ်လၢဟံၣ်ချၢ, ဒီးဝံာ်ဝၢ်အစု, တုၤတထံၣ်ဘၣ်ပှၤလၢအက့ၤတဂၤအခံန့ၣ်လီၤ. ဘၣ်တဘျီဘျီ, ဘၣ်အိၣ်ဂဲၤဆၢထၢၣ် တၢ်ဆၢကတီၢ်ဖးယံာ်ဖးထီဘၣ်ဆၣ်, လၢအဝဲသ့ၣ်အဂီၢ်န့ၣ် တၢ်ဂ့ၢ်ကီတအိၣ်ဘၣ်. ဖဲယဟးထီၣ်လၢဟံၣ်န့ၣ်ဒီး, ဘၣ်မနုၤအဃိ, အဝဲသ့ၣ်မၤတၢ်အံၤလဲၣ်န့ၣ် ယသ့ၣ်ညါနၢ်ပၢၢ်ယဲန့ၣ်လီၤ.

သိလ့ၣ်အမဲာ်ထံကလၤလၢ အဒုးနဲၣ်တၢ်လီၢ်ခံအပူၤ, ဖဲယကွၢ်ကဒါက့ၤအဝဲသ့ၣ်, ဒီးထံၣ်ဘၣ်အဝဲသ့ၣ် ဝံၢ်ဝၢ်အစုန့ၣ် ထိးဘၣ်ယသူၣ်ယသး, ဒီးယသးကလၢၢ်ဘၣ်ယဲတၢ်အဲၣ်တၢ်ကွံ, ဒီးတၢ်ကဟုကယာ်န့ၣ်လီၤ. ယနီၢ်ကစၢ်ယဲစ့ၢ်ကီး, ပှၤသမှံၤလၢ အဟဲဟးဆူယဟံၣ်တဖၣ် မ့ၢ်က့ၤဝဲန့ၣ်ဒီး, ဒ်သိးယပာ်ဖျါ တၢ်အဲၣ်တၢ်ကွံ လၢအဝဲသ့ၣ်အဂီၢ်,ဒ်ယမိၢ်ယပၢ်မၤတ့ၢ်ဝဲအသိး, ယဝံၢ်ဝၢ်ယစု ဖဲယဆှၢက့ၤအဝဲသ့ၣ်တဖၣ်န့ၣ်လီၤ.ယဆၢမုၢ်လၢ်ယဲလၢ ယဖိသ့ၣ်တဖၣ် ကလူၤပိာ်ထွဲမၤထွဲ လုၢ်လၢ်တမံၤအံၤန့ၣ်လီၤ.

ကျိၤကျဲအဂၤတဘိလၢ ပပာ်ဖျါထီၣ် တၢ်အဲၣ်တၢ်ကွံ သ့ဝဲဒၣ်ဆူ ပဟံၣ်ဖိဃီဖိတဖၣ်အဂီၢ်န့ၣ် မ့ၢ်တၢ်ဒုးဘၣ်ထွဲလိာ်သးဒီးကစၢ်ယွၤ အတၢ်အဲၣ်လၢ ယွၤအကလုၢ်အကထါအပူၤန့ၣ်လီၤ. ဖဲပှၤအံၣ်စရ့လးဖိတဖၣ် အိၣ်ကတဲာ်ကတီၤအသးလၢ ကခီဂာ် ယၢ်ဒ့ၣ်ကျိ, ဒီးကနုာ်လီၤဆူ ကီၢ်တၢ်စံးပာ်အကတီၢ်, လၢအပှၤဂီၢ်မုၢ် အတၢ်အိၣ်မူအိၣ်ဂဲၤအဂီၢ်, ကစၢ်ယွၤ သိၣ်လိနဲၣ်လိ တၢ်မၤလိာ်တဖၣ်အံၤ, “ဒီးသုဘၣ်ပာ်ဖှိၣ် ယတၢ်ကတိၤအံၤလၢသုသးတဖျၢၣ်အပူၤ,… ဒီးသုဘၣ်သိၣ်လိသုဖိသုလံၤ, ဒီးတုၤနဆ့ၣ်နီၤလၢ နဟံၣ်ပူၤ, တုၤနလဲၤတၢ်လၢကျဲပူၤ, တုၤနမံလီၤ, ဒီးတုၤနဂဲၤဆၢထၢၣ်ဒီးနဘၣ်ကတိၤတၢ်လၢအဂ့ၢ်အကျိၤ” (၅ မိၤ ၁၁:၁၈-၁၉) န့ၣ်လီၤ.

မုၢ်တနံၤန့ၣ် တၢ်ကတိၤအဖျၢၣ်တဖၣ်အံၤ ပှၤကထံၣ်န့ၢ် လၢထီၣ်ပှဲၤထီၣ်ဝဲဒၣ်လၢ ကစၢ်ယ့ၣ်ရှူး အတၢ်အဲၣ်အလၢအပှဲၤအပူၤ, အၢၣ်လီၤအီလီၤဝဲဒၣ်လၢ “ယအိၣ်ဒီးသု ကိးမုၢ်နံၤမုၢ်နၤဒဲး” (မး ၂၈:၂၀) န့ၣ်လီၤ. လၢတၢ်နီၤဟ့ၣ် ယွၤအတၢ်မ့ၢ်တၢ်တီ, ဒီးအတၢ်အဲၣ်တၢ်ကွံန့ၣ်ဒီး, ကစၢ်ယ့ၣ်ရှူး အတၢ်အဲၣ်န့ၣ် လဲၤတလၢမၤနၢၤကွံာ် ကယဲၢ်တၢ်ဒ့ၣ်စၢၤအယံၤ ကိးမံၤဒဲး (တၢ်အိၣ်ယံၤလိာ်ဘၣ်ပသး) သ့ဝဲဒၣ်န့ၣ်လီၤ.