ယတံၤသကိး ရၤလ့ (Raleigh) န့ၣ် ဘူးထီၣ်လၢကချုးန့ၢ် (၈၉) နံၣ် နံၤအိၣ်ဖျဲၣ်ဆၢက့ၤန့ၣ်လီၤ. စးထီၣ်ယကတိၤသကိးတၢ်ဒီးအီၤ အခီၣ်ထံးကတၢၢ်တဘျီ လၢအပူၤကွံာ် (၃၅) နံၣ်လံၤလံၤန့ၣ်, အဝဲမ့ၢ်တ့ၢ်ဝဲ တၢ်ဂံၢ်တၢ်ဘါယၤအဂံၢ်ထံးန့ၣ်လီၤ. တယံာ်ဒံးဘၣ်န့ၣ်, အဝဲဒုးသ့ၣ်ညါယၤ ဖဲအစးထီၣ်အိၣ်ဘှံးလၢ အတၢ်ဖံးတၢ်မၤန့ၣ်, ကွဲးဝံၤလံာ်တဘ့ၣ်လၢအစု, ဒီးစးထီၣ်ဝဲ တၢ်သးခုကစီၣ်အတၢ်မၤအသီတခါန့ၣ်လီၤ. ယဘၣ်သးသ့ၣ်ညါအါထီၣ် အတၢ်မၤအံၤအဂ့ၢ်ဘၣ်ဆၣ် တမ့ၢ်တၢ်လီၤကမၢကမၣ်လၢယဂီၢ်န့ၣ်ဘၣ်.
လံာ်စီဆှံအပူၤ, ဖဲစီၤကၤလ့း အသးအိၣ် ၈၅ နံၣ်န့ၣ်, တဆိကတီၢ် အတၢ်မၤဒံးဘၣ်န့ၣ်လီၤ. အတၢ်နာ် ဒီးအတၢ်ဟ့ၣ်လီၤသးလၢကစၢ်ယွၤန့ၣ်, ဒုးအိၣ်ဂၢၢ်ဆိးကျၢၤအီၤ နံၣ်လၢအဆံတဖၣ် လၢပှၢ်မုၢ်ကနၢ, ဒီးတၢ်ဒုးတၢ်ယၤလၢ ကမၤဂၢၢ်မၤကျၢၤ ကစၢ်ယွၤအတၢ်န့ၢ်သါစံးတ့ၢ်ဝဲလၢ ပှၤအံၣ်စရ့လးဖိတဖၣ်အဂီၢ်န့ၣ်လီၤ. ယိၤရှူ ၁၄:၁၁ အပူၤန့ၣ် စီၤကၤလ့း စံးဝဲဒၣ်လၢ, “ယဂံၢ်ဆူၣ်ယဘါဆူၣ်လၢမုၢ်မဆါတနံၤအံၤ, ဒ်မုၢ်တနံၤလၢ စီၤမိၤရှ့မၢလီၤယၤအသိးန့ၣ်, ဒ်ယဂံၢ်ယဘါအိၣ်အကတီၢ်ဖဲန့ၣ် ယဂံၢ်ယဘါအိၣ်ဝဲ ခဲကနံၣ်အံၤ ဒ်န့ၣ်အသိးလၢတၢ်ဒုးသုးအဂီၢ်” န့ၣ်လီၤ. အဝဲမၤနၢၤတၢ်လၢကျဲဒ်လဲၣ်. အဆၢဖိ ၁၂ န့ၣ် စီၤကၤလ့း စံးဝဲလၢ “ယွၤမ့ၢ်အိၣ်ဒီးယၤဒီး, ယကဟီထီၣ်ကွံာ်အီၤ ဒ်ယွၤစံးဝဲအသိးန့ၣ်လီၤ.”
သးအနံၣ်အလါ, တၢ်အိၣ်မူအပတီၢ်, ဒီးတၢ်အိၣ်အသး, မၤအသးတဖၣ် ကမ့ၢ်ဝဲ ဒ်လဲၣ်ဂ့ၤဒ်လဲၣ်ဂ့ၤန့ၣ်, ပှၤစူၢ်နာ်ကစၢ်ယွၤ လၢသူၣ်ဒီဖျၢၣ်သးဒီဖျၢၣ်တဖၣ်န့ၣ် ကစၢ်ယွၤ ကမၤစၢၤအဝဲသ့ၣ်န့ၣ်လီၤ. ကစၢ်ယ့ၣ်ရှူး, လၢအမ့ၢ်တၢ်အုၣ်က့ၤခီၣ်က့ၤကစၢ် မၤစၢၤပှၤ အဃိ, ပသ့ၣ်ညါဘၣ်ကစၢ်ယွၤန့ၣ်လီၤ. ခီဖျိပထံၣ်ဘၣ်တၢ်လၢ ကစၢ်ခရံာ်အပူၤန့ၣ်ဒီး လံာ်တၢ်သးခုကစီၣ်တဖၣ် ဟ့ၣ်ဂံၢ်ဟ့ၣ်ဘါပှၤလၢ ပကနာ်ယွၤအဂီၢ်န့ၣ်လီၤ. ကစၢ်ယ့ၣ်ရှုးဒုးနဲၣ်ဖျါထီၣ် ကစၢ်ယွၤအတၢ်ကဟုကယာ်, ဒီးအတၢ်အဲၣ်သူၣ်ကညီၤသးကညီၤတၢ်ဆူ ပှၤလၢအကွၢ်ထီၣ်အီၤလၢ တၢ်မၤစၢၤအဂီၢ်န့ၣ်လီၤ. ဧ့ၤဘြံၤ ၁၃:၆ န့ၣ် ပှၤကွဲးလံာ်တူၢ်လိာ်အၢၣ်လီၤဝဲ, “ယွၤမ့ၢ်ပှၤမၤစၢၤယၤ, ယတပျံၤဘၣ်” န့ၣ်လီၤ. သးစၢ်ဂ့ၤ, သးပှၢ်ဂ့ၤ, ဂံၢ်ဘါစၢ်မ့ၢ်ဂ့ၤ ဂံၢ်ဘါဆူၣ်မ့ၢ်ဂ့ၤ, ဘၣ်တၢ်စၢ်ဃာ်မ့ၢ်ဂ့ၤ, ပှၤသဘျ့မ့ၢ်ဂ့ၤ, ဃ့ၢ်တၢ်မ့ၢ်ဂ့ၤ, လဲၤတၢ်တကျဲၢ်တကျဲၢ်မ့ၢ်ဂ့ၤ, တၢ်လၢမုၢ်တနံၤအံၤ ဒ်သိးပတဃ့တၢ်မၤစၢၤလၢယွၤအအိၣ်အဂီၢ် တၢ်မနုၤ မၤတံာ်တာ်ပှၤလဲၣ်.
