ဒ်တၢ်ဃုထံပာ်ဖျါဝဲအသိး, တၢ်လၢအအိၣ်ဒီးအဝဲသ့ၣ်အဂီၢ် ပှၤစံးဘျုးစံးဖှိၣ်က့ၤတၢ်နီၢ်နီၢ်တဖၣ်န့ၣ်, မံၤဘၣ်မုာ်မုာ်ခုၣ်ခုၣ်, တၢ်ဆါအက့ၢ်အဂီၤဆံးစှၤ, ဒီးမ့ၢ်ပှၤလၢအသူၣ်ခုသးခုတဖၣ်န့ၣ်လီၤ. တၢ်အံၤ, မ့ၢ်တၢ်အဘျုးအဖှိၣ်လၢ အဂ့ၤဒိၣ်မးန့ၣ်လီၤ. ပှၤကူၣ်သ့လၢသးဂ့ၢ် ပီညါတဖၣ် ဟ့ၣ်ကူၣ်ဝဲတုၤဒၣ်လဲာ်လၢ, တၢ်ကပာ် “တၢ်စံးဘျုးစံးဖှိၣ် အတၢ်ကွဲးနီၣ်” လၢကမၤဂ့ၤထီၣ် ပနီၢ်တဂၤ တၢ်န့ၢ်ဘျုး, ခီဖျိတၢ်ကွဲးလီၤ တၢ်ဂ့ၢ်ယဲၢ်ထံၣ် လၢတနွံဘၣ်တနွံစုာ်စုာ်အဂီၢ် လၢပကဘၣ်စံးဘျုးစံးဖှိၣ်တၢ်န့ၣ်လီၤ.
လံာ်စီဆှံ ဟ့ၣ်ဂံၢ်ဟ့ၣ်ဘါ တၢ်စံးဘျုးစံးဖှိၣ်က့ၤတၢ်အလုၢ်အလၢ်အဂ့ၢ်န့ၣ် ယံာ်တ့ၢ်လံန့ၣ်လီၤ. ဒ်၁ တံၤ ၄:၃-၅ ပာ်ဖျါဝဲအသိး, စးထီၣ်လၢ တၢ်အီၣ်တၢ်အီ ဒီးတၢ်ဆီဟံၣ်ဆီဃီ, ဒီးဒ် စံး ၁၀၄ ပာ်ဖျါဝဲအသိး, တုၤလၢ တၢ်ဘၣ်တ့အဃံအလၤတဖၣ်န့ၣ်လီၤ. လံာ်စီဆှံ အဲၣ်ဒိးဝဲလၢ ပကထံၣ်တၢ်တဖၣ်အံၤ, ဒ်အမ့ၢ် တၢ်ဟ့ၣ်တဖၣ် ဒီးစံးဘျုးက့ၤပှၤလၢအဟ့ၣ်တၢ်တဂၤန့ၣ်လီၤ. စံး ၁၀၇ ယၢၤထီၣ် တၢ်ဂ့ၢ်ယဲၢ်မံၤလၢ ပှၤအံၣ်စရ့လးဖိတဖၣ်ကဘၣ် စံးဘျုးစံးဖှိၣ်က့ၤတၢ် လီၤလီၤဆီဆီန့ၣ်လီၤ. အဆၢဖိ ၄-၉ န့ၣ် အဘၣ်တၢ်မၤပူၤမၤဖျဲးအီၤလၢပှၤမုၢ်ကနၢ, အဆၢဖိ ၁၀-၁၆ န့ၣ် တၢ်ထူၣ်ဖျဲးထီၣ်လၢတၢ်မၢကဲကုၢ်, အဆၢဖိ ၁၈-၂၂ န့ၣ်ဘၣ်တၢ်ယါဘျါလၢ တၢ်ဆူးတၢ်ဆါ, အဆၢဖိ ၂၃-၃၂ န့ၣ် ဒိးန့ၢ်တၢ်ဘံၣ်တၢ်ဘၢ ဖဲလၢပီၣ်လဲၣ်အတၢ်လဲၤ, ဒီးအဆၢဖိ ၃၃-၄၂ ပာ်ဖျါဝဲ တၢ်ဘီၣ်ထီၣ်ညီထီၣ်လၢ ဟီၣ်ခိၣ်လၢ အဃ့ထီန့ၣ်လီၤ. တၢ်သ့ၣ်တဖၣ်အံၤ မ့ၢ်တၢ်ပနီၣ်လၢ ကစၢ်ယွၤ “အတၢ်အဲၣ်အထူအယိာ် လၢအတလီၤတူာ်လီၤကၣ်နီတဘျီဘၣ်” အဃိ, အဆၢဖိ ၈,၁၅,၂၁,၃၁ အပူၤပှၤကွဲးထါ ပာ်ဖျါထီၣ် “စံးထီၣ်ပတြၢၤယွၤတက့ၢ်” တဘျီဝံၤတဘျီန့ၣ်လီၤ.
မ့ၢ်နအိၣ်ဒီး လံာ်တၢ်ကွဲးနီၣ်ဖိတဘ့ၣ်န့ၣ်ဧါ. ခဲကနံၣ်အံၤ ဘၣ်မနုၤအဃိ နတကွဲးလီၤ တၢ်ယဲၢ်မံၤ လၢနကစံးဘျုးစံးဖှိၣ်တၢ်အဂီၢ်န့ၣ်လဲၣ်. တၢ်ကွဲးနီၣ်ကမ့ၢ်ဝဲ, တၢ်အီၣ်အဝံာ်အဘဲ လၢနအီၣ်ဘၣ်, နတၢ်ဆီဟံၣ်ဆီဃီ မ့တမ့ၢ် ဒ်ပှၤအံၣ်စရ့လးဖိအသိး, ကစၢ်ယွၤမၤပူၤဖျဲးနၤလၢနသးသမူအပူၤ တုၤလၢမုၢ်တနံၤအံၤန့ၣ်လီၤ. ထိၣ်ဖိအပှ့ၤသီၣ်မုာ်မး လၢနဟံၣ်ချၢ, ကသူ အစိနၢမူနၢဆှီ လၢနဖၣ်ကပူၤ, ခးဆ့ၣ်နီၤအမုာ်ဖိလၢ နဆ့ၣ်နီၤအီၤ, ပှၤလၢနအဲၣ်ဘၣ် အတၢ်ကတိၤကသွံကသွါဖိတဖၣ်အဂီၢ် စံးဘျုးက့ၤကစၢ်ယွၤတက့ၢ်. တၢ်တမံၤစုာ်စုာ်, မ့ၢ်ဝဲတၢ်ဟ့ၣ် တမံၤ ဃုာ်ဒီးတၢ်ပနီၣ်တမံၤ လၢအမ့ၢ် ကစၢ်ယွၤအတၢ်အဲၣ်လၢ အတလီၤတူာ်လီၤကာ်နီတဘျီဘၣ်န့ၣ်လီၤ.
