ကဟၣ်နီၣ်ပျံာ် အကလုၢ်သီၣ်တၢ်န့ၣ် မၤပျံၤမၤဖုး စၤရါ (Sarah) လၢအသးအိၣ် ယဲၢ်နံၣ် ဖိတဂၤန့ၣ်လီၤ. အဝဲစံၣ်လီၤဃ့ၢ်လၢ ကသံၣ်သရၣ်ကွၢ်ပှၤမဲအလီၢ်ဆ့ၣ်နီၤ ဒီးဂ့ၢ်လိာ်ဝဲလၢ ကဘၣ်ဆ့ၣ်နီၤကဒါက့ၤတၢ်န့ၣ်လီၤ. မဲကသံၣ်သရၣ်တဂၤ နၢ်ပၢၢ်ဝဲတၢ်အိၣ်အသးအဃိ ဖျးလီၤအခိၣ် ဒီးတဲဘၣ် စၣ်ရၣ်အပၢ်လၢ, “ဖိမုၣ်ဖိပၢ်ဧၢ, ဟဲဆ့ၣ်နီၤလၢ လီၤဆ့ၣ်နီၤအလိၤတက့ၢ်” န့ၣ်လီၤ. ကၠ့စဲၣ် (Jason) ဆိကမိၣ်လၢ ကသံၣ်သရၣ်အဲၣ်ဒိးဒုးသ့ၣ်ညါ အဖိမုၣ်လၢတၢ်ပျံၤအလီၢ်တအိၣ်ဘၣ်အဂ့ၢ်န့ၣ်လီၤ. ဘၣ်ဆၣ်ဖဲအဝဲဆ့ၣ်နီၤဝံၤအလီၢ်ခံ ကသံၣ်သရၣ် ကွၢ်တရံး ဖိသၣ်မုၣ်ဒီးစံးဝဲဒၣ် “ခဲအံၤ, ထီၣ်ဆ့ၣ်နီၤလၢ နပါပၢ်အလိၤ” န့ၣ်လီၤ. စၤရါဖိ ဘၣ်တၢ်မၤမုာ်မၤခုၣ်အသးလၢအပၢ်အစုတီၤလိၤဒီး, အတၢ်ပျံၤတၢ်ဖုး ဟါမၢ်ကွံာ်လၢာ်လၢာ်ဆ့ဆ့ ဒီးကသံၣ်သရၣ်အံၤ မၤဝံၤဝဲတၢ်လၢအကဘၣ်မၤဝဲန့ၣ်လီၤ.
ဖဲမုၢ်နံၤအအံၤန့ၣ်, ကၠဲးစၢၣ် မၤလိန့ၢ် တၢ်မၤလိဖးဒိၣ်တမံၤ, လၢအမ့ၢ် ပၢ်ကစၢ်ယွၤအိၣ်လၢမူခိၣ် အတၢ်အိၣ်ဆိးဒီးပှၤအဃိ တၢ်ဒိးန့ၢ်ဘၣ်သးအတၢ်မုာ်တၢ်ပၢၤအဂ့ၢ်န့ၣ်လီၤ. ကၠ့စဲၣ် စံးဝဲဒၣ်, “ဘၣ်တဘျီဘျီ, တၢ်လၢပကဘၣ်လဲၤခီဖျိပနီၢ်ကစၢ်ဒၣ်ဝဲန့ၣ် ကစၢ်ယွၤ ဃုထၢလၢ ကပာ်လီၤတဲာ်တ့ၢ်ဝဲဒၣ်လၢပဂီၢ်” န့ၣ်လီၤ. ဘၣ်ဆၣ်, ကစၢ်ယွၤဒုးနဲၣ်ယၤလၢ, “ယကအိၣ်ဒီးနၤဖဲန့ၣ်” န့ၣ်လီၤ.
ထါစံးထီၣ်ပတြၢၤ ၉၁ ပာ်ဖျါထီၣ် သးအတၢ်မုာ်တၢ်ပၢၤ ခီဖျိလၢကစၢ်ယွၤအိၣ်ဆိးဒီးပှၤ, ဒီးလၢတၢ်ကွၢ်ဆၢၣ်မဲာ်တၢ်မၤကွၢ်တဖၣ်အဂီၢ် ကစၢ်ယွၤအစိကမီၤလၢ အဟ့ၣ်ဂံၢ် ဟ့ၣ်ဘါပှၤန့ၣ်လီၤ. အဆၢဖိ ၁၅ န့ၣ် ပှၤလၢအအဲၣ်အီၤတဖၣ်အဂီၢ် ကစၢ်ယွၤအၢၣ်လီၤဝဲလၢ “ကကိးထီၣ်ယၤ ဒီးယကစံးဆၢအီၤလီၤ. ယကအိၣ်ဒီးအီၤ, ယကမၤပူၤဖျဲးအီၤ…လီၤ” အသိး, တၢ်သ့ၣ်ညါလၢ ပအိၣ်ကဒုလၢ ကစၢ်ယွၤအစုဆူၣ်လိၤသ့ဝဲဒၣ်အံၤန့ၣ်, ကဟ့ၣ်ပှၤ တၢ်အုၣ်ကီၤဖးဒိၣ်န့ၣ်လီၤ.
လၢသးသမူအပူၤ, တၢ်တၤတၢ်, ဒီးတၢ်မၤကွၢ်တဖၣ် ကအိၣ်ဝဲအါမး ဒီးတမ့ၢ်လၢ ပဟးဆှဲးအီၤကန့ၢ်ဘၣ်. ပကဘၣ်လဲၤခီဖျိ တၢ်ဘၣ်ဒိဘၣ်ထံး, ဒီးတၢ်နးတၢ်ဖှီၣ်သပှၢ်တၢၢ်န့ၣ်လီၤ. ဘၣ်ဆၣ်, ဃုာ်ဒီးကစၢ်ယွၤအစုတီၤ လၢအမၤမုာ်ပှၤ အတၢ်ဖိးဟုဃာ်ပှၤန့ၣ်, ပတူၢ် တၢ်ဂ့ၢ်ကီတဖၣ် ဒီးတၢ်အိၣ်သးလၢအကီခဲ ကသ့ဝဲ, ဒီးပျဲအဝဲဟ့ၣ်ဆူၣ်ထီၣ် ပတၢ်နာ်အဂံၢ်ဘါ ဖဲပလဲၤခီဖျိ တၢ်အံၤကတီၢ်န့ၣ်တက့ၢ်.
