ယတံၤသကိးလၢပရ့လိာ်ဘၣ်ထွဲလိာ်သး အါနံၣ်အါလါတဂၤန့ၣ် ပတထံၣ်လိာ်ဘၣ်ပသး အိၣ်တဘျုးနံၣ်လံန့ၣ်လီၤ. နံၣ်တဖၣ်အတီၢ်ပူၤ အဝဲဒိးန့ၢ်ဝဲ ခဲစၢၣ်တၢ်ဆါဒီး ဘၣ်စးထီၣ်ကူစါယါဘျါအသးန့ၣ်လီၤ. လၢတၢ်တဆိကမိၣ်အပူၤ ယတၢ်ဂ့ၢ်အိၣ်ထီၣ်လၢယကဘၣ်လဲၤဆူ အဝဲအိၣ်တၢ်ကီၢ်စဲၣ်အဃိ ယဒိးန့ၢ်တၢ်ခွဲးတၢ်ယာ်လၢ ပကထံၣ်လိာ်သးကဒီးတဘျီန့ၣ်လီၤ. ဖဲယနုာ်လီၤဆူတၢ်အီၣ်ကျးပူၤဒီးပထံၣ်လိာ်သးန့ၣ် ပဝဲခံဂၤလိာ် ပမဲာ်ထံလီၤဘၣ်သးန့ၣ်လီၤ. အါနံၣ်အါလါပအိၣ်ဆိးဒ်သိးသိးလၢဒၢးတဖျၢၣ်ဃီဒီး ခဲအံၤတၢ်သံသုးဘူးအသးလၢပတၢ်အိၣ်မူ တၢ်အနၢၣ်တသနၢၣ် ဒီးဒုးသ့ၣ်နီၣ်ထီၣ်ပှၤလၢ တၢ်အိၣ်မူမ့ၢ်တၢ်တစိၢ်တလီၢ်ဖိန့ၣ်လီၤ. အါနံၣ်အါလါ ပတၢ်ရ့လိာ်ဘၣ်ထွဲလိာ်သးအပူၤ တၢ်အိၣ်ပှဲၤဒီး တၢ်သူၣ်ဆူၣ်သးဝး, တၢ်တဘၣ်လိာ်ဘၣ်စးတဖၣ်, တၢ်နံၤတၢ်အ့ ဒီးတၢ်လီၤမၢ်တဖၣ် လၢတၢ်အဲၣ်တၢ်ကွံအပူၤ ပမဲာ်ထံ ဘၣ်လီၤရူၢ်ရူၢ်န့ၣ်လီၤ. လၢတၢ်အဲၣ်ဒိၣ်ဒိၣ်ယိာ်ယိာ်အပူၤ ပကွၢ်လိာ်သးဒီးပထံၣ် ပမဲာ်ထံလီၤတကတၢၢ်လၢၤဘၣ်န့ၣ်လီၤ.

ကစၢ်ယ့ၣ်ရှူးစ့ၢ်ကီးဟီၣ်ဝဲဒၣ်န့ၣ်လီၤ. လံာ်ယိၤဟၣ်ပာ်ဖျါဝဲတၢ်အကတီၢ်ဖိအံၤ လၢ ယိၤ ၁၁:၃၄ အပူၤ, ဖဲပှၤယူဒၤတဖၣ်စံးဘၣ်အီၤ “ကစၢ်ဧၢ,ဟဲကွၢ်တက့ၢ်” ဒီးကစၢ်ယ့ၣ်ရှူးဆၢထၢၣ်လၢ စီၤလါစရူး, အတံၤသကိးလၢအဂ့ၤတဂၤအတၢ်သွၣ်ခိၣ်အမဲာ်ညါန့ၣ်လီၤ. အဆၢဖိ ၃၅ ပာ်ဖျါ “ယ့ၣ်ရှူးအမဲာ်ထံလီၤဝဲလီၤ” အံၤနဲၣ်ဖျါထီၣ် ကစၢ်ခရံာ်ဟံးန့ၢ်လိၣ်ထီၣ် ပဝဲပှၤဟီၣ်ခိၣ်ဖိအန့ဆၢၣ်န့ၣ်လီၤ. စီၤယိၤဟၣ်ပာ်ဖျါထီၣ်တၢ်တဖၣ်အကျါ တၢ်အိၣ်လီၤတဲာ်တ့ၢ်လၢစီၤယိၤဟၣ်တပာ်ဖျါဝဲမ့ၢ်အိၣ်ဧါ. ကအိၣ်ဝဲလီၤ. အဆၢဖိ ၃၆ အတၢ်ပာ်ဖျါ ပှၤယူဒၤဖိတဖၣ်လၢအစံးဝဲ “ကွၢ်ကွၢ်, မ့ၢ်အအဲၣ်အီၤဆံးဒိၣ်လဲၣ်.” န့ၣ် ယနာ်လၢအဝဲသ့ၣ်စ့ၢ်ကီး ကဟီၣ်ဃုာ်ဝဲန့ၣ်လီၤ. တၢ်ဂ့ၢ်အံၤ အါန့ၢ်ဒံး တၢ်အခီၣ်တဃာ်အလၢအပှဲၤလၢပဂီၢ် ဒ်သိးပကအိၣ်ပတုာ်ဒီး ဘူၣ်ထီၣ်ဘါထီၣ်တံၤသကိးလၢအသ့ၣ်ညါ ပတၢ်ဂံၢ်စၢ်ဘါစၢ်ခဲလၢာ်တဂၤန့ၣ်လီၤ. ကစၢ်ယ့ၣ်ရှူးမ့ၢ်တ့ၢ်ဝဲ, တၢ်ဖံးတၢ်ညၣ်, တၢ်သွံၣ်တၢ်ထံ, ဒီးတၢ်မဲာ်ထံမဲာ်နိန့ၣ်လီၤ. ကစၢ်ယ့ၣ်ရှူးမ့ၢ် ပှၤအုၣ်က့ၤခီၣ်က့ၤတၢ်တဂၤ လၢအအဲၣ်ပှၤဒီးသ့ၣ်ညါနၢ်ပၢၢ်ပှၤန့ၣ်လီၤ.