ယမါထုးထီၣ်ထဲအခိၣ်တဖျၢၣ်ဆူတြဲၤအချၢဒီး စံးဝဲ “နကနဲဖိတဖၣ်ပာ်ဖှိၣ်ထီၣ်အသး ဒီဒူၣ်ဒီထၢလီၤ,” တၢ်အံၤမ့ၢ်တၢ်ကစီၣ်လၢကယဲၢ် ပှၤဘုၣ်ကနဲတဖၣ်တအဲၣ်ဒိးနၢ်ဟူဝဲဒၣ်ဘၣ်န့ၣ်လီၤ. ယဟးထီၣ်ဆူဟံၣ်ချၢဒီး ထံၣ်ကနဲဖိတဖၣ် အိၣ်လၢအကထိတဖၣ်အကထိန့ၣ် ယူၤထီၣ်ဆူသ့ၣ်ဆှိအမုၢ်အစိးဒီး တမ့ၢ်ကဟဲက့ၤလၢၤဘၣ်န့ၣ်လီၤ.
ယသ့ၣ်ညါစဲၤခံဝဲဒၣ်လၢ ကနဲဖိတဖၣ် ကပာ်ဖှိၣ်ထီၣ်အသး ဒီဒူၣ်ဒီထၢလၢကနဲ အဒၢအံၤ, မ့ၢ်လၢကလံၤမုၢ် ဟဲလီၤအူ ယံာ်ဝဲတနွံဘျဲၣ်ဒီးကဲထီၣ် တၢ်တံာ်တာ်လၢ ယကလဲၤကွၢ်ထံ ကနဲတဖၣ်အတၢ်အိၣ်အသးအဃိန့ၣ်လီၤ. မုၢ်တဂီၤ လၢကလံၤမုၢ်ဟဲဝံၤန့ၣ် ကနဲတဖၣ်တအိၣ်လၢၤဘၣ် န့ၣ်လီၤ. ကနဲဖိတဖၣ် မ့ၢ်အသီဒီး ပှဲၤဒီးတၢ်အိၣ်ဆူၣ်အိၣ်ချ့န့ၣ်လီၤ. နီၢ်နီၢ်တခီ ကနဲတဖၣ် ကတ့ထီၣ်အဒၢအသီအဂီၢ် ထုးဖးနီၤဖးလိာ်အသးန့ၣ်လီၤ. ပှၤဘုၣ်ကနဲလၢ အတၢ်လဲၤခီဖျိအိၣ်တဂၤ ထံၣ်ဝဲ ယသူၣ်ဟးဂီၤသးဟးဂီၤအဃိ စံးဘၣ်ယၤလၢ “သးဟးဂီၤတဂ့ၤ, တၢ်ဒ်သိးအံၤန့ၣ် မၤအသးသ့ဝဲဒၣ်လၢ ပှၤဘုၣ်ကနဲကိးဂၤဒဲးန့ၣ်လီၤ.”
တၢ်ဟ့ၣ်ဂံၢ်ဟ့ၣ်ဘါတၢ်န့ၣ် မ့ၢ်တၢ်ဟ့ၣ်သါတမံၤလၢ တၢ်ထုးန့ၢ်သူၣ်န့ၢ်သး ပှၤဂၤန့ၣ်လီၤ. စီၤဒၤဝံး အသူၣ်ဟးဂီၤအသးဟးဂီၤ ဖဲ စီၤစီလူး လူၤဃုမၤသံအီၤအဆၢကတီၢ်, ၁ၡမူၤ ၂၃:၁၇ အပူၤ ပကထံၣ်ဘၣ် စီၤစီလူးအဖိခွါ စီၤယိနၤသၣ် ဟ့ၣ်ဂံၢ်ဟ့ၣ်ဘါစီၤဒၤဝံးလၢ “ပျံၤတၢ်တဂ့ၤ. အဂ့ၢ်ဒ်အံၤ, စီၤစီလူး ယပၢ်အစုတထံၣ်န့ၢ်ဘၣ်နၤဘၣ်, ဒီးနကကဲထီၣ်စီၤပၤလၢအံၣ်စရ့လးအဖီခိၣ်, ဒီးယကကဲထီၣ် ပှၤခံဂၤဒီးနၤ, ဒီးစီၤစီလူး ယပၢ်သ့ၣ်ညါစ့ၢ်ကီးတၢ်ဒ်န့ၣ်လီၤ”.
စီၤယိနၤသၣ်, အပၢ်မ့ၢ်သံဝံၤ, ကဘၣ်ထီၣ်စီၤပၤအလီၢ်ဘၣ်ဆၣ်, တကွၢ်ဝဲဒၣ်ထဲအဂီၢ်ဘၣ်ဒီး အတၢ်ဟ့ၣ်ဂံၢ်ဟ့ၣ်ဘါစီၤဒၤဝံးဒ်သိးအံၤန့ၣ်, မ့ၢ်တၢ်လီၤကမၢကမၣ်လၢပဂီၢ်န့ၣ်လီၤ. ဘၣ်သ့ၣ်သ့ၣ်, စီၤယိနၤသၣ်ကသ့ၣ်ညါဝဲလၢ ကစၢ်ယွၤအိၣ်ဒီးစီၤဒၤဝံးအဃိ, တၢ်စူၢ်တၢ်နာ်လၢအပှဲၤဒီး တၢ်ဆီၣ်လီၤသးအပူၤ စံးကတိၤထီၣ်ဖျဲး ဟ့ၣ်ဂံၢ်ဟံၣ်ဘါစီၤဒၤဝံးန့ၣ်လီၤ.
ပှၤအိၣ်လၢပခိၣ်ပဃၢၤဝးဝးတဖၣ် လိၣ်ဘၣ်ဝဲပတၢ်ကတိၤဟ့ၣ်ဂံၢ်ဟ့ၣ်ဘါန့ၣ်လီၤ. ဒ်ပဆီၣ်လီၤပသးလၢယွၤအမဲာ်ညါဒီး ဃ့တၢ်လၢ ကစၢ်ယွၤကအဲၣ်အဝဲသ့ၣ်ခီဖျိလၢပှၤန့ၣ်ဒီး ပကမၤဂ့ၤမၤစၢၤ, ပှၤအိၣ်လၢပခိၣ်ပဃၢၤဝးဝးအဂီၢ်န့ၣ် ယွၤကမၤစၢၤပှၤန့ၣ်လီၤ.
