ဒီးကထၢၣ် ရ့းခၠး(ဒ) စဝဲစၢၣ်(Richard Swenson)ကွဲးဝဲဒၣ်လၢအလံာ် “တၢ်အကနူၤ” အပူၤ “ပကဘၣ်အိၣ်ဒီးတၢ်လီၢ်ပျီ ဖးလဲၢ် ဒ်သိးပကသါထီၣ်သါလီၤအဂီၢ်, ပလိၣ်ဘၣ်တၢ်သဘျ့ လၢပကဆိကမိၣ်ပဲာ်ဖးတၢ်အဂီၢ်, ဒီးတၢ်ပျဲလၢတၢ်ကူစါမၤဘျါက့ၤပှၤန့ၣ်လီၤ. တၢ်ရ့လိာ်သးတဖၣ်ကတုၤဃီၤဆူတၢ်အကတၢၢ် ခီဖျိလၢ တၢ်အသဟီၣ်တၢ်မၤအသးချ့သဒံးအဃိန့ၣ်လီၤ. ခီဖျိလၢ တၢ်ပညိၣ်တၢ်တိာ်ပာ် အဂ့ၤအဝါ လၢအလဲၤတၢ်ချ့သဒံးတဖၣ်ဟဲဘၣ်တိၢ်ပဖိတဖၣ်အဃိဒီး တၢ်ဘၣ်ဒိဘၣ်ထံး, တၢ်အိၣ်ပြံအိၣ်ပြါလၢ ဟီၣ်ခိၣ်လိၤလံန့ၣ်လီၤ. ပသးလီၤဘှံးလီၤဘှါန့ၣ် မ့ၢ်ကစၢ်ယွၤဘၣ်သးအဃိဧါ. ကစၢ်ယွၤ တနဲၣ်ဆှၢ ပှၤလၢထံဂၢၢ်အနံၤလၢၤဘၣ်ဧါ. လၢအပူၤကွံာ် တၢ်လီၢ်ပျီဖးလဲၢ်တဖၣ်န့ၣ် မ့ၢ်မတၤဟံးန့ၢ် ဆူၣ်ဝဲဒၣ်လဲၣ်. မ့ၢ်ပကဒိးန့ၢ်ဘၣ်က့ၤတၢ်တဖၣ်န့ၣ်ဒ်လဲၣ်.” စဝဲစၢၣ် စံးဝဲလၢ ပလိၣ်ဘၣ် တၢ်ဘှ့ၣ်တၢ်ဘှီၣ်အလီၢ်ဒီးကကဲထီၣ်တၢ်အဘျုးလၢပတၢ်အိၣ်မူအဂီၢ် “တၢ်လီၢ်တတီၤ,” ဒ်သိးပကအိၣ်ကဒုလၢကစၢ်အပူၤဒီး ထံၣ်လိာ်သးဒီးယွၤ အဂီၢ်န့ၣ်လီၤ.

အတၢ်ကွဲးအံၤ အဲၣ်ဒိးပာ်ဖျါ တၢ်မနုၤလဲၣ်. တၢ်ဃုထံၣ်န့ၢ် တၢ်လီၢ်ပျီဖးလဲၢ်လၢ တၢ်ကအိၣ်ဘှံးအိၣ်သါ, မၤပှဲၤထီၣ်က့ၤဂံၢ်ဘါအတၢ်မၤန့ၣ် မ့ၢ်တၢ်လၢစီၤမိၤရှ့မၤတ့ၢ်ဝဲအဂ့ၤကတၢၢ်လၢအတၢ်အိၣ်မူပူၤန့ၣ်လီၤ. ၂မိၤ ၃၃:၅ အပူၤပကထံၣ်ဘၣ် တၢ်ကဲခိၣ်ကဲနၢ်လၢ “ပှၤအံၣ်စရ့လးဖိလၢ အကိာ်ဆူၣ်တကလုာ်” အဂီၢ်န့ၣ် စီၤမိၤရှ့ဘၣ် အိၣ်ကဒုလၢယွၤအမဲာ်ညါ တလီၢ်လီၢ်ဒီး ဟံးန့ၢ်ယွၤအတၢ်နဲၣ်ကျဲတဖၣ်န့ၣ်လီၤ. အဆၢဖိ ၇ အပူၤ ပာ်ဖျါဝဲ စီၤမိၤရှ့ သူၣ်ထီၣ်ဒဲဒီး ယုၢ်ဝဲအမံၤလၢ “တၢ်အိၣ်ဖှိၣ်အဒဲ,” ဒီး အဆၢဖိ ၁၁ စံးဘၣ်ပှၤလၢ “ဒီးယွၤကတိၤတၢ်ဒီးစီၤမိၤရှ့မဲာ်သကိးမဲာ်, ဒ်ပှၤကညီကတိၤတၢ်ဒီးအတံၤအသကိးအသိးန့ၣ်လီၤ.” လူၤ ၅:၁၆ ပာ်ဖျါဝဲ ကစၢ်ယ့ၣ်ရှူးစ့ၢ်ကီး “ဟးထီၣ်ဆူပှၢ်လၢ်ကျါဒီးဘါထုကဖၣ်တၢ်လီၤ”. ကစၢ်ယ့ၣ်ရှူးဒီး စီၤမိၤရှ့ ခံဂၤလိာ်န့ၣ် သ့ၣ်ညါနၢ်ပၢၢ်ဝဲလၢ တၢ်ဟံးန့ၢ်တၢ်ဆၢကတီၢ် ထဲတဂၤဧိၤဒီး ပၢ်ယွၤန့ၣ် မ့ၢ်တၢ်အကါဒိၣ်တမံၤန့ၣ်လီၤ. ပတၢ်အိၣ်မူအပူၤစ့ၢ်ကီး အလီၢ်အိၣ်လၢ ပကဘၣ် တ့ဒုးအိၣ်ထီၣ် တၢ်အကနူၤတသနၢၣ်, တၢ်လီၢ်ပျီဖးလဲၢ်, ဒ်သိးပကအိၣ်ဘှံးအိၣ်ကဒုလၢယွၤအမဲာ်ညါဒီး မၤပှဲၤထီၣ်ပဂံၢ်ဘါအဂီၢ်န့ၣ်လီၤ. ပဟံးန့ၢ်တၢ်ဆၢကတီၢ်ဒီးကစၢ်ယွၤန့ၣ် ကကဲထီၣ်တၢ်မၤစၢၤလၢပတၢ်ဆၢတဲာ်တဖၣ်အပူၤ- တၢ်တ့ဒုးအိၣ်ထီၣ် တၢ်အကနူၤအသနၢၣ်ဒီး တၢ်အဆၢတဖၣ်လၢပတၢ်အိၣ်မူအပူၤအဃိဒီး ပကအိၣ်ဒီးနီၢ်ခိနီၢ်သးအဂံၢ်ဘါလၢ ပကအဲၣ်ကစၢ်ယွၤဃုာ်ဒီးပှၤဂုၤပှၤဂၤတဖၣ်န့ၣ်လီၤ. တနံၤအံၤ, မ်ပကဃုထံၣ်န့ၢ်ကစၢ်ယွၤလၢတၢ်လီၢ်ပျီဖးလဲၢ်တဖၣ်အပူၤန့ၣ်တက့ၢ်.