ဖဲ ၂၀၁၃နံၣ် ကီၢ်အမဲရကၤ ကရဲ ကဲည့ၣ် (Grand Canyon)ကစၢၢ်အကပၤ, ကစၢၢ်တြီၤလၢအယိာ်ဒီး အလဲၢ်အိၣ်ဝဲ ခီၣ်ယီၢ် ၁၅၀၀ န့ၣ် ဘၣ်တၢ်ဘျးစဲအီၤ လၢစတံထးသွဲအပျံၤန့ၣ် ပှၤလိာ်ကွဲတၢ်လၢမူခိၣ် န့း ဝၤလဲဒၣ် (Nik Wallenda) ကဘၣ်လဲၤခီဂာ် ပှၤဟဲကွၢ်ကီ တၢ်အိၣ်ဝဲ အဃိ ပှၤဟဲကွၢ်ကီတၢ်အိၣ်ဝဲ ဃုကယၤဃၣ်ဃၣ်န့ၣ်လီၤ. ဝၤလဲဒၣ် ယီၢ်လီၤဝဲလၢစတံထးသွဲပျံၤ, ကအိၣ် ခံစုမုၢ်ဒိၣ်အလိၤဒီး ဖဲအထံၣ်ဝဲတြီၤလာ်န့ၣ် စံးဘျုးစံးဖှိၣ် ကစၢ်ယ့ၣ်ရှူးန့ၣ်လီၤ. ဖဲစးထီၣ်ဟးဝဲဒၣ် လၢပျံၤလိၤ ဒ်သိးကလဲၤခီဂာ်ကစၢၢ်တြီၤန့ၣ် လဲၤဝဲဒ်သိးဒၣ်ပှၤလဲၤတၢ်လၢကျဲစၢၤအကတီၢ် အဝဲထုကဖၣ်ဒီး စံးထီၣ်ပတြၢၤကစၢ်ယ့ၣ်ရှူး န့ၣ်လီၤ. ဖဲကလံၤအူ ဟဲဆူၣ်ထီၣ်အကတီၢ် အဝဲဆိကတီၢ်, သကူးလီၤအသးန့ၣ်လီၤ. ကလံၤမ့ၢ်အိၣ်ဂၢၢ်ဒီး ဂဲၤဆၢထၢၣ်, ထိၣ်ဂ့ၤထိၣ်ဘၣ်လီၤအနီၢ်ကစၢ်ဒီး မ့ၢ်လၢကစၢ်ယွၤမၤဂၢၢ်ပျံၤအဃိ စံးဘျုးယွၤန့ၣ်လီၤ. အခီၣ်ခါ တခါလၢ်လၢ် လၢထးသွဲပျံၤလိၤန့ၣ် မ့ၢ်တၢ်သန့ၤလီၤသးလၢ ခရံာ်အစိကမီၤလီၤန့ၣ် ဝၤလဲဒၣ်ဒုးနဲၣ်ဖျါဝဲဒၣ်ဆူ ပှၤခိးကနၣ်ကွဲၤလ့လိၤ လၢစိၤဆၢကတီၢ်ဖဲန့ၣ် ဒီး ပှၤခိးကွၢ် တၢ်ဂီၤမူလၢ စိၤဆၢကတီၢ်ခဲအံၤတဖၣ်အဂီၢ်န့ၣ်လီၤ.
မၢ် ၄း၃၅-၃၈ အပူၤပာ်ဖျါဝဲ လၢကစၢ်ယ့ၣ်ရှူးဒီးအပျဲၢ်အဘီၣ်တဖၣ် လဲၤတၢ်လၢကဘီ ဒ်သိးကခီဂာ်ကၤလံၤလါပီၣ်လဲၣ်အဆၢကတီၢ် ကလံၤ တပျုာ်တပျီၤထီၣ်ဖးဒိၣ်ဒီး လပီတဖၣ်ဟဲနုာ်လီၤဆူကဘီပူၤတုၤအကပှဲၤတ့ၢ်ကဘီအဃိ အပျဲၢ်အဘီၣ်တဖၣ်ပျံၤတၢ်ဒီး ဃ့တၢ်မၤစၢၤလၢအကစၢ်န့ၣ်လီၤ. အဆၢဖိ ၃၉-၄၁ အပူၤပကထံၣ်ဘၣ် ကစၢ်ယ့ၣ်ရှူးဟ့ၣ်လီၤအကလုၢ်ဒီးမၤဂၢၢ်တၢ်ခဲလၢာ်ဝံၤ, အပျဲၢ်တဖၣ်သ့ၣ်ညါဝဲဒၣ်လၢ ကစၢ်ယ့ၣ်ရှူးပၢဆှၢ ကလံၤဒီး ကယဲၢ်တၢ်ခဲလၢာ်န့ၣ်လီၤ. တၢ်စူၢ်က့ၤနာ်က့ၤကစၢ်ယ့ၣ်ရှူး ကဒိၣ်ထီၣ် အါထီၣ်အဂီၢ် အပျဲၢ်အဘီၣ်တဖၣ် မၤလိန့ၢ်တၢ် တပတီၢ်ဘၣ်တပတီၢ်န့ၣ်လီၤ. အပျဲၢ်အဘီၣ်အတၢ်လဲၤခီဖျိတဖၣ်အံၤ ကဲထီၣ်တၢ်မၤစၢၤလၢ ပှၤအဂၤတဖၣ်ကသ့ၣ်ညါပာ်ပနီၣ်ကစၢ်ယ့ၣ်ရှူး ဒ်အမ့ၢ်ပှၤလၢ အတူၢ်လိာ်ပှၤဘူးဘူးတံၢ်တံၢ်ဒီး ပှၤလၢအအိၣ်ဒီးအစိအကမီၤ လီၤတိၢ်လီၤဆီဒိၣ်မးတဂၤန့ၣ်လီၤ.
ပမ့ၢ်ဘၣ်ကွၢ်ဆၢၣ်မဲာ်ဒီး ကလံၤမုၢ်တွၤ လၢပတၢ်အိၣ်မူအပူၤမ့ၢ်ဂ့ၤ ပမ့ၢ်ဘၣ်လဲၤခီဂာ် တၢ်နးတၢ်ဖှီၣ်ကစၢၢ်တြီၤလာ်မ့ၢ်ဂ့ၤ, ပပာ်ဖျါထီၣ် ပတၢ်စူၢ်တၢ်နာ် လၢအနာ်န့ၢ် ကစၢ်ယ့ၣ်ရှူးအစိကမီၤသ့ဝဲဒၣ်န့ၣ်လီၤ. ကစၢ်ယွၤကစူးကါ ပတၢ်လဲၤတၢ်လၢတၢ်စူၢ်တၢ်နာ်တမံၤအံၤ ဒ်သိး ကထိၣ်ဟူးထိၣ်ဂဲၤထီၣ် ပှၤဂုၤပှၤဂၤလၢ ကမုၢ်လၢ်တၢ်လၢအပူၤအဂီၢ်န့ၣ်လီၤ.
