ဖဲနနၢ်ဟူဘၣ် ပှၤလီၤဃိာ်ဖိတဖၣ် အဂ့ၢ်န့ၣ်ဒီး အဝဲသ့ၣ်အဂီၢ် တၢ်ထုးဖးပာ်လီၤဆီထဲတဂၤ ဒီးဘၣ်အိၣ်သယုၢ်ဝဲဒၣ်န့ၣ် တၢ်ဂ့ၢ်အကီခဲကတၢၢ် လၢအဖျါဆှဲလီၤတံၢ်ဝဲန့ၣ်လီၤ. တၢ်ဃုမၤလိန့ၢ်တၢ်တမံၤ ပာ်ဖျါဝဲလၢ ပှၤလီၤဃိာ်ဖိတဂၤ, လီၤဘၣ်ဝဲဃိာ် အနံၣ်အါဂ့ၤစှၤဂ့ၤ, အါတက့ၢ် အဟံၣ်ဖိဃီဖိမ့ၢ်ဂ့ၤ, အတံၤသကိး မ့ၢ်ဂ့ၤ, မ့ၢ်ဟဲအိၣ်သကိးအီၤန့ၣ် ဟဲဝဲထဲ ခံဘျီဧိၤန့ၣ်လီၤ. တၢ်ဘၣ်အိၣ်သယုၢ်သညိထဲတဂၤဧိၤန့ၣ် တၢ်မၤအသးနီၢ်နီၢ် တပယူၢ်ဃီ လၢအဝဲသ့ၣ်အဂီၢ်န့ၣ်လီၤ.
စီၤယိၤသးန့ၣ် တၢ်လၢ အတမၤဝဲတမံၤအဂီၢ် ပှၤပာ်တၢ်ကမၣ်လၢအလိၤအဃိ ဘၣ်လီၤဝဲဃိာ်န့ၣ် ပဆိကမိၣ် ကမ့ၢ်တၢ်လီၤသးဆါလၢ အဂီၢ်န့ၣ်လီၤ. ဘၣ်ဆၣ် တၢ်မုၢ်လၢ် အိၣ်ဝဲဒံးလၢအဂီၢ်န့ၣ်လီၤ. ယွၤမၤစၢၤ စီၤယိၤသး ဒ်သိးကထုးထီၣ် တၢ်မံမီၢ် အခီပညီ အဘၣ် လၢပှၤလီၤဃိာ်ဒီးအီၤ, ဒီးပှၤတဂၤအံၤ မ့ၢ်တ့ၢ်ဝဲ ဖၤရိၤအခ့အပှၤန့ၣ်လီၤ. ၁ မိၤ ၄၀:၁၄ အပူၤ စီၤယိၤသး စံးဘၣ်အီၤလၢ “ဖၤရိၤ ကပာ်က့ၤအီၤလၢ ပှၤကွၢ်တၢ်အီအလီၢ် ဒီး တုၤနဘၣ်တၢ်ဂ့ၤဒီး သ့ၣ်နီၣ်ထီၣ်က့ၤယၤ, ဒီးမၤယၤလၢ တၢ်ဘျုးတၢ်ဖှိၣ်, ဒီးစံးဘၣ်ဖၤရိၤ လၢယဂ့ၢ်ယကျိၤ ဒီးဒုးဟးထီၣ်ယၤလၢ ဟံၣ်တဖျၢၣ်အံၤအပူၤတက့ၢ်”န့ၣ်လီၤ.
အဆၢဖိ ၂၃ အပူၤ ပကထံၣ်ဘၣ် “ပှၤကွၢ်တၢ်အီတဖၣ်အဒိၣ်န့ၣ် တသ့ၣ်နီၣ်ထီၣ်က့ၤဘၣ် စီၤယိၤသးဘၣ်. မ့ၢ်အသးပ့ၤနီၣ်အီၤ”န့ၣ်လီၤ. စီၤယိၤသးဘၣ်အိၣ်ခိးအါထီၣ်ဝဲ ခံနံၣ်န့ၣ်လီၤ. ဖဲအိၣ်ခိးတၢ်န့ၣ်တဖၣ်အပူၤ ဒီးတၢ်ပနီၣ်လၢ အကဆီတလဲ အတၢ်အိၣ်အသး တဖျါဝဲဘၣ်ဆၣ် မ့ၢ်လၢ ကစၢ်ယွၤအိၣ်ဒီးအီၤအဃိ စီၤယိၤသး တအိၣ်သယုၢ်ဝဲထဲတဂၤဧိၤဘၣ်န့ၣ်လီၤ. အကတၢၢ်န့ၣ် ၁ မိၤ ၄၁:၉-၁၄ ပာ်ဖျါဝဲ ဖၤရိၤအခ့အပှၤအံၤ သ့ၣ်နီၣ်ထီၣ်က့ၤ အတၢ်အၢၣ်လီၤ ဒီးစီၤယိၤသးအဃိ, ဖဲစီၤယိၤသး ထုးထီၣ်န့ၢ် ဖၤရိၤအတၢ်မံမီၢ် အခီပညီဝံၤဒီး ဘၣ်တၢ်ပျၢ်လီၤအီၤလၢဃိာ်န့ၣ်လီၤ.
တၢ်အိၣ်အသး မၤအသးတဖၣ်အဃိ ပသးပူၤ ပကတူၢ်ဘၣ်ခီၣ်ဘၣ်တၢ် ဒ်သိးလၢ ပဘၣ်တၢ်သးပ့ၤနီၣ်ပှၤလံ ဒီးသးအတၢ်သယုၢ်သညိ ကဟဲနုာ်လီၤဆူ ပတၢ်ဆိကမိၣ်တဖၣ်အပူၤ, ဘၣ်ဆၣ် ယရှါ ၄၉:၁၅ အပူၤ ယွၤစံးဘၣ်ပှၤ “မ့မ့ၢ်ယဲဒၣ်အံၤ ယတသးပ့ၤနီၣ် ဘၣ်နၤဘၣ်”အဃိ, ပဟံးဃာ်ဂၢၢ်ကျၢၤ ကစၢ်ယွၤအတၢ်အၢၣ်လီၤလၢ အမၤလီၤတံၢ်ဝဲဆူ အဖိတဖၣ်အံၤ သ့ဝဲဒၣ်န့ၣ်လီၤ.
