နံၣ်ကယၤ ၁၈ ကလၢာ် ဘူးထီၣ်အဆၢကတီၢ် မ့ၤရံၣ် စလဲးစၣ် (Mary Slessor) ဒ်သိး ကဟံးထီၣ်ဖီၣ်ထီၣ်သရၣ်ဖးဒိၣ် ဒ့ဘ့း လ့ဘ့စတိ(David Livingstone) လၢအလဲၤပူၤကွံာ် ဟီၣ်ခိၣ်တဂၤအံၤ အတၢ်သးခုကစီၣ်တၢ်မၤအဂီၢ် လၢတၢ်သူၣ်ဆူၣ်သးဆူၣ်အပူၤ ဒိးထီၣ်ကဘီယၢ်လၣ် ဒီးလဲၤဝဲဆူ အၤဖရံကၤထံကီၢ် ကလၤဘၣ်(Calabar)ခဲအံၤ နဲၣ်ကၠံရံယၤ(Nigeria)န့ၣ်လီၤ. မူဒါအဆိကတၢၢ်လၢ အဂီၢ်မ့ၢ်ဝဲ ကဘၣ်သိၣ်လိတၢ်လၢ ကၠိဒီး ကဘၣ် အိၣ်သကိး အီၣ်သကိးတၢ်ဒီး ပှၤမၤမ့းရှၢၣ်တၢ်မၤဂုၤဂၤတဖၣ်န့ၣ်လီၤ. ဘၣ်ဆၣ် အဝဲအိၣ်ဒီးသးလၢ ကမၤမ့းရှၢၣ်နရံၣ်တၢ်မၤလၢ ကျိၤကျဲလီၤဆီန့ၣ်လီၤ. လၢတၢ်န့ၣ်အဃိ အဝဲမၤဝဲတၢ်လၢ ပှၤတညီနုာ်မၤတၢ်ဖဲ လီၢ်ကဝီၤပူၤန့ၣ်လီၤ. မ့ၤရံၣ် လဲၤအိၣ်ဆိးဝဲဒီး ပှၤတဝၢဖိတဖၣ်လၢ ကဘၣ်မၤ တၢ်သးခုကစီၣ်အလီၢ်ဒီး မၤလိဝဲ ပှၤတဝၢဖိတဖၣ် အကျိာ်တဖၣ်အတၢ်ကတိၤ အိၣ်မူအိၣ်ဂဲၤအီၣ်အီဒ် ပှၤတဝၢဖိတဖၣ်အသိး န့ၣ်လီၤ. ဖိသၣ်လၢ အဘၣ်တၢ်စူးကွံာ်ပာ်တ့ၢ်အီၤတဖၣ် ကအိၣ်အဂၤခံဆံသၢဆံန့ၣ် ကွၢ်ထွဲ လုၢ်အီၣ်လုၢ်အီဝဲ ဒ်န့ၣ်လီၤ. အနံၣ်လွံၢ်ဆံဃာ်ဃာ် အဝဲလဲၤစိာ်န့ၢ်ဝဲ ပှၤလၢအလိၣ်ဘၣ် တၢ်မုၢ်လၢ် ဒီး တၢ်သးခုကစီၣ်န့ၣ်လီၤ.
တၢ်မၢဖိစီၤပီလူး သ့ၣ်ညါဝဲလၢ တၢ်မၤလၢပှဲၤတၢ်နီၢ်နီၢ် ဆူ ပှၤလၢ ပခိၣ်ပဃၢၤဝးဝးတဖၣ် အတၢ်လိၣ်န့ၢ် မ့ၢ်တၢ်အကါဒိၣ်တၢ်န့ၣ်လီၤ. ၁ ကရံၣ်သူး ၁၂:၄-၅ အပူၤ ပာ်ဖျါဝဲ “ဒီးတၢ်ဟ့ၣ်န့ၣ် အိၣ်လီၤဆီအါမံၤဘၣ်ဆၣ်ဒီး, သးန့ၣ် မ့ၢ်တဂၤဃီလီၤ. ဒီးတၢ်အခ့အပှၤအတၢ်မၤ အိၣ်လီၤဆီအါမံၤဘၣ်ဆၣ်ဒီး, ကစၢ်မ့ၢ်တဂၤဃီလီၤ” န့ၣ်လီၤ. လၢတၢ်န့ၣ်အဃိ ဒ်ပှၤတဂၤဘၣ်တဂၤအတၢ်လိၣ် အိၣ်ဝဲအသိး စီၤပီလူး မၤတၢ်အခ့အပှၤအတၢ်မၤန့ၣ်လီၤ. ပမ့ၢ်ကွၢ်အဒိန့ၣ် ၁ ကရံၣ် ၉:၂၂အပူၤ “လၢပှၤအဂံၢ်စၢ်အဘါစၢ်အဂီၢ်, ဒ်ပှၤဂံၢ်စၢ်ဘါစၢ်အသိး” စီၤပီလူးအိၣ်မူအိၣ်ဂဲၤ မၤတၢ်လၢ ပှၤအဂီၢ်န့ၣ်လီၤ.
တယံာ်ဒံးဘၣ်န့ၣ် ယသ့ၣ်ညါထွဲ တၢ်အိၣ်ဖှိၣ်တဖု ကမၤဝဲ ကယဲၢ်တၢ်သ့တၢ်လၢ်ခဲလၢာ် အတၢ်ဘါတၢ်ရဲၣ်တၢ်ကျဲၤအဂီၢ် ဘိးဘၣ်သ့ၣ်ညါဝဲန့ၣ်လီၤ. တၢ်ဘါတၢ်ရဲၣ်တၢ်ကျဲၤအံၤ တၢ်အဒူၣ်အဆၢလၢ အတြီဃာ် တၢ်တအိၣ်နီတမံၤဒီး ကယဲၢ်ပှၤလၢ နီၢ်ခိနီၢ်သးက့ၢ်ဂီၤတလၢတပှဲၤတဖၣ် ကဘူၣ်ထီၣ်ဘါထီၣ် ယွၤအဂီၢ်န့ၣ်လီၤ. ဒ်စီၤပီလူးမၤဝဲအသိး တၢ်မၤအံၤ ကထုးန့ၢ်သူၣ်န့ၢ်သးလၢ ပှၤဂၤဒီး တၢ်သးခုကစီၣ် ကမူထီၣ်ဂဲၤထီၣ်လၢ ပပှၤတဝၢပူၤ အဂီၢ်န့ၣ်လီၤ.
ဖဲပအိၣ်မူအိၣ်ဂဲၤ ပာ်ဖျါထီၣ် ပတၢ်စူၢ်တၢ်နာ် ဆူ ပခိၣ်ပဃၢၤဝးဝးန့ၣ် မ်ကစၢ်ယွၤ ကနဲၣ်ဆှၢပှၤလၢ ပကဒုးသ့ၣ်ညါ ကစၢ်ယ့ၣ်ရှူး ဆူ အဝဲသ့ၣ်အအိၣ်ခီဖျိ ကျိၤကျဲအသီ ကဆှီဒီတဖၣ်န့ၣ်လီၤ.
