Xavier (စ့ဘံၣ်ယၤ)ထီၣ်ဝဲ တီၤဖုၣ်ကၠိအဆၢကတီၢ်, အတၢ်လဲၤတၢ်က့ၤအဂီၢ် ယဘၣ်နီၣ်ဆှၢအီၤလၢသိလ့ၣ်န့ၣ်လီၤ. ဘၣ်တနံၤန့ၣ် ယတၢ်ဖံးတၢ်မၤတဖၣ် တဘၣ်လိာ်ဘၣ်စးအဃိ ယလဲၤအိၣ်အီၤစဲၤခံဝဲဒၣ်န့ၣ်လီၤ. ယဆိကတီၢ် သိလ့ၣ်လၢ ပှၤပာ်သိလ့ၣ်အလီၢ် ဒီးလၢတၢ်သးကိၢ်ဘၣ်ယိၣ် တၢ်အပူၤ ယဃ့ထုကဖၣ် ဒီးလဲၤ တဘျီဃီဆူအတီၤဒၢးန့ၣ်လီၤ. ယထံၣ်အဝဲ ဖိးဟုဃာ်အထၢၣ်ဝံချၢဖိ ဒီးဆ့ၣ်နီၤဝဲလၢ အသရၣ်မုၣ်ကပၤန့ၣ်လီၤ. “ဖိခွါဧၢ, ဝံသးစူၤ မိမိၢ်, နအိၣ်မၤသးဒ်လဲၣ်” ဒီးစံးဆၢဝဲ “ဂ့ၤကစီဒီ, ဘၣ်ဆၣ် မ့ၢ်လၢ နစဲၤခံအဃိ ယသးဒိၣ်နၤ”န့ၣ်လီၤ. ယဖိခွါသးပှံၢ်ယၤန့ၣ် အတၢ်ကမၣ် တအိၣ်ဘၣ်. ယနီၢ်ကစၢ် ယသးဟးဂီၤလီၤ ယသးဒၣ်ယဲန့ၣ်လီၤ. ယအဲၣ်ယဖိခွါ ဒီးယသ့ၣ်ညါလၢ မုၢ်နံၤတဖၣ် ကအိၣ်ဝဲဒၣ်ဒံး လၢယကမၤဟးဂီၤဘၣ်အသးန့ၣ်လီၤ. ဘၣ်သ့ၣ်သ့ၣ် မုၢ်တနံၤ အသးကဟးဂီၤဝဲလၢ ကစၢ်ယွၤ အလိၤန့ၣ် ယသ့ၣ်ညါစ့ၢ်ကီးန့ၣ်လီၤ. လၢတၢ်န့ၣ်အဃိ, ဒ်သိးကသ့ၣ်ညါ တၢ်လၢ ကစၢ်ယွၤန့ၣ် တစူးကွံာ်ညိကွံာ် အတၢ်အၢၣ်လီၤ. နီတဘျီဘၣ်န့ၣ် ယဂုာ်ကျဲးစၢး သိၣ်လိနဲၣ်လိအီၤန့ၣ်လီၤ.
စံး ၃၃:၁-၃ ဟ့ၣ်ဂံၢ်ဟ့ၣ်ဘါပှၤလၢ ပကသးဝံၣ်စံးထီၣ်ပတြၢၤ ကစၢ်ယွၤ အတၢ်တီတၢ်လိၤ လၢတၢ်သူၣ်ဖှံသးညီ, ဒီးအဆၢဖိ ၄ ပာ်ဖျါဝဲ “အဂ့ၢ်ဒ်အံၤ, ယွၤအကလုၢ်န့ၣ် မ့ၢ်အလိၤလီၤ. ဒီးကယဲၢ်အမၤတၢ်န့ၣ် တၢ်မ့ၢ်တၢ်တီ” န့ၣ်လီၤ. အဆၢဖိ ၅-၇ န့ၣ် ပှၤကွဲးထါ စူးကါတဲ ကစၢ်ယွၤအတၢ်ဘၣ်တ့ ဒ်အမ့ၢ် တၢ်အုၣ်အသး ဘၣ်ထွဲဒီးယွၤအစိအကမီၤ ဒီးတၢ်သန့ၤအလီၢ် ဒီးအဆၢဖိ ၈ အပူၤ ဟ့ၣ်သဆၣ်ထီၣ် “ဟီၣ်ခိၣ်ဖိခဲလၢာ်” ကပျံၤယွၤ ဒီးဘူၣ်ထီၣ်ဘါထီၣ်ယွၤအဂီၢ်န့ၣ်လီၤ.
ဖဲတၢ်ရဲၣ်တၢ်ကျဲၤတဖၣ် ဟးဂီၤကွံာ်ဝဲဒၣ်မ့ၢ်ဂ့ၤ ပှၤမၤဟးဂီၤ ပသူၣ်ပသးမ့ၢ်ဂ့ၤ တၢ်တဖၣ်အံၤ ကဲထီၣ် တၢ်လ့ပစီသ့ဝဲဒၣ်လၢ ပကသးဟးဂီၤ ကစၢ်ယွၤန့ၣ်လီၤ. ဘၣ်ဆၣ် အဆၢဖိ ၁၁ ပာ်ဖျါဝဲလၢ “ယွၤအကူၣ်ထီၣ်ဖးလီၤတၢ်န့ၣ် အိၣ်ဂၢၢ်ဆိးကျၢၤ လီၤထူလီၤယိာ်အဃိ ပနာ်သန့ၤပသးလၢ ကစၢ်ယွၤ သ့ဝဲသပှၢ်ကတၢၢ်န့ၣ်လီၤ.”
မ့ၢ်လၢ တၢ်ဘၣ်တ့ကစၢ်လၢ ပအဲၣ်ဘၣ်အီၤတဂၤန့ၣ် ဒုးအိၣ်ဂၢၢ်ဆိးကျၢၤ ကယဲၢ်တၢ်ခဲလၢာ် ဒီးကယဲၢ်ပှၤခဲလၢာ်အဃိ, တၢ်အိၣ်အသး, မၤအသးတဖၣ် မ့ၢ်တဘၣ်လိာ်ဘၣ်စးသနာ်က့ၤ ပသးဝံၣ် စံးထီၣ်ပတြၢၤ ကစၢ်ယွၤသ့ဝဲဒၣ်န့ၣ်လီၤ. ကစၢ်ယွၤအတၢ်တီၤတၢ်လိၤန့ၣ် မ့ၢ်တၢ်အထူအယိာ်န့ၣ်လီၤ.
