ဖံ(လ) (Phil)ဒီး စဲဒံၣ် (Sandy) ခံဂၤန့ၣ် နၢ်ဟူဘၣ် ပှၤဘၣ်ကီဘၣ်ခဲဖိသၣ်တဖၣ်အဂ့ၢ် ဒီးအသးဘၣ်ဒိဘၣ်ထံးအဃိ အဝဲသ့ၣ် အိးထီၣ်န့ၢ်ဝဲအသးတြဲၤ ဒီးဟံၣ်တြဲၤလၢ ပှၤဘၣ်ကီဘၣ်ခဲ ဖိသၣ်ခံဂၤအဂီၢ်န့ၣ်လီၤ. အဝဲသ့ၣ် လဲၤအိၣ်ဖိသၣ်ခံဂၤအံၤ လၢကဘီယူၤသန့ၤဝံၤ ဟဲက့ၤနီၣ်သိလ့ၣ်လၢ တၢ်သးဆူၣ်သးဂဲၤ ဒီးလၢတၢ်ဘှ့ၣ်တၢ်ဘှီၣ်အပူၤန့ၣ်လီၤ. မ့ၢ်အဝဲသ့ၣ် ကတဲာ်ကတီၤပာ်အသး လၢတၢ်မၤအသးအံၤအဂီၢ် ဝံၤလံဧါ. လၢလုၢ်လၢ်တၢ်ဆဲးတၢ်လၤ, ကျိာ်တၢ်ကတိၤဒီး တၢ်ဘူၣ်တၢ်ဘါ တဒ်သိးလိာ်အသးတဖၣ်အဂီၢ်န့ၣ်လီၤ. ဘၣ်ဆၣ် ဖံ(လ) ဒီး စဲဒံၣ် ခံဂၤအံၤန့ၣ် ကဲထီၣ် တၢ်အိၣ်ကဒုလီၢ်လၢ ဖိသၣ်လုၢ်ဒိၣ်ပှ့ၤဒိၣ်ခံဂၤ အဂီၢ်လံန့ၣ်လီၤ.
စီၤဘိၤဧးစ့ၢ်ကီး ဖဲအနၢ်ဟူနီၢ်ရူၤသးအဂ့ၢ်န့ၣ်ဒီး အသးတမုာ်, အသးဘၣ်ဒိဘၣ်ထံး ဝဲဒၣ်န့ၣ်လီၤ. ဒ်သိးအကမၤစၢၤ နီၢ်နၤဧမံအဂီၢ် နီၢ်ရူၤသးပာ်တ့ၢ်ကွံာ် အပှၤကလုာ်အဂ့ၢ် စီၤဘိၤဧးသ့ၣ်ညါဝဲဒီး ဖဲနီၢ်ရူၤသး ဟဲထၢဘုအစဲၤတဖၣ်လၢ အစံာ်ပျီပူၤ အဆၢကတီၢ် ရူၤ ၂:၁၂ ပာ်ဖျါ စီၤဘိၤဧး ထုကဖၣ်ဆိၣ်ဂ့ၤ နီၣ်ရူၤသး “မ်ယွၤဟ့ၣ်ကၣ်နမၤတၢ်တက့ၢ်. ဒီးမ်ကန့ၢ်ဘၣ် တၢ်အဘူးအလဲလၢယွၤ, အံၣ်စရ့လးအကစၢ်လၢ နဟဲအိၣ်သဒၢလၢ အဒံးဆ့ဖီလာ်န့ၣ်တက့ၢ်”န့ၣ်လီၤ.
နီၢ်ရူၤသး ဒုးသ့ၣ်နီၣ်ထီၣ်က့ၤ စီၤဘိၤဧးလၢ အတၢ်ဆိၣ်ဂ့ၤအီၤအံၤန့ၣ် ဖဲရူၤ ၃:၉ အပူၤ ပကထံၣ်ဘၣ် စီၤဘိၤဧးမံဝဲ အဆၢကတီၢ်, သ့ၣ်ညါလၢ ပိာ်မုၣ်တဂၤ မံလၢ အခီၣ်ထံး အဃိ သံကွၢ်ဝဲ “နမ့ၢ်မတၤတဂၤလဲၣ်”န့ၣ်ဒီး နီၢ်ရူၤသး စံးဆၢအီၤလၢ “ယမ့ၢ်နကုၢ်ပိာ်မုၣ် နီၢ်ရူၤသးလီၤ. ဒါလီၤ နယၣ်လၢ ယဖီခိၣ်န့ၣ်တက့ၢ်. အဂ့ၢ်ဒ်အံၤ, နမ့ၢ် ပှၤကြၢးပှ့ၤက့ၤတၢ်တဂၤလီၤ”န့ၣ်လီၤ.
လၢဧ့ၤဘြံၤကျိာ်တၢ်ကတိၤ ယၣ်အထိးနါဒီး တၢ်အဒံးဆ့န့ၣ် မ့ၢ်တၢ်တမံၤဃီန့ၣ်လီၤ. ခီဖျိလၢ စီၤဘိၤဧး ဒိးတ့ဒိးဖျီအသးလၢ နီၢ်ရူၤသးဒီး နီၢ်ရူၤသးဒိးန့ၢ်ဘၣ် တၢ်အိၣ်ကဒုလီၢ်ဒီး အဝဲသ့ၣ် အတၢ်လီၤစၢၤလီၤသွဲၣ် စီၤဒၤဝံး ပာ်ဖျါကဒါက့ၤ စီၤဘိၤဧး ဒီးနီၢ်ရူၤသးအဂ့ၢ်အကျိၤတဖၣ် ဖဲအသးဝံၣ် စံးထီၣ်ပတြၢၤအံၣ်စရ့လးအယွၤ ဖဲ စံး ၃၆:၇ အပူၤ “ယွၤဧၢ, နဘျုးနဖှိၣ် မ့ၢ်တၢ်လုၢ်ဒိၣ်ပှ့ၤဒိၣ် ဆံးဒိၣ်လဲၣ်, ကစၢ်ဧၢ, ဒီးပှၤကညီဖိ သန့ၤအသးလၢ နဒံးဆ့အကဒုပူၤလီၤ”န့ၣ်လီၤ.
