ဖဲ၂၀၀၉နံၣ်, လၢစတဲ(န)ဖီးဖၠၣ်စိမိၤန့ၣ် ပှၤဃုမၤလိသ့ၣ်ညါတၢ်တဖု,မၤကွၢ်ဝဲကၠိဖိ ၂၀၀ဘျဲၣ် လၢစဲအ့ၣ်တၢ်မၤကွၢ်ဘၣ်ထွဲဒီး တၢ်ဆီတလဲမၤတၢ်ဖံးတၢ်မၤဒီး တၢ်သ့မၤနီၣ် တၢ်လၢခိၣ်နူာ်အတၢ်မၤခံထံၣ်န့ၣ်လီၤ. လၢတၢ်ကမၢကမၣ်အပူၤ တၢ်မၤလၢ အစဲဟဲဖျါထီၣ်လၢကၠိဖိတဖၣ် လၢအထံၣ်သ့ၣ်ညါလီၤအသး ဒ်အမ့ၢ် ပှၤမၤတၢ်သ့တၢ်အါမံၤ လၢတၢ်ဆၢကတီၢ်တဘျီဃီ အပတီၢ်အပူၤတဖၣ်န့ၣ် တၢ်အိၣ်အသးမၤအသးတဖၣ် လၢအဝဲသ့ၣ် အဂီၢ် အၢန့ၢ်နးန့ၢ် ဒ်ကၠိဖိလၢ အမၤတၢ်တမံၤဝံၤမး မၤဝဲအဂၤတမံၤတဖၣ် န့ၣ်လီၤ. ကၠိဖိလၢ အမၤတၢ်အါမံၤ အါမၠိတဖၣ်န့ၣ် တၢ်ဂ့ၢ်ကီအိၣ်ဝဲလၢ ကပာ်ပညိၣ်ဆိကမိၣ်တၢ်ဖံးတၢ်မၤထဲတမံၤအဂီၢ်ဒီး တၢ်ကပဲာ်ဖးတၢ်ဂ့ၢ်တၢ်ကျိၤတဖၣ်လၢ တၢ်ဖံးတၢ်မၤအဂီၢ် ကီခဲဝဲဒၣ်န့ၣ်လီၤ. တၢ်ကပာ်ပညိၣ် ဆိကမိၣ်ထံ တၢ်ဖံးတၢ်မၤတမံၤဧိၤအဂီၢ် ပသးမ့ၢ်ဒံဝ့ၤဒံဝီၤန့ၣ် တၢ်မၤအသးအံၤ ကဲထီၣ်တၢ်တၤတၢ်လၢ ပဂီၢ်န့ၣ်လီၤ.
ဖဲကစၢ်ယ့ၣ်ရှူးလဲၤဆူ နီၢ်မၤရံဒီးနီၢ်မၢ်သၤအဟံၣ် အဆၢကတီၢ်, လူၤ ၁၀:၄၀ ပာ်ဖျါဝဲလၢ “မ့မ့ၢ် နီၢ်မၢ်သၤန့ၣ် လၢအတၢ်မၤအါအဃိ ဒီးအသးကိၢ်ထီၣ်” ဝဲဒၣ် အဂ့ၢ်န့ၣ်လီၤ. အဆၢဖိ ၃၉-၄၂ အပူၤ စံးဘၣ်ပှၤ မ့မ့ၢ် နီၢ်မၢ်သၤ အဒီပုၢ်ဝဲၢ်မုၣ် နီၢ်မၤရံတခီ, ဃုထၢဝဲလၢ ကဆ့ၣ်နီၤလၢ ကစၢ်အခီၣ်ထံး ဒီးကနၣ်ကစၢ်ယ့ၣ်ရှူးသိၣ်လိနဲၣ်လိတၢ်တဖၣ်, ဒ်သိးကဒိးန့ၢ်ဘၣ် တၢ်ကူၣ်သ့ဒီးသးအတၢ်မုာ်တၢ်ပၢၤ လၢပှၤတဟံးထီၣ်ကွံာ် ဘၣ်လၢအီၤ နီတဂၤဘၣ်န့ၣ်လီၤ. အဆၢဖိ ၄၁-၄၂ အပူၤ ပကထံၣ်ဘၣ် ဖဲနီၢ်မၢ်သၤ စံးဝဲကစၢ်ယ့ၣ်ရှူး ဒ်သိးအကမၤနီၢ်မၤရံ ကမၤစၢၤအီၤအဂီၢ်န့ၣ်ဒီး ကစၢ်ယ့ၣ်ရှူး စံးဘၣ်အီၤ “နီၢ်မၢ်သၤဧၢ, နဲဒၣ်အံၤ နဘၣ်ယိၣ်တၢ်ဒီး နသးကိၢ်တၢ်လၢ တၢ်အါမံၤအဃိလီၤ. ဘၣ်ဆၣ်ဒီး တၢ်လၢ ပှၤကြၢးန့ၢ်ဘၣ်ဝဲန့ၣ်, အိၣ်တမံၤလီၤ”န့ၣ်လီၤ.
ကစၢ်ယွၤအဲၣ်ဒိးဝဲလၢ ပကဆိကမိၣ်ဆိတၢ်လၢအီၤန့ၣ်လီၤ. ဘၣ်ဆၣ် ဒ်နီၢ်မၢ်သၤအသိး ပသးဘၣ်ကိၢ်ဘၣ်ဂီၤ တၢ်လၢတၢ်ဖံးတၢ်မၤဒီး တၢ်ဂ့ၢ်ကီတဖၣ်အဂီၢ်န့ၣ်လီၤ. တၢ်ကူၣ်သ့ဒီး တၢ်မုၢ်လၢ်လၢ ပလိၣ်ဘၣ်တဖၣ်န့ၣ် ထဲဒၣ်ကစၢ်ယွၤ တဂၤဧိၤဟ့ၣ်မၤစၢၤ ပှၤသ့ဝဲလီၤန့ၣ် ပသ့ၣ်ညါဒၣ်လဲာ် ပညိကွံာ် ကစၢ်ယွၤအတၢ်အိၣ်ဒီးပှၤန့ၣ်လီၤ. ပမ့ၢ်မၤဆိတၢ် ခီဖျိတၢ်ထုကဖၣ် ဒီးဖးမၤလိကစၢ်ကလုၢ်ကထါ ဒိၣ်ဒိၣ်ယိာ်ယိာ်န့ၣ် ဒီးကစၢ်ယွၤကဟ့ၣ်ပှၤတၢ်နဲၣ်ကျဲ ဒီးဂံၢ်ဘါလၢ ပလိၣ်ဘၣ်တဖၣ် ဒ်သိးပကစံးဆၢမၤဆၢ တၢ်ကီတၢ်ခဲလၢ အတၤပှၤတဖၣ်န့ၣ်လီၤ.
