ယတံၤသကိးလၢတၢ်အိၣ်ဖှိၣ်ပူၤ ကွဲးဆှၢန့ၢ်ယၤ လီလံာ်ပရၢ ဒီးစံးဝဲ “ဟ့ ဖိဖၣ်ဧၢ, တလါအံၤ လၢတၢ်ကဟုကယာ် ကရူၢ်တၢ်ထံၣ်လိာ်သးအဆၢကတီၢ်, ပကရူၢ်ဖိတဖၣ် ပကမၤသကိးတၢ်, ဒ်လံာ်ယၤကိာ် ၅:၁၆ စံးပာ်အသိးန့ၣ်တက့ၢ်. ပကဒုးအိၣ်ထီၣ် တၢ်အိၣ်အသးလၢ ပကနာ်လိာ်သကိးပသး ဒီး ပတဟးစံးကတိၤ ပတၢ်ဂ့ၢ်ဆူ ပှၤဂၤလၢ တၢ်မၤဘံၣ်မၤဘၢလိာ်သးသကိးသကိးအဂီၢ် ဒ်သိး ပကဟ့ၣ်ခီဟ့ၣ်နီၤလိာ်သး ပတၢ်ဂ့ၢ်ကီလၢ ပတၢ်အိၣ်မူတဖၣ်အပူၤ ဒီးဒ်သိးပကဘါထုကဖၣ်လိာ်သကိး ပသးအဂီၢ်န့ၣ်လီၤ.”
စိၢ်တစိၤဖိအတီၢ်ပူၤန့ၣ် ယကဘၣ် စံးဆၢအီၤ ဒ်လဲၣ်န့ၣ် ယတသ့ၣ်ညါဘၣ်. ပကရူၢ်ဖိတဖၣ် ပသ့ၣ်ညါလိာ်သကိးပသး အါနံၣ်အါလါအပူၤ ဘၣ်ဆၣ် ပတဟ့ၣ်ခီဟ့ၣ်နီၤ လီၤလိာ်သးလၢ ပနီၢ်သးအတၢ်ဘၣ်ဒိဆါတဖၣ် ဒီးပတၢ်ဂဲၤလိာ်တဖၣ် ဖျိဖျိဖျါဖျါ နီတဘျီဘၣ်န့ၣ်လီၤ. တၢ်လၢ ပကဘၣ်ပာ်ဖျါထီၣ် ပတၢ်ဂံၢ်စၢ်, ပနီၢ်ခိနီၢ်သးအတၢ်ဂ့ၢ်ကီတဖၣ်န့ၣ် မ့ၢ်တၢ်လီၤပျံၤ, လီၤမဲာ်ဆှးန့ၣ်လီၤ.
ပဝဲခဲလၢာ် ပမ့ၢ်ပှၤတၢ်ဒဲးဘးဖိတဖၣ် ဒီးပဘၣ်ဂုာ်ကျဲးစၢး ဂဲၤလိာ်တၢ်န့ၣ် မ့ၢ်တၢ်မ့ၢ်တၢ်တီ နီၢ်နီၢ်လၢ ပဂီၢ်န့ၣ်လီၤ. တၢ်စံးကတိၤ တၢ်မ့ၢ်တၢ်တီဘၣ်ဃးဒီး ကစၢ်ယွၤ အဘျုးအဖှိၣ် လၢအလီၤကမၢကမၣ် ဒီးတၢ်သန့ၤပသးလၢ ကစၢ်ယ့ၣ်ရှူးခရံာ်န့ၣ် မ့ၢ်ကျိၤကျဲလၢ ဟ့ၣ်သဆၣ်ထီၣ် ပှၤလၢပကနာ်, ပကသန့ၤပသးလၢယွၤဆူညါ ကွ့ၢ်ကွ့ၢ်အဂီၢ်န့ၣ်လီၤ. မ့ၢ်လၢ ကစၢ်ယ့ၣ်ရှူးအဃိန့ၣ်ဒီး အလီၢ်တအိၣ်လၢ ပကပာ်မၤပသး ဒ်လၢပတၢ်အိၣ်မူန့ၣ် ပူၤဖျဲးဒီး တၢ်ကီတၢ်ခဲတဖၣ်န့ၣ်ဘၣ်.
လၢတၢ်န့ၣ်အဃိ ယစံးဆၢ ကဒါက့ၤ ယတံၤသကိးလၢ “ပကမၤသကိးလီၤ”န့ၣ်လီၤ. ဖဲပစးထီၣ်မၤဒီး တၢ်အိၣ်အသးအခီၣ်ထံးန့ၣ် တၢ်တလဲၤအသးဘျ့ဘျ့ဆှီဆှီဘၣ်. ဘၣ်ဆၣ် ပှၤတဂၤစးထီၣ် ပာ်ဖျါ အတၢ်ဂ့ၢ်ကီဒီး တၢ်ဂံၢ်စၢ်ဘါစၢ်တဖၣ်န့ၣ် ဒီးပှၤတဂၤ ဝံၤတဂၤ ပိာ်ထွဲ ပာ်ဖျါထီၣ် အနီၢ်ကစၢ် တၢ်ဂ့ၢ်တၢ်ကျိၤတဖၣ်န့ၣ်လီၤ. ပှၤတနီၤန့ၣ် တစံးကတိၤတၢ် နီတမံၤဘၣ်ဆၣ် ဖျါလၢနၢ်ပၢၢ်စၢၤ ပှၤဂၤအတၢ်ဂ့ၢ်န့ၣ်လီၤ. မတၤတဂၤမး တဘၣ်တၢ်မၢဆူၣ် အဝဲသ့ၣ်လၢ ကပာ်ဖျါထီၣ် အတၢ်ဂ့ၢ်တၢ်ကျိၤတဖၣ်န့ၣ်ဘၣ်. ပမၤကတၢၢ် ပတၢ်ရ့လိာ်သးလၢ ယၤ ၅:၁၆ အတၢ်ပာ်ဖျါခံပတီၢ်တပတီၢ် လၢအမ့ၢ် “ဘါထုကဖၣ်လိာ်သုဂီၢ်သကိးသကိး”အသိးန့ၣ်လီၤ.
ဖဲမုၢ်နံၤအဝဲန့ၣ် ယလဲၤခီဖျိ ကလၢၢ်ဘၣ် တၢ်လၢပှၤစူၢ်က့ၤနာ်က့ၤကစၢ်ယ့ၣ်ရှူးတဖၣ် ရ့လိာ်ဘၣ်ထွဲလိာ်သး အတၢ်ဃံတၢ်လၤန့ၣ်လီၤ. ပတၢ်စူၢ်တၢ်နာ် ကစၢ်ယ့ၣ်ရှူးခရံာ် လၢအမ့ၢ် တၢ်တမံၤဃီအပူၤန့ၣ် ပပာ်ဖျါနီၤဟ့ၣ်သကိး ပတၢ်ဂံၢ်စၢ်, တၢ်လၢအဘၣ်ဒိဘၣ်ထံး ပနီၢ်ခိနီၢ်သးတဖၣ် ဒီးတၢ်သန့ၤပသးလၢ ကစၢ်ယ့ၣ်ရှူးဒီး ပှၤဂုၤပှၤဂၤ ဒ်သိးကမၤစၢၤပှၤလၢ ပတၢ်ဂံၢ်စၢ်ဘါစၢ်ဒီး ပတၢ်ဂဲၤလိာ်တဖၣ် အပူၤ အဂီၢ်န့ၣ်လီၤ.
