ပဖံသးပှၢ်လၢ အလုၢ်ဖိကွၢ်ထွဲဒိၣ်ထီၣ်ပှၤန့ၣ် ကလံၤဘၣ်အီၤ ခဲအံၤခဲအံၤအဃိ ဘၣ်မံလီၤ အိၣ်ဝဲဒၣ်လၢ တၢ်ဆါဟံၣ်ဒီး အခိၣ်နုာ်ဘၣ်ဒိဘၣ်ထံး ထဲလဲၣ်န့ၣ် ကသံၣ်သရၣ်တဖၣ် တသ့ၣ်ညါလီၤတံၢ်ဝဲဘၣ်န့ၣ်လီၤ. ဒ်သိး တၢ်ကဃုသ့ၣ်ညါ အဖံအခိၣ်နုာ် တၢ်အိၣ်အသးအဂီၢ် ပှၤကဘၣ်ခိးကွၢ် ဆူညါတစဲး တုၤအတၢ်အိၣ်ဆူၣ်အိၣ်ချ့ဂ့ၤထီၣ်န့ၣ်လီၤ. အဖံကတိၤတၢ်စှၤထံၣ် ဒီးပနၢ်ပၢၢ်အီၤသ့ဝဲဒၣ် န့ၣ်လီၤ. ဖံသးပှၢ်တဂၤအံၤ အသးအိၣ် ၈၆ နံၣ်ဒီး ကွၢ်ထွဲ ယဖိမုၢ်ဖိတုၤ ၁၂ နံၣ်တဂၤအံၤန့ၣ် ထံၣ်ယၤဒီးသံကွၢ်ယၤ “က့ၤလၤ အိၣ်မုာ်ကစီဒီဧါ”န့ၣ်လီၤ. တၢ်ကတိၤ အဆိကတၢၢ်လၢအစံးဘၣ်ယၤန့ၣ် မ့ၢ်အသံကွၢ် ယဖိမုၣ်ဖိလၢ အအဲၣ်ဒိၣ်ကတၢၢ်တဂၤအဂ့ၢ်န့ၣ်လီၤ.
ကစၢ်ယ့ၣ်ရှူးအနီၢ်ကစၢ်ဒၣ်ဝဲ အဲၣ်ဖိသၣ်တဖၣ်ဒီး အပျဲၢ်တဖၣ်တြီဖိသၣ် ဘၣ်ဆၣ် ဟ့ၣ်ဆိဖိသၣ်တဖၣ် တၢ်ခွဲးတၢ်ယာ်န့ၣ်လီၤ. မိၢ်ပၢ်တနီၤ ဟဲစိာ်အဖိတဖၣ်ဆူ ကစၢ်ယ့ၣ်ရှူးအအိၣ်န့ၣ်လီၤ. လူၤ ၁၈:၁၅ ပာ်ဖျါဝဲ “ပှၤဟဲစိာ်ဖိဒံဖိသၣ်စ့ၢ်ကီး ဆူအအိၣ်, ဒ်သိးအကထိးဘၣ်အီၤလီၤ”. ကစၢ်ယ့ၣ်ရှူး ဆိၣ်ဂ့ၤဖိသၣ်တဖၣ်န့ၣ် ပှၤခဲလၢာ်အသးတခုဝဲဒၣ်ဘၣ်. အပျဲၢ်အဘီၣ်တဖၣ် ဒူဝဲမိၢ်ပၢ်တဖၣ်လၢ အသုတဟဲမၤတံာ်တာ် ကစၢ်ယ့ၣ်ရှူးအဂီၢ်န့ၣ်လီၤ. ဘၣ်ဆၣ် အဆၢဖိ ၁၆ အပူၤ ပကထံၣ်ဘၣ် ကစၢ်ယ့ၣ်ရှူး စံးဝဲ “ဒုးဟဲဖိသၣ်တဖၣ်န့ၣ်ဆူ ယအိၣ် ဒီးတြီအီၤတဂ့ၤ”န့ၣ်လီၤ.
ကစၢ်ယ့ၣ်ရှူး ဟ့ၣ်တၢ်အဒိလၢဖိသၣ် ဒီးဒုးနဲၣ်ပာ်ဖျါဝဲလၢ ပကဘၣ်ဒိးန့ၢ်မူခိၣ် ဒ်ဖိသၣ်တဂၤ လၢတၢ်သန့ၤထီၣ်သး, ဒီးလၢတၢ်စူၢ်တၢ်နာ် ဒီးလၢတၢ်သူၣ်တီသးလိၤအပူၤန့ၣ်လီၤ. ညီနုၢ်ဖိဒံဖိသၣ်တဖၣ်န့ၣ် တအိၣ်ဒီး တၢ်ဂ့ၢ်ခူသူၣ်တဖၣ်ဘၣ်. ဖိသၣ်တဖၣ် ထံၣ်ဝဲဒၣ်ထဲ တၢ်လၢအအိၣ်ဒီး အဝဲသ့ၣ်န့ၣ်လီၤ. ဒ်သိး ပကဒိးန့ၢ်က့ၤ ဖိသၣ်အတၢ်စူၢ်တၢ်နာ်အဂီၢ် ပာ်အိၣ်လၢမူခိၣ်န့ၢ် မၤစၢၤပှၤအဃိ, မ်ပတၢ်စူၢ်တၢ်နာ်ဒီ းပတၢ်သန့ၤသးဒီးအီၤန့ၣ် ကဖျါရှဲဝဲဒ်ဖိသၣ်အသိးန့ၣ်တက့ၢ်.
လၢနတၢ်ရ့လိာ်ဘၣ်ထွဲလိာ်သးဒီး ကစၢ်ယွၤအပူၤ မ့ၢ်နကမၤဒိး ဒ်ဖိသၣ်အတၢ်သူၣ်တီသးလိၤအသိး ကသ့ဝဲဒၣ်ဒ်လဲၣ်. လၢနဟံၣ်ဖိဃီဖိအပူၤ, လၢပပှၤတဝၢအပူၤ နဆိၣ်ဂ့ၤဆိၣ်ဝါဖိဒံဖိသၣ်တဖၣ် ကသ့ဒ်လဲၣ်.
ပၢ်ယွၤဧၢ, ဒ်သိးယကဒိးန့ၢ်ဘၣ်သါ မူခိၣ်ဘီမုၢ်အဂီၢ်, ယကလီၤဂာ် ဒ်ဖိသၣ်အတၢ်သူၣ်တီသးလိၤအပူၤ ကသ့အဂီၢ်န့ၣ် မၤစၢၤလၢ်ဘၣ်ယၤ န့ၣ်တက့ၢ်.
လံာ်တၢ်သးခုကစီၣ်လွံၣ်ဘ့ၣ်န့ၣ် တဘ့ၣ်စုာ်စုာ်အိၣ်ဒီးအတၢ်ဂ့ၢ်မိၢ်ပှၢ်ဒၣ်ဝဲ လၢသးစီဆှံအတၢ်ထိၣ်ဂဲၤထီၣ် ပှၤကွဲးတၢ်ကပာ်ဖျါ ကစၢ်ယ့ၣ်ရှူးအဂ့ၢ်အကျိၤန့ၣ်လီၤ. အဒိ, လံာ်မးသဲအပူၤ ပာ်ဖျါကစၢ်ယ့ၣ်ရှူးအဂ့ၢ် ခီဖျိကစၢ်ယ့ၣ်ရှူး အတၢ်သိၣ်လိ ယဲၢ်ကိၢ်လိၣ် လၢအဒုးနဲၣ်ကပီၤဖျါက့ၤ စီၤမိၤရှ့အလံာ်တၢ်သိၣ်တၢ်သီ ယဲၢ်ဘ့ၣ်
(၁မိၤ-၅မိၤ)န့ၣ်လီၤ. လၢလံာ်မၢ်ကူးအပူၤ အဆိန့ၣ် ကစၢ်ယ့ၣ်ရှူး အကစၢ်ဒၣ်ဝဲအမ့ၢ်မတၤလဲၣ်န့ၣ် လီၣ်ဖျါထီၣ်အသးဝံၤမး, ကတဲာ်ကတီၤအပျဲၢ်အဘီၣ်တဖၣ် လၢအတၢ်ဟဲအဂီၢ်န့ၣ်လီၤ. လံာ်ယိၤဟၣ် ပာ်ဖျါလီၤဆီဝဲ ကစၢ်ယ့ၣ်ရှူးမၤတၢ်လီၤလးတဖၣ် လၢအုၣ်အသး ဘၣ်ဃးဒီး ကစၢ်ယ့ၣ်ရှူးအတၢ်မ့ၢ်တၢ်န့ၣ်လီၤ.
တၢ်ဂ့ၢ်မိၢ်ပှၢ်လၢလံာ်လူၤကၣ်အပူၤန့ၣ် ဘၣ်တဘျီတခီၣ်, ပှၤစံးအီၤ ဒ်အမ့ၢ် “ကစၢ်ယ့ၣ်ရှူးအတၢ်လဲၤဆူဝ့ၢ်ယရူၤရှလ့ၣ်” အဂ့ၢ်န့ၣ်လီၤ. တၢ်ဂ့ၢ်စးထီၣ်ဖဲကစၢ်ယ့ၣ်ရှူး “ပာ်အမဲာ်လၢအကလဲၤဆူ ယရူၤရှလ့ၣ်သပှၢ်ပှၢ်”
(၉း၅၁) ဒီး ကတၢၢ်ဖဲ “အလဲၤနုာ်လီၤဝဲဒ်ပှၤမၤနၢၤတၢ် တဂၤအသိး”
(၁၉း၂၈-၄၈) န့ၣ်လီၤ. လံာ်လူၤကၣ်မ့ၢ် လံာ်လၢအဘၣ်တၢ်ဃိထံသ့ၣ်ညါ လီၤတံၢ်လီၤဆဲး
(၁း၁-၄) ဒီး ဘၣ်တၢ်ကတဲာ် ကတီၤန့ၢ်အီၤ ဒ်သိးပှၤဖးတၢ်ဖိတဖၣ် ကသ့ၣ်ညါဘၣ်တၢ်မၤအသးတဖၣ်လၢ ဝ့ၢ်ယရူၤရှလ့ၣ်- ကစၢ်ယံၣ်ရှူး အတၢ်သံ, ဘၣ်တၢ်ပာ်လီၤအီၤလၢတၢ်သွၣ်ခိၣ်, ဒီးအတၢ်ဂဲၤဆၢထၢၣ်သမူထီၣ်က့ၤအဂ့ၢ်တဖၣ် န့ၣ်လီၤ. တၢ်အံၤမ့ၢ်တၢ်လီၤကမၢကမၣ်, မ့ၢ်လၢသးစီဆှံစူးကါ ပှၤလၢအတဒ်သိးလိာ်သးတဖၣ် လၢတၢ်တိာ်ကူၣ်ကျဲၤ, ကျိၤကျဲလီၤဆီ ဒ်သိးကစံၣ်တဲာ်တဲလီၤ တၢ်တဲပူအဒိၣ် ကတၢၢ်တယုၢ် လၢအဘၣ်တၢ်တဲအီၤန့ၣ်လီၤ.
Bill Crowder
