အိၣ်ဘှံးနံၤဂီၢ်တၢ်ဘါဝံၤဒီး, ဝ့ၢ်မီးစကိၣ်(Moscow)တၢ်အိၣ်ဖှိၣ်လၢ အတူၢ်လိာ်ယၤန့ၣ် ပကဟံးန့ၢ်သကိး မုၢ်ထူၣ်တၢ်အီၣ်အဂီၢ် လဲၤကိးယၤဆူ တၢ်အီၣ်ကျး လၢ ခရ့ၣ်မလ့ၣ် (Kremlin) တိာ်တၢ်သူၣ်ထီၣ်အချၢန့ၣ်လီၤ. ပလဲၤတုၤန့ၣ်ဒီး ပပာ်သူၣ်ပာ်သးလၢ နီၢ်ဒီမိၤဝၤ ဒိးတ့ဒိးဖျီအသးဝံၤသီသီဖိတဖၣ် လၢတၢ်ဖျီအကူအသိးန့ၣ် လဲၤဝဲဆူ တၢ်သွၣ်ခိၣ်လၢ ပှၤပာ်လီၤပှၤသုးဖိတဖၣ် လၢပှၤတသ့ၣ်ညါတဖၣ် ဖဲလၢ ခရ့ၣ်မလ့ၣ် တိာ်အဒူၣ်အချၢန့ၣ်လီၤ. အဝဲသ့ၣ် ကဒိးန့ၢ်ဝဲ တၢ်တ့တၢ်ဖျီ မုၢ်နံၤသးဖှံ ဒ်သိးအံၤအဂီၢ်န့ၣ် ပှၤဘၣ်ဟ့ၣ်လီၤသးသမူတဖၣ်အဂီၢ် တၢ်မၤတၢ်ရဲၣ်တၢ်ကျဲၤဖိအံၤစ့ၢ်ကီး ပှၤဒိးတ့ဒိးဖျီအသးတဖၣ် ထၢနုာ်ဃုာ်ဝဲဒၣ်န့ၣ်လီၤ. တၢ်မၤအသးတဖၣ်အံၤ ဖျါသညူးသပှၢ် ဖဲနီၢ်ဒီမိၤဝၤတဖၣ် ဒိတၢ်ဂီၤလၢ တၢ်သ့ၣ်နီၣ်လၢၢ်ထူၣ် ကပၤတချုးလၢ အပာ်လီၤ တၢ်ဖျီအဖီတဖၣ် လၢလၢၢ်ထူၣ်အခီၣ်ထံးန့ၣ်လီၤ.

ပဝဲကိးဂၤအလီၢ်အိၣ်လၢ ပကဘၣ်စံးဘျုးပှၤလၢ ဟ့ၣ်လီၤအသးသမူတဖၣ် ဒ်သိးပကဒိးန့ၢ်ဘၣ် တၢ်အိၣ်မူအလၢအပှဲၤ လၢတုၤထီၣ်, ထီၣ်ဘးအပတီၢ်တပတီၢ်အဂီၢ်န့ၣ်လီၤ. တၢ်ဟ့ၣ်လီၤသးတဖၣ်အံၤ မ့ၢ်တၢ်အကါဒိၣ်ခဲလၢာ် ဘၣ်ဆၣ် တမ့ၢ်တၢ်ဟ့ၣ်လီၤသးလၢအကါဒိၣ်ကတၢၢ်ဘၣ်. ပမ့ၢ်ထံၣ်ဘၣ် ကစၢ်ယ့ၣ်ရှူးဟ့ၣ်လီၤအသးလၢ သ့ၣ်ဖျၢၣ်ထူၣ်စုညါလိၤန့ၣ်ဒီး လၢတၢ်အုၣ်က့ၤခီၣ်က့ၤကစၢ်, ကစၢ်ယ့ၣ်ရှူးအလိၤ ပတၢ်အိၣ်မူတဖၣ် ပဒ့ၣ်ကမၣ် အိၣ်ဝဲထဲလဲၣ်ထဲလဲၣ်န့ၣ် ပသ့ၣ်ညါနၢ်ပၢၢ်ဝဲန့ၣ်လီၤ.

ဖဲပဟဲဆူ ကစၢ်အစီၢ်နီၤခိၣ် ဒ်သိးပကဟံးန့ၢ်ဘူၣ်စီဆှံန့ၣ် ဒုးသ့ၣ်နီၣ်ထီၣ်က့ၤ ပှၤလၢ ကစၢ်ယ့ၣ်ရှူးအတၢ်ဟ့ၣ်လီၤသးန့ၣ် ဘၣ်တၢ်ပာ်ဖျါအီၤလၢ ကိၣ်ဒီးစပံးထံအလီခီန့ၣ်လီၤ. ၁ ကရံၣ် ၁၁:၂၆ အပူၤ စီၤပီလူးကွဲးဝဲ “ဖဲသုအီၣ်ကိၣ်အံၤ, ဒီးအီလီခီအံၤ တစုစုန့ၣ် သုးဒုးနဲၣ်ဖျါထီၣ် ကစၢ်အဒိးသံအသးတုၤအဟဲန့ၣ်လီၤ”. မ်ပတၢ်ဆၢကတီၢ်လၢ ကစၢ်အစီၢ်နီၤခိၣ်န့ၣ် ကဒုးသ့ၣ်နီၣ်က့ၤပှၤ တၢ်လၢကိးမုၢ်နံၤ ပကအိၣ်မူအိၣ်ဂဲၤလၢ တၢ်သ့ၣ်နီၣ်ဒီး တၢ်စံးဘျုးစံးဖှိၣ် ကစၢ်ယ့ၣ်ရှူး အတၢ်မၤခဲလၢာ် လၢပသးပူၤဒီး လၢပဂီၢ်န့ၣ်တက့ၢ်.