ဖဲလၢပဟံၣ်ဖိဃီဖိသ့ၣ်တဖၣ် ပဘၣ်အိၣ်ဒၣ်လၢ ဟံၣ်ညါပူၤ မ့ၢ်လၢဟီၣ်ခိၣ်ဒီဘ့ၣ် တၢ်ဆူးတၢ်ဆါ ဘၣ်ကူဘၣ်ဂာ် (တၢ်ဆါသံသတြိာ်) အဆၢကတီၢ်အခါန့ၣ်, ပဘၣ်မၤတ့ၢ်တၢ်မၤတခါလၢ အလၢာ်ဂံၢ်လၢာ်ဘါ လၢာ်ဆၢလၢာ်ကတီၢ်ဒီး ဘၣ်ကူၣ်ထီၣ်ဖးလီၤအါမး, လၢအမ့ၢ် တၢ်ပာ်ဖှိၣ်က့ၤ တၢ်ဂီၤက့ခီ (၁၈,ဝဝဝ) ဒ်သိးကကဲထီၣ် တၢ်ဂီၤအလၢအၦဲၤတခါန့ၣ်လီၤ. ပမၤသကိးတၢ်ဒီတနံၤညါဘၣ်ဆၣ်, တဘျီဘျီ ပကလၢၢ်ဘၣ်လၢ တၢ်မၤတကဲထီၣ်လိၣ်ထီၣ်ကဲၣ်ဆိးဘၣ်န့ၣ်လီၤ. ပစးထီၣ်မၤတၢ် ၅ လါဝံၤမး ပထီထီၣ်ဘၣ် တၢ်ဂီၤက့ လၢခံကတၢၢ်တခီဆူ တၢ်ဂီၤက့ခီဘျးစဲ လၢအထီ ခွံခီၣ်ယီၢ်, ဒီးအဒီၣ်ဃီၤ ဃုခီၣ်ယီၢ် လၢအမၤၦဲၤပတၢ်အီၣ်မ့ၤဒၢး အဒါန့ၣ်လီၤ.

တဘျီတခီၣ် ပတၢ်အိၣ်မူလီၤဂာ်ဒီး တၢ်လိာ်ကွဲသုးကျဲၤမၤၦဲၤက့ၤ တၢ်ဂီၤက့ခီသ့ၣ်တဖၣ်န့ၣ်လီၤ. တၢ်အက့အခီတနီၤ အလီၢ်အကျဲဘၣ်လံ, ဘၣ်ဆၣ် အက့အခီအိၣ်တ့ၢ်ဒံးအါမး လၢအရၤလီၤအသး လၢသ့ၣ်ဘၣ်ဒါအဖီခိၣ်န့ၣ်လီၤ. ဖဲယသ့ၣ်ညါလၢ ကစၢ်ယွၤမၤတၢ် ဒီးဆီတလဲယၤ ဒ်သိးယကလီၤဂာ်အါထီၣ်အါထီၣ် ဒီးခရံာ်အခါ, တဘျီတခီၣ် ကီခဲဝဲလၢ ပကထံၣ်ဘၣ်တၢ်လဲၤထီၣ်လဲၤထီန့ၣ်လီၤ.

စီၤပီလူးအလံာ်ပရၢဆူ ၦၤဖံလံးပံၤဖိတဖၣ် မၤမုာ်ယသးဒိၣ်မး, ဖဲအဝဲစံးဝဲလၢ အဝဲဃ့ထုကဖၣ်ဒီးတၢ်သးခု လၢအဝဲသ့ၣ်အဂီၢ်, မ့ၢ်လၢတၢ်မၤဂ့ၤသ့ၣ်တဖၣ် လၢအဝဲသ့ၣ်မၤဝဲန့ၣ်လီၤ(ဖံ ၁:၃-၄). ဘၣ်ဆၣ်, စီၤပီလူးအတၢ်နာ်န့ၢ်လီၤသးအံၤ တမ့ၢ်လၢ ၦၤဖံလံးပံၤဖိသ့ၣ်တဖၣ် အတၢ်သ့တၢ်ဘၣ်အဃိဘၣ်, မ့မ့ၢ်တခီ လၢယွၤအဃိ, “ယနာ်တၢ်အံၤဒၣ်လဲာ် လၢၦၤလၢအမၤထီၣ်သီတၢ်မၤအဂ့ၤတမံၤ လၢသုပူၤတဂၤ, ကမၤလၢထီၣ်ၦဲၤထီၣ်ဝဲ တုၤလီၤလၢ ယ့ၣ်ၡူးခရံာ်မုၢ်နံၤန့ၣ်လီၤ” (:၆).

ကစၢ်ယွၤအၢၣ်လီၤဝဲလၢ ကမၤဝံၤအတၢ်မၤလၢပပူၤန့ၣ်လီၤ. ဒ်တၢ်လိာ်ကွဲပာ်ဖှိၣ်က့ၤ တၢ်ဂီၤက့ခီသ့ၣ်တဖၣ်အသိးန့ၣ် အဆၢကတီၢ်အိၣ်ဝဲလၢ ပကဘၣ်ပာ်သူၣ်ပာ်သးတဖၣ်အိၣ်ဒံးဝဲ, ဒီးဆၢကတီၢ်ကအိၣ်ဝဲတဘျီဘျီလၢ ပဆိကမိၣ်တၢ်လဲၤထီၣ်လဲၤထီ, တၢ်ကဲထီၣ်လိၣ်ထီၣ် တအိၣ်အါအါဘၣ်န့ၣ်လီၤ. ဘၣ်ဆၣ်, ပအိၣ်ဒီး တၢ်သူၣ်ဂၢၢ်သးကျၢၤသ့ဝဲ ခီဖျိယွၤလၢအကလုၢ်တီန့ၣ် ကပာ်ဖှိၣ်ဒံးတၢ်ဂီၤ အက့အခီသ့ၣ်တဖၣ် လၢအလီၢ်အကျဲဒၣ်ဝဲအဃိန့ၣ်လီၤ.