မုၢ်ဂၢ်မါကရဲး(Margaret)န့ၣ် မ့ၢ်ပှၤလၢအသူတၢ် ထံထံဆးဆးဒီး ဂ့ၤဂ့ၤဘၣ်ဘၣ်န့ၣ်လီၤ. ဖဲအဝဲလဲၤပူၤကွံာ် ဟီၣ်ခိၣ်ဝံၤ အဖိဒိၣ်မုၣ်န့ၣ် လၢတၢ်သ့ၣ်နီၣ်အီၤဒီး လၢတၢ်သးအုးအပူၤ ဘၣ်ရဲၣ်ကျဲၤ အမုၢ်ဂၢ်အတၢ်ဖိတၢ်လံၤတဖၣ်န့ၣ်လီၤ. လၢဆွဲအၣ်အတလါပူၤ ပလးစတ့းထၢၣ်ဖိတဖၣ် ဘၣ်တၢ်ရဲၣ်လီၤလၢ အကျိၤဂ့ၤဂ့ၤဘၣ်ဘၣ်ဒီး အပူၤန့ၣ် ပျံၤအဖုၣ်ဖိတဖၣ်အိၣ်ဝဲဒၣ်န့ၣ်လီၤ. ထၢၣ်အလိၤဘၣ်တၢ်ကွဲးအီၤလၢ” ပျံၤဖုၣ်တလၢကဲၣ်ဆိးလၢ တၢ်ကဘၣ်စူးကါအီၤ”န့ၣ်လီၤ.
တၢ်မနုၤတမံၤ ကသဆၣ်ထီၣ်ပှၤတဂၤလၢ ကပာ်ဃာ်ဒီးရဲၣ်ကျဲၤလၢအလီၢ်ဒၣ်ဝဲ ဒ်တၢ်ဖိတၢ်လံၤတဖၣ်လၢပှၤဆိးကါတသ့လၢၤဘၣ်န့ၣ်လဲၣ်. ဘၣ်သ့ၣ်သ့ၣ် ကမ့ၢ်ပှၤဒ်သိးအသ့ၣ်ညါတ့ၢ်လံလၢ တၢ်ဖှီၣ်တၢ်ယာ်နးနးဒိၣ်ဒိၣ်တဖၣ်န့ၣ်လီၤ.
ဖဲပှၤအံၣ်စရ့လးဖိတဖၣ် ဟးထီၣ်ပူၤဖျဲးလၢအဲၤကူပတူး တၢ်မၢကဲကုၢ်ဒီးတၢ်အိၣ်မူလၢအနးဒီး အကီခဲန့ၣ် အိၣ်တ့ၢ်လၢတၢ်လီၢ်ခံန့ၣ်လီၤ. တယံာ်ဘၣ်သးပ့ၣ်နီၣ်ကွံာ် ကစၢ်ယွၤအတၢ်မၤလီၤလးတဖၣ် ဘၣ်ထွဲဒီးအဝဲသ့ၣ်အတၢ်ဘၣ်ဟးထီၣ်လၢ တၢ်မၢကဲကုၢ်အလီၢ်ဒီး စးထီၣ်ကဒူးကဒ့ၣ်တၢ်လၢ တၢ်အီၣ်တၢ်အီတလၢတပှဲၤအဃိန့ၣ်လီၤ.
ကစၢ်ယွၤအဲၣ်ဒိးလၢ ပှၤဂီၢ်မုၢ်တဖၣ်ကနာ်အီၤန့ၣ်လီၤ. လၢပှၢ်မုၢ်ကနၢန့ၣ် ပှၤဂီၢ်မုၢ်တဖၣ် ကအိၣ်ဘၣ်တၢ်အဂီၢ် ကစၢ်ယွၤကတဲာ်ကတီၤန့ၢ် ကိၣ်မၤနၤဒီး၂မိၤ၁၆:၄ အပူၤကစၢ်ယွၤစံးဘၣ်စီၤမိၤရှ့ “ကွၢ်ကွၢ် ယကဒုးဟဲစူၤကိၣ်လၢမူခိၣ်လၢသုဂီၢ်, ဒီးပှၤဂီၢ်မုၢ်ကလဲၤထၢထီၣ် တနံၤအတၢ်အီၣ်လၢအဂီၢ်ဒၣ်ဝဲ, တနံၤလၢအဂီၢ်ဒၣ်ဝဲ” န့ၣ်လီၤ. အဆၢဖိ ၅ ဒီး ၂၅ အပူၤစ့ၢ်ကီး စံးဝဲ “ဒီးဃုနံၤတနံၤန့ၣ် တၢ်ကမၤအသးလၢ အဝဲသ့ၣ်တဖၣ် ဘၣ်ကတဲာ်ကတီၤတၢ်လၢ အဟဲက့ၤစိာ်ဝဲ, ဒီးကအိၣ်အါန့ၢ် အထၢထီၣ် တနံၤတနံၤန့ၣ် ခံစးလီၤ. မ့မ့ၢ်မုၢ်နွံနံၤတနံၤန့ၣ်, တၢ်အိၣ်ဘှံးအနံၤ,… သုတထံၣ်ဘၣ်တၢ်လၢ ပျီပူၤဘၣ်”န့ၣ်လီၤ. အဆၢဖိ၂၇ဒီး၂၈ ပာ်ဖျါဝဲအသိး ကစၢ်ယွၤ သ့ၣ်ညါတ့ၢ်လံ လၢပှၤဂီၢ်မုၢ်တဖၣ် တဒိကနၣ်တၢ်န့ၣ်လီၤ.
အကတီၢ်လၢအီၣ်ကုၤအီပှဲၤဒီး အကတီၢ်လၢတၢ်ဘၣ်ကိၢ်ဘၣ်ဂီၤ အဆၢကတီၢ်န့ၣ် တၢ်လ့ပစီအိၣ်ထီၣ်သ့ဝဲဒၣ်လၢ ပကဟံးဃာ်ဖီၣ်ဃာ်တၢ်တမံၤမံၤ ဒ်သိးပကမၤဂၢၢ်ပၢဆှၢတၢ် ကန့ၢ်အဂီၢ်န့ၣ်လီၤ. တလိၣ်လၢ ပကဟံးဃာ်ပာ်ဖှိၣ် ကယဲၢ်တၢ်ခဲလၢာ်လၢ ပစုပူၤန့ၣ်ဘၣ်. ပျံၤအက့အခီဒီး ကယဲၢ်တၢ်တမံၤမံၤမ့ၢ်ဂ့ၤ တလိၣ်လၢပကဘၣ်ထၢဃာ် ပာ်ဖှိၣ်အီၤဘၣ်. ပတၢ်စူၢ်တၢ်နာ်န့ၣ် မ့ၢ်ဒၣ်ကစၢ်ယွၤဒီး အၢၣ်လီၤပှၤလၢ ဧ့ၤဘြံၤ ၁၃:၅ အပူၤ “ယတလဲၤသဒၣ်နၤဘၣ်ဒီး ယတညိကွံာ်နၤဘၣ်”န့ၣ်လီၤ.
