လၢတၢ်ကွဲးလံာ်ကွဲးလဲၢ် တၢ်ကူၣ်သကိးဖးသကိး တၢ်အိၣ်ဖှိၣ်တခါန့ၣ် ယမၤသကိးတၢ်ဒ်ပှၤတီခိၣ်ရိၣ်မဲတၢ်တဂၤန့ၣ်လီၤ. ဖဲန့ၣ် ထဲမံၣ်(Tamy) ဟ့ၣ်ယၤ ခးဖိတဘ့ၣ် လၢအအိၣ်ဒီး တၢ်ကွဲးဖိလၢ အဘၣ်ထွဲဒီး တၢ်ထုကဖၣ်တဖၣ် လၢအချၢန့ၣ်လီၤ. ဖဲအဝဲဟ့ၣ်နီၤလီၤ ခးဖိတဖၣ် ဆူယအိၣ်န့ၣ် အဝဲတဲဖျါထီၣ်ယၤလၢ အဝဲဖးပှၤတီခိၣ်ရိၣ်မဲတၢ်တဖၣ် အဂ့ၢ်အကျိၤဝံၤ ကွဲးလီၤတၢ်ထုကဖၣ်အဂ့ၢ် လၢခးဖိတဘ့ၣ်စုာ်စုာ်အချၢဒီး, ဃ့ထုကဖၣ် တၢ်လၢပဂီၢ်န့ၣ်လီၤ. ထဲမံၣ် ဆှၢကဒီး တၢ်ထုကဖၣ်အဂ့ၢ် လီၤတံၢ်လီၤဆဲး ခီဖျိ လီလံာ်ပရၢ ဆူယအိၣ်ဒီး ဖဲန့ၣ် ယကမၢကမၣ်ဘၣ်မးယသးလီၤ. ယစံးဘျုးယွၤလၢ အဟ့ၣ်ဂံၢ်ဟ့ၣ်ဘါယၤ ခီဖျိ ထဲမံၣ်အတၢ်ဆိကမိၣ် လၢအဟဲအိၣ်ထီၣ်အံၤန့ၣ်လီၤ. ဝံၤ ဘါထုကဖၣ် ကဒါက့ၤလၢ အဝဲအဂီၢ်လီၤ. ဖဲယဘၣ်ကွၢ်ဆၢၣ်မဲာ် ဒီးတၢ်ခိၣ်ဆါဒီးလီၤဘှံးလီၤတီၤ ဖဲတၢ်ကူၣ်သကိးဖးသကိးတၢ်ကတီၢ်, ယထုးထီၣ် ခးဖိအံၤ န့ၣ်လီၤ. ကစၢ်ယွၤ မၤဖှံထီၣ် ယသူၣ်ယသး ဖဲ ယဖးကဒီးက့ၤ ထဲမံၣ်အတၢ်ထုကဖၣ်လၢ ယဂီၢ်န့ၣ်လီၤ.

ပှၤတၢ်မၢဖိစီၤပီလူး သ့ၣ်ညါနီၣ် သးသမူအိၣ်ဒီး အလုၢ်အပှ့ၤ ဖဲ တၢ်ထုကဖၣ်တၢ်, လၢပှၤဂုၤပှၤဂၤအဂီၢ်န့ၣ်လီၤ. အဝဲသဆၣ်ထီၣ် ပှၤစူၢ်က့ၤနာ်က့ၤတၢ်တဖၣ် ဒ်သိးကကတဲာ်ကတီၤသးလၢ တၢ်ဒုးတၢ်ဒီး “အအံၤတဃၣ် အတၢ်ခံးအကစၢ်, တၢ်နါအိၣ်လၢမူခိၣ်အလီၢ်တဖၣ်” အဂီၢ်န့ၣ်လီၤ (အ့း ၆:၁၂). အဝဲဟ့ၣ်ဂံၢ်ဟ့ၣ်ဘါ စ့ၢ်ကီးလၢ ကလဲၤကဒီးတၢ်ဆူညါ လၢတၢ်ထုကဖၣ် ဃုာ်ဒီး တၢ်ထုကဖၣ်တၢ်လၢ တၢ်တ့ၢ်လီၤတံၢ်လီၤဆဲး, ဖဲတၢ်ဟ့ၣ်တၢ် အတယၢာ်ဆူ တၢ်လိၣ်လၢ တၢ်ကသကွံာ်ကညး တၢ်လၢ ပှၤတဂၤဘၣ်တဂၤအဂီၢ် လၢပကိးအီၤလၢ တၢ်ထုကဖၣ်သကွံာ်ကညးတၢ်န့ၣ်လီၤ. စီၤပီလူး ဃ့ကညးစ့ၢ်ကီး တၢ်လၢ, တၢ်ကဃ့ထုကဖၣ် လၢအဝဲကအိၣ်ဒီး တၢ်သးဒူအဂီၢ်လီၤ. အဆၢဖိ ၁၉-၂၀ ပာ်ဖျါဝဲ “ဒီးယဂီၢ်, ဒ်သိးတၢ်ကဟ့ၣ် ယအဲးထီၣ် ယထးခိၣ် အိၣ်ဒီး ယသးခူတလ့ၢ်, ဒ်သိးယကမၤဖျါထီၣ် တၢ်သးခုကစီၣ်အတၢ်ခူသူၣ်, လၢယမ့ၢ်အကလူးတဂၤ လၢအဘၣ်တၢ်စၢဃာ်…”န့ၣ်လီၤ. ဖဲပဃ့ထုကဖၣ်န့ၢ်လိာ်ပသး, သးမုာ်စီဆှံ ကမၤမုာ်ထီၣ်ပှၤဒီး ကဟ့ၣ်ဂံၢ်ဟ့ၣ်ဘါစ့ၢ်ကီး ပှၤဆူ ပကသ့ဆၢတဲာ်တၢ်တမံၤမံၤလၢ ပကဘၣ်မၤန့ၣ်လီၤ. အဝဲမၤဂၢၢ်မၤကျၢၤဝဲလၢ, ပလိၣ်ဘၣ်ကစၢ်ယွၤ ဒီးပဝဲ ကဒဲကဒဲစ့ၢ်ကီး ပလိၣ်ဘၣ်လိာ်ပသး, မၤလီၤတံၢ်ပှၤလၢ ပထုကဖၣ်ဘှ့ၣ်ဘှ့ၣ်ဘှီၣ်ဘှီၣ်မ့ၢ်ဂ့ၤ ကွဲးလီၤလၢ တၢ်ထုကဖၣ်အခးဖိအလိၤမ့ၢ်ဂ့ၤ ကစၢ်ယွၤနၢ်ဟူ, ပတၢ်ထုကဖၣ်ကိးထံၣ် ဒီးအဝဲစံးဆၢက့ၤ ပတၢ်ထုကဖၣ် ဒ်အတၢ်တိာ်အလၢအပှဲၤအသိးန့ၣ်လီၤ.