တၢ်ဆၢကတီၢ်လၢ တယံာ်ဒံးဘၣ်န့ၣ်, ဖဲပှၤသမှံၤတဖၣ် တချုးဟဲဆူ ပဟံၣ် ယမါဒီးယၤ ပမၤကဆှဲကဆှီ ပဟံၣ်န့ၣ်လီၤ. ယပၢ်သူၣ်ပာ်သးဘၣ်လၢ တၢ်ဖီအီၣ် တၢ်လီၢ်လၢ်ဘ့ၣ် ဘၣ်အဒါလိၤ, တၢ်ဘၣ်အၢအဖီးသူသူဖိ လၢယကဘၣ်ချံးလီၤ ယခီၣ်ဒီးထူးစီကွးစီအီၤန့ၣ်လီၤ. ဖဲယထူးစီ, ကွးစီကွံာ် တၢ်ဘၣ်အၢအံၤန့ၣ် တယံာ်ဘၣ်အတီၢ်ပူၤ ယသ့ၣ်ညါဘၣ်လၢ ယထူးစီၤ, ကွးစီတၢ် ဒ်ယံာ်ထီၣ်တၢ်ဘၣ်အၢအဖီးသူဖိ ဖျါဒ်အါထီၣ် ဝဲဒၣ်န့ၣ်လီၤ. ယထူးစီ, ကွးစီ တၢ်အဖီးသူသူတခါစုာ်စုာ်ဝံၤ တၢ်ဘၣ်အၢအဂၤ အိၣ်ဟဲဖျါထီၣ်ဖျိဖျိဖျါဖျါန့ၣ်လီၤ. ဖျါလၢပဖၣ်ကပူၤ, လၢၢ်ဘ့ၣ်ဘၣ်အဒါ တၢ်ကမၤဆှီအီၤ တသ့လၢၤဘၣ်န့ၣ်လီၤ. လၢတၢ်န့ၣ်အဃိဒီး ယတၢ်ဂုာ်ကျဲးစၢး ထူးစီ, ကွးစီကွံာ်တၢ်ဘၣ်အၢတ ဒ်လဲၣ်ဂ့ၤဒ်လဲၣ်ဂ့ၤ ယသ့ၣ်ညါနၢ်ပၢၢ်ထီၣ်လၢ ယကမၤကဆှီကွံာ်လၢာ်လၢာ်ဆ့ဆ့ တသ့ဝဲဒၣ်ဘၣ်န့ၣ်လီၤ.

တၢ်လၢအဒ်သိးလိာ်သးဒီး တၢ်မၤကဆှီလီၤက့ၤပသးအဂ့ၢ်တနီၤန့ၣ် လံာ်စီဆှံ ပာ်ဖျါဝဲ ဒၣ်န့ၣ်လီၤ. လၢပတၢ်ဒဲးဘးအဂီၢ် ပဂုာ်ကျဲးစၢး မၤကဆှီထီၣ် ပသးအဂ့ၤကတၢၢ် ဘၣ်ဆၣ်, ထီဘိန့ၣ် ပတၢ်လီၤတုာ်လီၤကာ် အိၣ်ဝဲဒၣ်န့ၣ်လီၤ. ယရှါ ၆၄:၅ အပူၤ ပာ်ဖျါလၢ ယွၤအပှၤဂီၢ်မုၢ် ပှၤအံၣ်စရ့လးဖိတဖၣ် အသူၣ်ဟးဂီၤသးဟးဂီၤ, ခီဖျိလၢ ယွၤအသးကဲၤထီၣ်လၢ အဝဲသ့ၣ် အတၢ်ဒဲးဘးအဃိ ဘၣ်ယိၣ်ဝဲဒၣ် လၢတဒိးန့ၢ်ဘၣ် တၢ်အုၣ်က့ၤခီၣ်က့ၤန့ၣ်လီၤ. အဆၢဖိ ၆ အပူၤ ဝံယရှါယၤ ပာ်ဖျါဝဲလၢ “ပဝဲဒၣ်ခဲလၢာ်အံၤ ပမၤပသး ဒ်တၢ်တကဆှီဘၣ်အသိးန့ၣ်လီၤ. ဒီးပတၢ်တီတၢ်လိၤခဲလၢာ်န့ၣ် မၤအသးဒ်တၢ်အကူအသိး, ဘၣ်အၢအသိးန့ၣ်လီၤ”.

ဘၣ်ဆၣ် ယရှါယၤသ့ၣ်ညါပာ်ဝဲခီဖျိ ယွၤအတၢ်ဂ့ၤတၢ်ဝါအဃိ တၢ်မုၢ်လၢ်အိၣ်ထီၣ် ဝဲဒၣ် ထီဘိန့ၣ်လီၤ. လၢတၢ်န့ၣ်အဃိ အဆၢဖိ ၈ အပူၤ အဝဲဃ့ထုကဖၣ် “ယွၤဧၢ နမ့ၢ်ပပၢ်လီၤ. ပဝဲဒၣ်အံၤ ပမ့ၢ်ကပံာ် ဟီၣ်ခိၣ်, ဒီးနဲဒၣ်နမ့ၢ် ပှၤတ့သပၢၤလီၤ” န့ၣ်လီၤ. ယရှါယၤ သ့ၣ်ညါဝဲဒၣ် ပနီၢ်ကစၢ်တၢ်လၢ ပမၤကဆှီထီၣ် ပသးတသ့တန့ၢ်တဖၣ်န့ၣ် ထဲယွၤ တဂၤဧိၤ မၤဂ့ၤမၤကဆှီထီၣ်သ့ဝဲဒၣ်လီၤန့ၣ် ယရှါ ၁:၁၈ စံးဘၣ်ပှၤလၢ “ကဝါထီၣ်ဝဲ ဒ်မူခိၣ်ဖီအသိး”န့ၣ်လီၤ.

တၢ်ဒဲးဘးလၢ ပသးကံၢ်ပူၤ အတၢ်ဘၣ်အၢဘၣ်သီ ဒ်သိးကကဆှီထီၣ်အဂီၢ် ပထူးစီ, ကွးစီကွံာ် တန့ၢ် တသ့ဘၣ်. အလီၢ်အိၣ်လၢ ပကဘၣ်စံးဘျုးစံးထီၣ်ပတြၢၤယွၤ, မ့ၢ်လၢ ပဒိးန့ၢ် တၢ်အုၣ်က့ၤခီၣ်က့ၤ သ့ဝဲဒၣ် ခီဖျိပှၤလၢ အလုၢ်ထီၣ်အသးသမူ, ဒ်သိးပကဘၣ် တၢ်မၤကဆှီထီၣ်က့ၤ ပှၤလၢာ်လၢာ်ဆ့ဆ့အဂီၢ်န့ၣ် ယွၤကလုၢ်ကထါ ဖျါဝဲဒၣ် ဖဲ ၁ ယိၤ ၁:၇ န့ၣ်လီၤ.