တၢ်ကပီၤလၢအဆဲးကပီၤထီၣ်တၢ်အံၤ တကပီၤအါအါဆူၣ်ဆူၣ် ဒ်တၢ်ကပီၤအဂံၢ်ထံး နီတစုဘၣ်. တၢ်အံၤ မ့ၢ်တၢ်သိၣ်တၢ်ဘျၢ လၢအကါဒိၣ်တမံၤ လၢပှၤတ့တၢ်ဖိအဂီၢ် န့ၣ်လီၤ. ဒ်သိး တၢ်ကပာ်ဖျါတၢ်ဃံတၢ်လၤလၢအဆဲးကပီၤထီၣ် လၢတၢ်ဂီၤ လၢအတ့ဝဲအပူၤ ပှၤတ့တၢ်ဂီၤ အၣ်မဲခဲးဘရံၣ်ရၣ် (Armand Cabrera) လူးပိာ်ထွဲတၢ်ဘျၢအံၤန့ၣ်လီၤ. အဝဲပာ်သူၣ်ပာ်သး ထံၣ်ဘၣ်ဝဲလၢ ပှၤတ့တၢ်သီသံၣ်ဘှဲဖိတဖၣ် တ့တၢ်ဆဲးကပီၤ အလွဲၢ်ဆူၣ်ဆူၣ် ဒ်သိးကဖျါဂ့ၤဒိၣ်အဂီၢ်န့ၣ်လီၤ. အဝဲစံးလၢ “တၢ်လၢတၢ်ဆဲးကပီၤန့ၣ် ဘၣ်ထွဲဒီး တၢ်အကဒုလီၤ. အဃိ ဖဲပတ့ တၢ်ဆဲးကပီၤန့ၣ် ပတဘၣ်ဂုာ်ကျဲးစၢး တ့ကပီၤထီၣ် တၢ်ဘၣ်. မ့မ့ၢ် ပကဘၣ် ဆီၣ်ထွဲ တၢ်ကဒုတခီန့ၣ်လီၤ”.

ပနၢ်ဟူဘၣ်တၢ်လၢ အလီၤဂာ်ဒီး တၢ်ဂ့ၢ်အံၤ လၢလံာ်စီဆှံအပူၤ, လၢအဘၣ်ထွဲ ဒီးကစၢ်ယ့ၣ်ရှူး ဒ် “ပှၤကညီအတၢ်ကပီၤ”အသိးန့ၣ်လီၤ (ယိၤ ၁:၄). ဘျၢတၢ်စီၤယိၤဟၣ် မ့ၢ်ပှၤလၢ အကပီၤထီၣ် “ဒ်သိးပှၤခဲလၢာ် ကစူၢ်က့ၤနာ်က့ၤ တၢ်လၢ (ကစၢ်ယ့ၣ်ရှူး) ဒီး အဝဲဟဲလၢ တၢ်အုၣ်သးအဂီၢ်” (:၇)န့ၣ်လီၤ. ပှၤကွဲးလံာ်တၢ်သးခုကစီၣ် စံးဘၣ်ပှၤလၢ “(ဘျၢတၢ်စီၤယိၤဟၣ်)န့ၣ်, တမ့ၢ်ဘၣ်တၢ်ကပီၤန့ၣ်ဘၣ်. မ့ၢ်အဟဲဝဲဒ်သိး အကအုၣ်အသးလၢတၢ်ကပီၤန့ၣ်အဂ့ၢ်လီၤ” (:၈).

ဒ်စီၤယိၤဟၣ်အသိး, ပဘၣ်တၢ်ဃုထၢထီၣ် ပှၤလၢကစၢ်ယွၤ ဒ်သိးပကလီၣ်ဖျါထီၣ် ကစၢ်ခရံာ်အတၢ်ကပီၤ, ဆူပှၤလၢအအိၣ်လၢတၢ်ခံးကျါလၢအမ့ၢ် ဟီၣ်ခိၣ်လၢတစူၢ်တနာ်တၢ်တဘ့ၣ်အံၤန့ၣ်လီၤ. တၢ်အံၤ မ့ၢ်ပမူဒါ, ဒ်တၢ်ကွဲးတခါ ပာ်ဖျါဝဲ အသိးဘၣ်သ့ၣ်သ့ၣ် ကမ့ၢ်လၢ ပှၤတစူၢ်တနာ်တၢ်တဖၣ် ကတူၢ်လိာ် တၢ်လၤကပီၤ အတၢ်ကပီၤ အလၢအပှဲၤ လၢအမ့ၢ် ခရံာ်အတၢ်ကပီၤ လိၤလိၤ, လၢအနီၢ်ကစၢ်, တသ့ဝဲအဃိန့ၣ်လီၤ.

ခၣ်ဘရံၣ်ရၣ် သိၣ်လိအပျဲၢ်အဘီၣ်တဖၣ် “တၢ်တမံၤမံၤလၢ အအိၣ်ဒီး တၢ်ကပီၤ လိၤလိၤဘျၢဘျၢ, ဆူတၢ်ဂီၤအလိၤ, ကဲထီၣ်တၢ်ကပီၤအဂံၢ်ထံးတမံၤ လၢအကစၢ်ဒၣ်ဝဲ” န့ၣ်လီၤ. ဒ်န့ၣ်အသိး, ဃုာ်ဒီးကစၢ်ယ့ၣ်ရှူး ဒ်အမ့ၢ်, “တၢ်ကပီၤနီၢ်နီၢ်, … လၢအဟဲနုာ်လၢဟီၣ်ခိၣ်ချၢအံၤ”အဂီၢ် (:၉), ပကပီၤထီၣ် ပဝဲသ့ ဒ်အပှၤအုၣ်အသးန့ၣ်လီၤ. ဖဲပလီၣ်ဖျါထီၣ် အဝဲအတၢ်ကပီၤ, မ်ဟီၣ်ခိၣ် ကကမၢကမၣ်ဘၣ်တၢ်, ဒ်သိးတၢ်ကထံၣ် အဝဲအလၤကပီၤ လၢအကပီၤထီၣ်လၢ ပပူၤန့ၣ်တက့ၢ်.