ဘရဲဒၢၣ်(Brendan) ဒီး ခဲးထံၣ်(Katie)ကွၢ်လိာ်သး ကဒဲကဒဲ လၢတၢ်အဲၣ် အတၢ်သးခုလီၤ. လၢတၢ်သးခု လၢအကဆှီလၢ အဖျါထီၣ်လၢ အမဲာ်သၣ်တဖၣ်အလိၤအဃိ, တမ့ၢ်နကဆိကမိၣ်နီတစု လၢအဝဲသ့ၣ် ကအိၣ်ဒီးတၢ်ကီတၢ်ခဲ, လၢတၢ်ကတဲာ်ကတီၤ တၢ်တ့တၢ်ဖျီ, ဖဲတၢ်တြီဃာ်တၢ် လၢခိဘံး-၁၉အဃိန့ၣ်ဘၣ်. ဖဲလၢအဟံၣ်ဖိဃီဖိဒီး ပှၤလၢအကွဲမုာ်ဝဲ အနီၢ်ဂံၢ်-၂၅ ဂၤ ဟဲမၤလၤကပီၤ မူး, တၢ်သးခုဒီး တၢ်ဃူတၢ်မုာ် ဆဲးကပြုၢ်လၢပှၤခံဂၤ, ဖဲအအၢၣ်လီၤအီၤလီၤအသး လၢကကဲထီၣ်နီၢ်ဒီမိၤဝၤ, မ့ၢ်လၢ အဝဲသ့ၣ် အဲၣ်လိာ်ကွံလိာ်သး ဒီးပာ်ဖျါထီၣ် တၢ်စံးဘျုးက့ၤ ယွၤအတၢ်အဲၣ်တၢ်ကွံ လၢအပၢၤဃာ် အဝဲသ့ၣ်န့ၣ်လီၤ.
တၢ်အက့ၢ်အဂီၤ လၢတလးမူးပိာ်မုၣ် ဒီးတလးမူးပိာ်ခွါအတၢ်သးခု လၢတဂၤဒီးတဂၤအဖီခိၣ်အံၤ မ့ၢ်တၢ်ဂီၤလၢ ဝံယရှါယၤတ့ထီၣ်ဝဲ ဒ်သိးတၢ်ကပာ်ဖျါထီၣ် ကစၢ်ယွၤအတၢ်သးခု ဒီးတၢ်အဲၣ်တၢ်ကွံ ဒ်သိးအံၤ လၢအပှၤဂီၢ်မုၢ်အဂီၢ်န့ၣ်လီၤ. လၢတၢ်ကွဲးဖျါထီၣ် ထါဃံဃံလၤလၤ လၢအဘၣ်ထွဲဒီး ကစၢ်ယွၤအတၢ်အၢၣ်လီၤ လၢတၢ်ကမၤပူၤဖျဲးတၢ်, ဝံယရှါယၤ ဒုးသ့ၣ်နီၣ်ထီၣ် အပှၤဖးလံာ်ဖိတဖၣ်လၢ, ယွၤအတၢ်အုၣ်က့ၤခီၣ်က့ၤ လၢအဟ့ၣ်ဝဲဆူ အဝဲသ့ၣ်အအိၣ်, တၢ်မၤမုာ်ထီၣ်က့ၤပှၤလၢ အသးဘၣ်ဒိဘၣ်ထံး, တၢ်သးခုလၢ ပှၤလၢအသူၣ်အုးသးအုးအဂီၢ် ဒီးတၢ်မၤပှဲၤတၢ်လိၣ်တဖၣ် လၢအပှၤဂီၢ်မုၢ်အဂီၢ် (ယရှါ ၆၁:၁-၃), တၢ်တဖၣ်အံၤ လီၣ်ဖျါထီၣ် တၢ်မ့ၢ်တၢ်တီနီၢ်နီၢ် လၢပအိၣ်မူအိၣ်ဂဲၤ ဘၣ်လၢ ဟီၣ်ခိၣ် လၢဟးဂူာ်ဟးဂီၤဝဲ အဂ့ၢ်န့ၣ်လီၤ. ကစၢ်ယွၤဟ့ၣ်ထီၣ် တၢ်မၤစၢၤဆူ အပှၤဂီၢ်မုၢ်အအိၣ်, ဒီးဒ်တလးမူးပိာ်ခွါသူၣ်ဖှံသးညီလၢ တလးမူးပိာ်မုၣ်အသိး “နကစၢ်ကသူၣ်ဖှံသးညီလၢနဃိ” (၆၂:၅) ဒ်န့ၣ်အသိး, န့ၣ်လီၤ.
လၢကစၢ်ယွၤသးခုလၢပဖီခိၣ်ဒီး အဲၣ်ဒိးစ့ၢ်ကီး တၢ်တမံၤလၢ ပကရ့လိာ်ပသးဒီးအီၤန့ၣ် မ့ၢ်တၢ်မ့ၢ်တၢ်တီလၢအလီၤဆီ လၢတၢ်ထံၣ်တိၢ်နီၣ်အီၤတမံၤန့ၣ်လီၤ. ဖဲပမ့ၢ်ဘၣ်ဟူးဂဲၤလၢ တၢ်လၢအဟဲအိၣ်ထီၣ်လၢ ဟီၣ်ခိၣ် လၢအတလၢတပှဲၤတဘ့ၣ် ဘၣ်ဆၣ် ပအိၣ်ဒီးကစၢ်ယွၤတဂၤလၢအအဲၣ်ပှၤ, လၢအတကအုကစွါ, “မ့မ့ၢ် အိၣ်ဒီးတၢ်သးခုတမံၤ, ဒီးအဘျုးအဖှိၣ် အိၣ်ဝဲလီၤစိၤလီၤထီ” လၢပဖီခိၣ်န့ၣ်လီၤ (စံး ၁၃၆:၁).
