လၢ‘NFL’ ထံကီၢ်ဖျၢၣ်ထူကရၢအပူၤ ပှၤလိာ်ကွဲတၢ်ဖိတဖၣ် လိာ်ကွဲဖျၢၣ်ထူ အဆၢကတီၢ်အါတက့ၢ် ဖုၣ်ဝဲလီၤ. ဒ်တၢ်ဃုထံတၢ်အကရၢ အတၢ်ကွဲးနီၣ် အိၣ်အသိး အါတက့ၢ် အတၢ်ထိၣ်ဃူ(average) အိၣ်ဝဲ ၃.၃ န့ၣ်လီၤ. ဒီးဖဲန့ၢ် ‘NFL’ အပှၤလိာ်ကွဲဖိထီဘရဲးဒံၢ်(Tom Brady), ပှၤလိာ်ကွဲလၢလီၢ်ခံတခီအိၣ်ဝဲလီၤ. ဖဲ ၂၀၂၁ နံၣ်န့ၣ် အဝဲနုာ်လီၤလိာ်ကွဲက့ၤ ဖျၢၣ်ထူ ဖဲအတၢ်လိာ်ကွဲနံၣ် အဝီ(၂၂)ဝီတဝီ ဖဲအသးအိၣ်(၄၄)နံၣ်န့ၣ်လီၤ. ဘၣ်မနုၤအဃိ လိာ်ကွဲဝဲကဲလဲၣ်. ကမ့ၢ်လၢ အဝဲကတီၤအသးလၢ အတၢ်အီၣ်တၢ်အီအဖီခိၣ် ဒီးမၤဝဲနီၢ်ခိအတၢ်ဂဲၤလိာ် ဘၣ်ဆၢဘၣ်ကတီၢ် လၢဒုးကဲထီၣ်အီၤ ပှၤလိာ်ကွဲပြၢတၢ်အဂ့ၤကတၢၢ်လီၤ. ဘရဲးဒံၢ်မၤန့ၢ် Super Bowl ခိၣ်ဖး ၇ ဘျီအဃိ အဝဲဘၣ်တၢ်ဟ့ၣ်အီၤ မံၤလၤကပီၤ (G.O.A.T- greatest of all time) ပှၤလိာ်ကွဲတၢ်ဖိလၢအဂ့ၤကတၢၢ် လၢ‘NFL’ ကရၢအကျါန့ၣ်လီၤ. အတၢ်သးစဲလၢ တၢ်သ့လိာ်ကွဲဖျၢၣ်ထူ ထဲတမံၤဧိၤအံၤ ဘှီအတၢ်အိၣ်မူခဲလၢာ်လီၤ. မ့တမ့ၢ်လၢ အဝဲလူၤတၢ်လိာ်ကွဲတခါအံၤ လၢတၢ်သးစဲဘၣ်ဒီး မံၤလၤသၣ်ကပီၤ တမ့ၢ်ကကဲထီၣ်လၢအဂီၢ်ဘၣ်.

တၢ်မၢဖိစီၤပီလူးသ့ၣ်ညါနီၣ်ဝဲ ပှၤလိာ်ကွဲဖိတဖၣ် ပာ်ဖျါထီၣ် တၢ်မၤထွဲတၢ်သိၣ်တၢ်သီ ဖဲအဝဲအစိၤအဆၢကတီၢ်လီၤ (၁ ကရံၣ် ၉:၂၄). ဘၣ်ဆၣ် အဝဲထံၣ်စ့ၢ်ကီးဝဲလၢ ပှၤလိာ်ကွဲဖိတဖၣ် တၢ်သိၣ်လိအီၤ ထဲလဲၣ်ထဲလဲၣ်နာ်သက့ မုၢ်တနံၤ, အလၤကပီၤ ကလီၤမၢ်ကွံာ်လီၤ. ဖဲပထိၣ်သတြီၤန့ၣ် အဝဲစံးဝဲ ပအိၣ်ဒီးတၢ်ခွဲးတၢ်ယာ် လၢပကမူလၢယ့ၣ်ရှူးအဂီၢ် လၢကကဲဘျုး လီၤထူလီၤယိာ်လီၤ. ပှၤလိာ်ကွဲဖိတဖၣ် မ့ၢ်ဂဲၤလိာ်ဆူၣ်ဆူၣ် လၢကန့ၢ်ဘၣ်တၢ်လၤကပီၤ လၢအအိၣ်တစိၢ်ဖိအံၤန့ၣ်, စီၤပီလူးတဲဖျါထီၣ်ဝဲလၢ ပဂ့ၤမၤအါန့ၣ်အဝဲသ့ၣ်, ပဂ့ၤကျဲးစၢးမၤန့ၢ် “ခိၣ်သလုးလၢအိၣ်လီၤထူလီၤယိာ်”တဖၣ်န့ၣ်လီၤ (:၂၅).

ဒ်သိး ပှၤကန့ၢ်ဘၣ်တၢ်အုၣ်က့ၤခီၣ်က့ၤန့ၣ် ပတဟ့ၣ်တၢ်သိၣ်လိဘၣ်. မ့မ့ၢ် ဖဲပသ့ၣ်ညါလၢ တၢ်အုၣ်က့ၤခီၣ်က့ၤပှၤ လၢလီၤလးဒိၣ်အံၤန့ၣ်, တၢ်သ့ၣ်ညါအံၤ လဲလိာ်ကွံာ် ပတၢ်သးဆူၣ်သးစဲတဖၣ်, ဒီးပတၢ်ထံၣ်သ့ၣ်ညါနၢ်ပၢၢ်တဖၣ် ဒီးပတၢ်အိၣ်မူအိၣ်ဂဲၤတဖၣ် ဖဲပဝဲတဂၤစုာ်စုာ် ပဃ့ၢ် တၢ်စူၢ်တၢ်နာ်အတၢ်ဃ့ၢ်ပြၢ လၢယွၤအဂံၢ်အဘါန့ၣ်လီၤ.