ဖဲ ၁၉၇၉ နံၣ်န့ၣ် ပှၤခူၣ်ထံၣ်က့ၤတၢ်လၢပျၢၤ ကၤဘြံယဲၣ် ဘၢ်ခ့ (Gabriel Barkay) ခူၣ်ထံၣ်ဝဲ လံာ်ထူဖိခံခါ လၢဘၣ်တၢ်မၤအီၤလၢစ့န့ၣ်လီၤ. ဒ်သိးတၢ်ကအိးထီၣ် လံာ်ထူဖိအံၤ ယံာ်ဝဲတဘျုးနံၣ်ညါ ဒီးတၢ်ထံၣ်န့ၢ် ဧ့ၤဘြံၤအလံာ် လၢပထံၣ်ဘၣ် ဖဲ ၄ မိၤရှ့ ၆:၂၄-၂၆ န့ၣ်လီၤ.“မ်ယွၤဆိၣ်ဂ့ၤနၤ ဒီးကွၢ်က့ၤနၤတက့ၢ်. မ်ယွၤဒုးကပီၤထီၣ်နၤလၢအမဲာ် ဒီးဒုးဘၣ်နၤလၢ အဘျုးအဖှိၣ်တက့ၢ်. မ်ယွၤပာ်ထီၣ်အမဲာ်လၢနလိၤဒီး ဟ့ၣ်လီၤနၤလၢတၢ်ဃူတၢ်ဖိးတက့ၢ်”. ပှၤသ့လံာ်တဖၣ် ပာ်အမုၢ်နံၤလၢ လံာ်ထူဖိအံၤ ဘၣ်တၢ်ကွဲးအီၤ ဖဲတချုးခရံာ်နံၣ် ၇၀၀ အဘၢၣ်စၢၤန့ၣ်လီၤ.
ဒ်န့ၣ်အသိး တၢ်လီၤသးစဲ မ့ၢ်တၢ်လီၢ်တၢ်ကျဲ ဖဲတၢ်ထံၣ်န့ၢ် အဝဲသ့ၣ်လီၤ. ဘၢ်ခ့ခူၣ်လၢၢ်ကအိ ဖဲဟံၣ်နိၣ်(Hinnom)အကစၢၢ်ကဆူး မ့ၢ်တၢ်လီၢ်တတီၤဃီ ဖဲဝံယံးရမံယၤတဲဘၣ် ပှၤကီၢ်ယူဒၤဖိ လၢယွၤကမၤသံအဝဲသ့ၣ် မ့ၢ်လၢအဝဲသ့ၣ်လုၢ်ထီၣ်အဖိလီၤ (ယံး ၁၉:၄-၆). ကစၢၢ်ကဆူးအံၤ မ့ၢ်အလီၢ်ဖဲတၢ်အၢတၢ်သီ အိၣ်ဝဲအဃိ ယ့ၣ်ရှူးစူးကါ တၢ်ကတိၤ ‘လရာ်(ကဟဲနၤ-Gehenna)’န့ၣ်လီၤ. (တၢ်ကတိၤအံၤ မ့ၢ်ဟ့းလ့ၣ်တၢ်ကတိၤ လၢဧ့ၤဘြံၤကိးအီၤလၢ ဟံၣ်နိၣ်အကစၢၢ်ကဆူး) ဒ်ရာ်(hell)အဂီၢ်အသိးလီၤ(မး ၂၃:၃၃). ဖဲအကတီၢ်အံၤ, ဖဲဝံယံးရမံယၤ တဲဖျါတ့ၢ် ယွၤအတၢ်စံၣ်ညီၣ် အပှၤဂီၢ်မုၢ်အကတီၢ်န့ၣ် ပှၤတဂၤကွဲးလီၤ ခါဆူညါအတၢ်ဆိၣ်ဂ့ၤတဖၣ် ဖဲစ့ကဘျၣ်လံာ်ထူအပူၤလီၤ. တၢ်န့ၣ် တမ့ၢ်ကကဲထီၣ်အသး ဖဲအဝဲသ့ၣ်အစိၤဘၣ်. ဘၣ်ဆၣ်, မုၢ်တနံၤ ဖဲဘၤဘူၤလိၣ်မၤနၢၤ တၢ်ဝံၤအလီၢ်ခံန့ၣ် ယွၤကဃၣ်ကဒါအမဲာ် ဆူအပှၤဂီၢ်မုၢ်ဒီးဟ့ၣ်အဝဲသ့ၣ်လၢ တၢ်ဃူတၢ်ဖိးလီၤ.
တၢ်မၤလိလၢပဂီၢ် ဖျါဂ့ၤဝဲလီၤ. ပမ့ၢ်ကြၢးဘၣ်တၢ် ဒ်ပမၤအသိးသနာ်က့ ပဖိးဃာ် ယွၤအတၢ်အၢၣ်လီၤအီလီၤသ့ဝဲလီၤ. ကစၢ်ယွၤ အသးအိၣ်အပှၤဂီၢ်မုၢ် ထီဘိလီၤ.
